2012年9月23日星期日

劉心悠馬國明神級Honey

各花入各眼，型男索女的標準在各人心中大有不同，圈中靚女劉心悠和筍盤馬國明，各有理想的「男神」、「女神」，前者鍾情「西裝型男」，後者獨愛「古典美女」，不過對於兩人來說，要找個符合條件的另一半談何容易？

形象乖仔的無綫小生馬國明（馬明），有本事深得出名「醃尖」的討論區巴打歡心，被熱捧為「男神」之餘，更堪稱「圈中筍盤」！即使馬明在最近的劇集中一改乖仔形象，時而邪惡不羈，時而幽默抵死，令其受歡迎指數持續飆升，但他仍不改其「怕醜」性格，繼續謙虛否認其「筍盤」地位：「其實只要係未結婚、事業有成嘅男仔都係筍盤！（林峯、黃宗澤都係？）當然啦！」

自嘲悶爆全場

馬明更企圖搬出其所謂「缺點」自貶身價：「其實我有好多缺點，只係觀眾唔知，我份人真係好悶，冇乜情趣！」早前馬明於《回到三國》中飾演的司馬雲信幽默抵死，更是情場鬼見愁「溝死女」，但他坦言其「抵死」一面只會向媽媽和女友展現：「我平時太懶，就算有風趣一面都好少表露出嚟，寧願慳番啲Energy工作，不過如果有拖拍，都會搞嚇Gag氹女友！」

古典美女索喎！

雖然馬明深受女士歡迎，但他坦言享受單身生活：「去邊都唔使同人交代，自由自在冇壓力，隨時約朋友踢波、食飯都得，幾爽！其實我好怕女仔太煩、太黐身！」到底在「男神」馬明心目中，「女神」又是何模樣？他說：「我鍾意女仔有古典美，眼細嘅女仔都可以好靚，好似湯唯、吳倩蓮，佢哋好有氣質！」他又認為「女神」不一定要靚：「以前我鍾意長髮、大眼嘅女仔，但依家大家相處舒服就OK！就算個樣幾靚都好，對多幾年就會厭！」對於理想女友的要求，他笑說：「最好善解人意，識睇眉頭眼額，知我幾時想靜一靜，哈哈！」

斯文乖仔的馬明，原來亦有「至Man」一面：「入行前我好鍾意打War Game，同朋友用真槍玩，只係子彈冇彈頭！」馬明不但Man更可以型！早前他在劇集《飛虎》中飾演大反派悍匪一角，他笑說：「好多謝監製同化妝師，我見到個造型之後都『嘩』一聲，原來我都可以咁型！」他還希望嘗試不同角色，帶給觀眾新鮮感！

後記：「小情人」搭夠

愛錫家人的馬明無論工作多忙碌，仍會抽時間與家人共度Family Day，閒時更會帶同姨甥仔女踢足球，甚有慈父風範！雖然現時單身寡佬未有拖拍，但有這群「小情人」陪伴，相信馬明亦會不愁寂寞！

要數圈中的「宅男女神」，可以分三大等級，騷身材的「乳」量級、騷可愛樣的中量級及騷氣質靚女的重量級，前兩者可以說是模天下，但若要數氣質型美女，不得不提台灣女神劉心悠，雖在娛樂圈打滾多年，但並沒被洗禮得身心俱疲而憔悴，反而十年如一日，憑靚樣俘虜不少宅男。

尚未修煉成功

對於被封「女神」，心悠有點抗拒，並謙虛地說︰「我覺得我唔係！出面有好多人係，外國嘅有安祖蓮娜祖莉，香港就有鍾楚紅、張曼玉或者周慧敏，佢哋好有氣質，睇佢哋以前嘅電影同依家個樣冇變到，笑容仲好吸引！」心悠看似懷疑自己的氣質，但她直言只是佩服這些前輩級女神的氣質能長長久久，更用「神」來比喻她們︰「我自己係有氣質，但可唔可以維持？人會變，心態亦會唔同，好似佢哋咁，依家都仲好後生，呢個就係人類同神嘅分別！」

西裝型男正呀！

在心悠眼中的女神都是一些神級圈中人，至於能俘虜她芳心的圈中型男，當然亦有番咁上下分量，樣貌固然重要，但一套「四正」西裝一定不能少，她笑說︰「我好鍾意睇人著西裝，太有氣質！起碼呃到我先，佐治古尼就係我心目中嘅男神！如果香港嘅話我會揀發哥（周潤發），我鍾意成熟啲！」但提到揀男友條件，卻是可遇不可求，她淡淡的說︰「隨緣啦！冇得咁揀，如果要符合呢個條件可能未必啱。」

女人唔Keep好易老，不得不承認心悠Keep得非常好，讓一班港女羨慕不已！Fit爆身形全憑做運動，但靚樣除了靠護膚品外，她認為全靠「心境」二字︰「最緊要Keep住個開心同年輕，依家我都冇特別吃力去諗嘢，盡量做自己想做嘅嘢，好似我鍾意去馬爾代夫，咪抽時間唔使做嘢就去。」

話雖如此，但不代表心悠沒有煩惱事，她想了想說︰「當然有啲事唔識處理，例如身體上嘅問題，又要跳舞又要工作，冇時間休息，但我堅持要有運動量，所以真係有啲攰！」相信宅男們會感到心痛呢！

後記：暖意在心頭

首次跟心悠做專訪是兩年前，沒有架子的她總是笑容滿面！再次遇上這位台灣姑娘，工作密麻麻的她只得在用膳時傾談，忙著夾餸醫肚的同時，還要回答小記問題，期間又會問︰「你要唔要食啲？」讓小記非常窩心。

馬國明

劉心悠