媽咪姐手帳
講開陳冠希，媽咪姐轉個頭就見阿嬌喺新城《Twins十周年音樂會》上表演，孖妹呢頭慶祝十周年，嗰頭就話將會拆夥，據聞之後佢哋會各自拍戲、出碟；不過，關智斌同張致恒組成嘅Boy'z就會再度合體喎！據唱片公司人員透露：「其實阿嬌同阿Sa已經分開發展一段時間啦，如果宣布埋Boy'z復合，報紙可以登大啲。而且Twins分開之後，阿Sa愈做愈好，就算公開戀情都無影響；但阿嬌嘅負面形象好難洗底，無乜工作又無乜人氣，都想趁機會同佢做啲新聞。」
Twins就好隱晦咁回應話：「因為十周年國語碟賣得幾好，家會出廣東碟先。」唉，咁即係點吖，拆定唔拆，都係睇錢啫。做女人，梗係自己搵到最好啦！媽咪姐奉勸阿嬌一句，有搵得搵，等男人保護？蚊都瞓！ ####
十年人事真係幾番新，當年孖妹仲有baby fat，跳跳紮唱〈愛情當入樽〉。今日？拉埋Boy'z一齊表演，大個女嘞！瘦咗，又攰咗囉。
以前被叫「肥嬌」嘅鍾欣桐，今次真係練舞練到臉都凹，麒麟臂唔見咗，連假眼睫毛都跌出嚟，經過風雨，確係唔同曬。
838期
