甩拖壓力爆煲失調爛面 鍾嘉欣：我要控制情緒 鍾嘉欣,MW,

2013年11月8日星期五

甩拖壓力爆煲失調爛面　鍾嘉欣：我要控制情緒鍾嘉欣,MW,

眼泛淚光

10月 31日，鍾嘉欣着上低胸長裙擔任一間珠寶店開幕嘉賓。其間提到很想叫父親早些退休，來港陪伴自己時，一度嘴扁扁眼泛淚光，看來她承受了不少壓力。

娛樂喧

甩拖壓力爆煲失調爛面　鍾嘉欣：我要控制情緒

無綫台慶頒獎禮即將舉行，在當家花旦寥寥可數之下，鍾嘉欣憑劇集《巨輪》被看好成視後大熱，加上 TVB的「星夢娛樂」唱片公司成立後，就只有鍾嘉欣最有潛力作雙線發展。手持金蛋當然要穀行曝光率，鍾嘉欣劇接劇之外，商場騷更加做不停，連纖體廣告亦一輯比一輯性感，最新一輯穀胸程度更是歷來最勁。

玉女形象開始變質，近日更有傳她因陳展鵬而與伍允龍甩拖。在多重壓力下，鍾嘉欣搞到失調至爆瘡爛面要睇中醫，難怪她對記者說：「我要控制自己情緒！」

其他影片

鍾嘉欣玉女形象向來深入民心，被冠以「 BB」暱稱，論性感亦只局限在每年台慶頒獎禮上，但今年她竟一反常態，不時打扮性感出席活動，連纖體廣告亦大賣極罕北半球。無綫幕後人員表示：「公司一路都係睇邊個賣到錢咪穀邊個囉，成個台依家最受客戶歡迎當然係鍾嘉欣啦。因為佢以往好少性感，所以只要佢肯露少少就好有客路。 TVB幫佢向纖體廣告公司開咗個高價，估唔到個客又肯俾喎！」

被指劈腿

這邊廂無綫努力向廣告商 sell嘉欣 BB，另一邊廂鍾嘉欣自己亦努力憑演技在花旦中突圍。去年她擔正演出的《護花危情》收視更是全年之冠，為求突破免做花瓶，早前她在《飛虎 II》瞓身演出，爆破場面亦親自上陣，今年她憑《巨輪》亦一致被看好是大馬與香港頒獎禮視後大熱。人氣急升連身價亦隨即暴升，其出騷價已由過往 7萬元躍升到 10萬元。

鍾嘉欣由年中起一直歌視兩忙，頻頻性感示人。早前她更與《巨輪》拍檔陳展鵬傳出緋聞，被指瞞住正印男友伍允龍而一腳踏兩船，引來大批狗仔日跟夜跟，最終搞到她壓力爆煲。在該劇結局直播記者會上，她更自爆：「我要控制自己情緒！」

甩粉爆瘡

上周六（ 2日），無綫安排《巨輪》一眾演員到將軍澳一酒店收看大結局。現場所見，她兩邊面頰長滿暗瘡，明顯上粉有難度，近看呈現一撻撻不均勻的粉底。

望老父退休

鍾嘉欣獨自在香港發展事業，今年終於有出頭天。據知她最渴望接父母回港享福， 2011年已買入一個逾千呎單位，預留給父母居住。記者問到她想父母退休一事，嘉欣更一度感觸眼泛淚光，「佢都 59歲（指父親），我想佢早啲退休，所以提議佢返嚟香港做我司機，唔會折磨爹哋。（一提到爹哋你就想喊？）冇呀……冇喊呀！我成日都眼濕濕，好多人都以為我喊……可能我水汪汪啦。」

穀行身材

連續 3年成為詩琳纖體公司代言人的鍾嘉欣，最近頻頻穀胸上陣，有指最近一輯酬勞近百萬。

厚粉遮瘡

鍾嘉欣除了承受壓力，影響情緒之外，內分泌亦失調，長期面部爆瘡，情況一發不可收拾。據知情化妝師表示：「有次同 Linda化妝，佢啲皮膚差到根本唔上粉。問佢係咪壓力大就只係一味眼濕濕咩都唔肯講。我知佢呢排多咗好多 job，但要一個唔鍾意露肉嘅女仔，成日都要穀胸見人，俾我都唔慣啦！」

問到皮膚差不停爆瘡唔上粉時，嘉欣淡然表示：「依家皮膚好番好多喇！呢幾個月都瞓得好少，又做演唱會又要拍《飛虎 II》，又要接出面啲 job，可能因為休息同食嘢唔定時就會變成咁。（有冇睇中醫呀？）有呀，病咗兩個禮拜呀！（你最新一輯廣告好性感喎？）唔係好性感啫，其實我從來冇刻意去避性感，亦都無刻意去性感，只要成件事出嚟係靚同健康就 OK啦！底線？當然唔可以唔着衫啦！（你同伍允龍感情點呀？係咪分咗手？）……唔話你知！」要同時面對工作、家庭、感情，相信嘉欣要學學肥苟試吓學打泰拳去減壓喇！