2013年1月18日 星期五

[忽然1周]投資法國片蝕千萬 黃光亮:有錢咪還囉

上周四( 10日),黃光亮宣傳《老表》時被問到投資法國片失利時,他無奈承認,還一臉緊張說:「唉!我依家爭人成千萬。」


娛聞樂

投資法國片蝕千萬 黃光亮:有錢咪還囉

2013年01月18日

挑起中港矛盾的無綫新劇《老表,你好嘢 !》高收,連帶劇中一眾演員旋即成為風頭人物。早前有指是王祖藍老竇的黃光亮,於劇中名正言順與王祖藍做兩父子。

今年 61歲的黃光亮,近年銷聲匿跡,原來他 08年曾借朋友千萬投資法國動作片《 Last Hour》,自己身兼製片及演員兩職,戲中他更剃光頭打餐死。可惜電影最後因發行問題無法上映,只係出咗 DVD,輸鑊金!孭住千萬街數,難怪黃光亮局住返無綫撲水。

於電影《監獄風雲》出位的黃光亮,擅長演繹江湖大佬角色。不過近年本地電影買少見少,無戲可演之下,黃光亮膽粗粗與尹揚明於北京成立規模細小的製作公司。 08年他雄心壯志,與法國投資商傾掂數合資開拍動作片《 Last Hour》。

放大圖片

封面佔角位

黃光亮投資的《 Last Hour》最終只出 DVD,封面由主角之一的 rapper DMX孭飛。有份投資的黃光亮除以 Tommy Wong排名外,更佔了封面一角(圈中),總算有點回報。

放大圖片

標殺令班底

曾演《標殺令》, 09年過身的荷里活男星( 70年代劇集《功夫》男主角) David Carradine亦有份參演。

放大圖片

打到飛起

戲中光頭嘅黃光亮甚少對白,但就有多場拳拳到肉的動作場面。以他年紀來說,身手都好敏捷。

向人大借錢

拍戲如同倒水,據知黃光亮四處問人度水拍片之際,當時一位姓王的人大代表,眼見黃盛意拳拳,於是就答應科水千萬,助黃打入國際。知情者說:「亮哥(黃光亮暱稱)八、九十年代拍好多戲,收入總算過得去,不過佢想錢搵錢,於是學人做生意,點知鋪鋪輸。當時唔借錢套法國片實開唔成。」

財源有著落,於是黃光亮出任製片之餘,更剃光頭飾演冷血殺手,一把年紀的他亦親自上陣拍動作場面。套戲拍足大半年,又有荷里活影星助陣,但始終過唔到發行嗰關,院線拒絕俾期上映,於是電影拍竣後直出 DVD。黃光亮所投資的金錢和心血,注定冇得回本。

上周四( 10日)黃光亮宣傳《老表》時,向記者承認投資法國片失利,他說:「套戲上唔到有好多因素,哎!我依家爭人成千萬!不過佢(債主)叫我唔好放喺心,但欠債還錢好應份,點可以唔放喺心!(債主係咪人大代表?)係,不過我唔想公開人哋個名。」事後記者再致電他,但他卻不耐煩說:「好多嘢好難三言兩語講清楚你知,我係有損失,做乜都預咗有損失㗎啦!香港人好多都爭人錢㗎啦!你有冇爭人錢吖!我有錢咪還囉!」

放大圖片

五官倒模一樣的黃光亮和王祖藍於《老表》中做兩父子,甚有說服力,難怪不少網友盛讚二人劇中表現出色。

放大圖片

揸波子

上周五( 11日),記者發現他揸住 06年以 84萬買入的黑色波子四驅車,出發到南圍探親友。記者笑他欠千萬債仍繼續揸名車時,他寸嘴說:「問呢啲嘢好多餘。」

放大圖片

住靚樓

黃光亮現與太太居於大埔道翠竹苑,他 91年以 280萬買入,現時已升近兩倍。

放大圖片

黃光亮性格暴躁, 02年試過與太太夜蒲後起爭執,搭的士返寓所時,一手打爆的士車窗,玻璃割傷右腕大動脈,要留醫治理。《蘋果日報》圖片

放大圖片

黃光亮甚少提家事,但 01年他就帶埋太太張桂芳(左一)、兒子和父母,出席《宇宙無敵獎門人》。《蘋果日報》圖片

王祖藍引薦

放大圖片

黃光亮 09年無厘頭出碟,更打大赤膊拍〈中國氣概〉 MV,九唔搭八。

雖然債主還未摸上門,但畢竟臨老才孭一身債,黃光亮冇理由唔諗計仔。於是曾拜黃霑為師的他, 09年北上唱歌兼出碟,主打歌叫〈中國氣概〉,擺明賣口乖。直至去年,無綫搵王祖藍度期拍《老表》,就促成黃光亮返無綫拍劇。知情者說:「咁啱嗰陣有報道搞笑話亮哥同祖藍係兩父子,雖然呢單嘢擺明係笑話一則,但祖藍見呢個組合有睇頭,於是出面叫公司斟亮哥返嚟。個價唔高佢都肯拍,呢個係意料之外。」

據知黃光亮今次劇酬 8千蚊一集,二十集合計有 16萬。不過套劇拍足三個月,所以高薪定賤價,真係見仁見智。對此他說:「我同無綫都係簽咗一套《老表》,但真係想出返嚟做戲,做番自己老本行。」

其實黃光亮 29歲便結婚,太太張桂芳是圈外人。當記者問他有幾多個兒女時,他竟笑說:「有六、七個啦!」另外,黃早年原來與寇鴻萍因傾生意傳出緋聞。寇對此強烈否認,更說:「可能我細個見過佢都未定,但其他嘢我不予置評喇!」

輸開有條路

31歲先入行的黃光亮廿年來不停投資,可惜鋪鋪蝕錢收場。他亦曾承認當有需要時會問朋友借錢,「問朋友借好過去自殺吖!」

夜場賣盤

91年,黃光亮以大股東身份與朋友合資開酒廊,當時他要晚晚打躉穀生意,但當他不坐鎮時,酒廊生意便少了一半,最後惟有賣盤收場。

開戲捧自己

一直做配角的黃光亮, 92年搵馬偉豪擔任導演,開拍《何日金再來》,由黃霑、成奎安和自己出任主角,可惜票房慘淡,勁蝕百萬。

淡出搞木廠

黃光亮對娛樂圈心灰意冷,更謂「唔想再上電視節目,唔想再見報,最好過多兩年就冇人記得我!」於是他 95年北上搞木廠,日日搭巴士返東莞開工,可惜木廠最後因欠債而結業。



.[忽然1周]投資法國片蝕千萬 黃光亮:有錢咪還囉
http://veryy8.blogspot.com/2013/01/1-1_5185.html
.[忽然1周]投資法國片蝕千萬 黃光亮:有錢咪還囉
http://veryy8.blogspot.com/2013/01/1-1_5185.html