媽咪姐手帳
呢幾日睇報紙雜誌，媽咪姐又忍唔住搖頭嘆息，唉！好哋哋一個靚女名模兼「宅男女神」Jessica C.，點解會涉嫌盜竊人哋遺留喺櫃員機嗰600蚊，而要出入警署？傳聞佢同警方講，有接觸過嗰600蚊，但唔知點處理，轉頭就交俾同行嘅外籍朋友，叫人哋代為搞掂喎！
講真，媽咪姐都試過撳機嗰陣，發現有人唔記得攞走自己撳出嚟嘅錢，睇疊錢嘅厚度，應該有幾千蚊㗎！但我無好似Jessica C.咁，好順手就攞咗，而係「金睛火眼」望住疊錢，等咗大約廿秒，喺櫃員機發出嘅「嘟嘟聲」下，「護送」佢安全回歸機內。其實，唔好隨便攞唔屬於自己嘅嘢，有問題就報警，呢啲都係好普通嘅常識！媽咪姐識點做，今年廿二歲嘅Jessica C.亦無可能會唔知道啩？
據其經理人解釋，「就我理解係誤會，我只可以解釋佢係細路女，唔識得處理，唔係刻意做犯法嘅事。」廿二歲仲係細路女？好似有啲牽強喎。不過，講起上嚟，美國出世嘅佢，十四歲就讀模特兒學校，十五歲入行，十六歲已經嚟過香港發展。當年係2005年，嗰時仲係細路女嘅Jessica C.，直情係模先鋒。C媽好贊成個女做model，女神自己又鍾意旅行，話做得好開心！
十五歲入行 養家又貼仔
之但係，你話媽咪姐老土都咁話啦！一個女仔太早入行，無時間好好讀書同學做人，始終都係唔多妥。試諗吓，十五歲係大家讀緊中三嘅年紀，以前煩緊揀文科定理科咋！但Jessica C.已經入咗模特兒界呢個花花世界大染缸，美、日、港三邊飛，行catwalk影相搵錢！當然，咁細個就有靚衫着兼幫補到家計，真係幾叻女（係唔知點解，仲要養埋四肢發達嘅前奀模男友四年啫！）。呢位家中大姐姐仲話過，自己唔介意性感，但要有品味，要做兩個妹妹嘅好榜樣。
所以，Jessica C.喺前日上機去高雄拍戲前，都同傳媒講：「如果呢件事，我有令任何人唔開心，或受傷害，我會道歉，對唔住！」媽咪姐睇佢連日來被大批記者追住，喊曬又無面見人，真係幾慘。但年少無知唔係「免死金牌」，「細路女」以後要生性做人嘞。
天堂地獄 一線之隔
由上星期五（7日）開始，Jessica C.一連三場喺《古巨基Amazing World世界巡迴演唱會》擔任表演嘉賓，晚晚同破天荒有肌睇嘅基仔咀嘴，大獲好評，本來前路一片光明！
不過，星期一（10日）被捕消息一出，形象插水，七年model事業恐防一鋪清袋。雖然，佢剛剛甩拖唔使再貼仔，但都要養家供樓，所以連日來，佢派人向各大廣告客戶「報定案」，聲稱整件事純屬誤會，希望可以大步檻過。
基仔力撐
收身操肌成功，變身「古巨肌」嘅基仔，同Jessica C.咀足三晚。佢對今次事件就回應話：「認識嘅Jessica C.係個好俾心機工作嘅人，希望今次事件只係一場誤會，希望佢無事。」
網民唔撐
Jessica C.貴為「宅男女神」，但今次出事，網民唔撐，仲懷疑警方點解要一年後先搵佢協助調查。原來「宅男」做人都好公道。
失戀
月初，Jessica C.發公開聲明承認同奀模男友Serigo分手，估唔到呢幾日又出事！但佢男友好食懶飛，斬纜止蝕，煩少樣，點都係好事。
上位
####
避得一時避唔到一世，一分鐘之後，Jessica C.都要硬住頭皮出嚟見人。睇佢額頭爆曬壓力瘡，就知呢關唔易過！
星期二（11日）晨早，搞完保釋無耐，無乜點瞓嘅Jessica C.，已經搭飛機去高雄做嘢，但仍然記得影張嘟嘴相放上微博，話miss Hong Kong，好襟撈！
星期一（10日）晚，女神去尖沙嘴警署協助調查，本來七點幾搞掂出門口，但佢見到大批記者，行咗幾步，又嚇到走番入警署借廁所「避難」。
本來坐七人車走，但去到中環忽然轉搭的士，想撇甩追訪嘅記者，但當然唔成功！最後搞到喺的士抱頭匿埋，為乜呢？
終於返到銅鑼灣寓所，Jessica C.一支箭標入電梯，兩個助手都差啲跟唔切，女神落難！
Jessica C.（後排左一）係美菲混血兒，同媽咪（前排左一）同兩個妹妹（前排右一、二）感情好好。今次出事，家人梗係擔心。
十五歲起，女神就經常一個人在外，閒時除咗「供養」男友，就係買衫。睇吓呢個陣容！其實，佢都應該好寂寞。
今年中，同周秀娜、傅穎合作嘅《熱浪求愛戰》上畫，雖然票房唔多好，但終叫上過大銀幕，便想順勢北上發展。依家？要睇個官！同睇個天！
09年，廣東話都未識講多句，但同葛民輝拍Canon廣告，憑住sweet樣，已經一炮而紅。後尾，騷埋「警鐘胸」，掂曬！點諗到兩年後真係響警鐘。
846期
