早幾日蘋果開發布會，唔少粉絲以為推出iPhone 5，點知空歡喜一場，只係推出4S，蘋果股價即時受壓。勢估唔到事隔一日，蘋果教主喬布斯逝世，呢位改變世界嘅人物只得五十六歲，難怪唔少蘋果粉絲都好惋惜。
真係不得不佩服喬布斯，佢領導下唔單止讓蘋果股價飛升，連其他跟蘋東沾上關係嘅公司，亦廣為受惠。
好似賣蘋果配件嘅店舖亦都好掂，九四年已喺香港賣蘋果電腦，有「亞洲第一蘋果中心」美譽嘅DG Lifestyle，生意愈做愈大，七月落戶金鐘太古廣場。間舖最大賣點，係一個價值六萬八千八百八十八元嘅鑽石iPad Case，加埋嗰部以黃金打造嘅iPhone 4，盛惠八萬三千二百銀。唔好以為無人問津，唔少內地客貪產品夠豪有貴氣，買嚟自用或送禮。
