滾熱辣
《巾幗 3》被飛內幕 爆鄧萃雯三宗罪
2012年10月05日
物盡其用，無綫撲槌明年三月開拍《巾幗梟雄 3》，正當外間盛傳無敵鐵三角黎耀祥、鄧萃雯（雯女）和監製李添勝，必將成為鐵腳之際，無綫卻炮製驚喜，宣布女主角由親生女胡杏兒頂上。
雯女以為坐定粒六冧莊，一早推定兩部大陸劇，騰空檔期專心拍《巾幗 3》。輸錢事小，冇面事大，神級視後竟然被飛收場，難怪她死撐話想放大假唞下。
據知今次死因，全由雯女自招，她拍劇時曾犯下阻收工、揀導演和教做戲三宗罪。昔日和雯女拍住上的黎耀祥指她要求高，謝雪心亦承認曾被雯女提點演技。戲外比戲內更勾心鬥角。
曾經和雯女合作過的黎耀祥和謝雪心，對雯女的三宗罪各持己見。
對於被飛出《巾幗 3》，雯女說：「添哥（李添勝）唔預我一定有佢原因，我感激都嚟唔切！其實我講過如果有驚天地泣鬼神嘅劇本，先好再搵我同祥仔合作。呢套劇已經與我無關。」雖然雯女表面唔在乎，更兜一個大圈暗寸今次劇本唔掂，但事前她一直以為實食冇黐牙，推咗兩部大陸劇不特止，更一早問無綫攞劇本。知情人士說：「雯女成日打電話嘈啲編劇，話要睇定劇本揣摩角色，但套劇出年三月先拍，劇本十劃都未有一撇。幕前幕後一直以為雯女有份做，上個月先收到通知，個角色換咗杏兒。」
經常要求重拍
雯女心急睇劇本辣㷫幕後，純屬導火線，其實過去她曾犯下拍劇三宗罪，積落不少仇家，才釀成今次被飛事件。第一宗罪：阻收工。據知雯女 09年拍攝《巾幗 1》時已經醃尖腥悶，明明導演已經收貨，但偏執的雯女認為效果未達完美，遂要求重拍。知情人士說：「俾佢（雯女）咁搞法，明明淩晨廿四收得廠，要拖到廿六（淩晨四時）至放工。」記者聯絡過雯女老拍檔黎耀祥，提到雯女阻收工，他支吾以對：「唔……咁雯女做嘢一向都好認真嘅！咁有要求係好嘅！佢都係想啲戲出嚟好啫！（今次搵杏兒頂上？）咁公司嘅嘢有好多變化嘅，同雯女都再難有火花啦。」
第二宗罪：揀導演。無綫拍劇一向有制度，為加快進度，一套 20集的劇向來由四位導演負責，每位導演負責 5集，演員上午拍其中一位導演的外景後，晚上就拍另外一位導演的廠景。知情人士說：「雯女遇著啲經驗唔夠嘅導演，未拍之前已經同監製投訴定先，話要換人先肯埋位。」
曾教心姐做戲
第三宗罪：教做戲。知情人士說：「冇佢（雯女）嘅場口，佢都戙喺度諸多意見，仲不停話點做先帶到觀眾入戲，其實無綫好多演員都係老戲骨，使佢教咩！」曾經在《巾幗》系列兩度與雯女交手的謝雪心，承認真有其事，她哈哈大笑向記者說：「咁雯女教我做戲，都係袋錢入我袋啫！我多謝佢都嚟唔切啦！」
綜合以上罪狀，無綫決定大刀闊斧，棄雯女取杏兒。胡杏兒難得執到好籌，嗱嗱聲推了一部大陸劇，預留檔期。她說：「我好大壓力㗎！雯女上兩輯《巾幗》來頭咁勁，我都擔心自己做得唔夠好。最好改名啦！」監製李添勝連日來為劇本絞盡腦汁，無暇接聽記者電話，但他曾說：「雯女同我合作，從來都係全心全意拍好戲。」記者亦多次致電雯女但不獲回覆，但她卻在微博寫上：「要時刻警醒，因為世途確實險惡」，似為「被飛」一事耿耿於懷。
帶挈爆紅
《巾幗》橫掃內地電視台收視冠軍，帶挈內地爆紅，四年間賺了二千萬。今次雯女冇份拍《巾幗 3》，錢隨時搵少幾倍。
劇集
《傾城雪》、《棋逢敵手》女主角 約 1,000萬
《新還珠格格》、《顧太清》客串 約 120萬
電影
《四大名捕》客串 約 30萬
登台
與黎耀祥海外登台三場 約 240萬
廣告
《日本命力強骼素》等六個廣告 約 600萬
約 1,990萬
.[忽然1周]《巾幗 3》被飛內幕 爆鄧萃雯三宗罪
http://hk8news-d.blogspot.com/2012/10/1-3.html
