2012年11月21日星期三

[FACE]富家女大作戰　梁佑嘉

Beauty Hunt

富家女大作戰　梁佑嘉

2012年11月21日

唔覺唔覺，梁佑嘉（ Abella）最近再推出第 3張專輯《 Abella 3》，只是入行兩年，最惹人注意的仍然是她的背景：有個政協爸爸、身家豐厚、掟 200萬賣廣告。

Abella自辯：「我唔想靠屋企，自己搵自己使嘅感覺係好正！」邊個掟錢都好，銀彈政策絕對有效。 Abella的長髮新 look引起注意，被高登仔封為新一代「女神」，不過呢位女神離不開「富貴女」三個字，「呢啲傳聞沒完沒了，有一刻諗過退出娛樂圈！」有錢唔代表冇煩惱！

放大圖片

梁佑嘉講話好快，亦很清楚自己要說甚麼，一口氣說完新碟的概念、親自填詞的新歌〈移除記憶卡〉、為新專輯駁長髮轉形象等等，好明顯 Abella真係好愛唱歌。

「屋企係做地產，嗲哋叫我去佢公司做，但我唔想靠屋企人，想同大家一樣讀完書出嚟搵工，畢業後（澳洲新南威爾斯大學）去咗船公司做 customer service，每日不停接電話，搞到返屋企唔敢聽電話。」 Abella 10年簽唱片公司入行，承認很少圈中朋友：「我諗唔關我背景事，可能我個樣 cool啲，其實我好多嘢講㗎！出面傳我掟錢拍廣告出碟，壓力好大，有一刻諗過退出娛樂圈！」

有畀家用？

放大圖片

梁佑嘉與家人關係良好，對爸爸梁平涉嫌種票一事則不願多講。

唔想靠富爸爸，去年傳出她父親梁平涉種票醜聞要避走廣東茂名市，梁佑嘉自稱好少見阿爸，「我同屋企人住，但家人甚少喺屋企，嗲哋亦好少問我工作嘅嘢，連我出新碟都唔知。我好耐冇問屋企攞零用錢喇，相反我出嚟做嘢有畀家用㗎！」你信唔信？

最近成為高登仔熱話，梁佑嘉亦一於少理，「我好少上討論區，都有同事同我講過嘅，不過冇乜特別感覺。」有錢女真係乜都唔志在咁款喎！