劉玉翠爬攞命崖喪喊 玩命拍節目《挑戰》
壹週刊 第1203期
王維基揸旗的香港電視遲遲不獲特區政府發牌，無退路的魔童卻大無畏，繼續反轉電視制度，包括玩命節目《挑戰》，由王喜遠赴美國穿越龍捲風、黃宇詩到瓦努瓦圖闖活火山後，本月初，劉玉翠和艾威聯同周俊偉到越南，征服世界上最大、極度危險的天然洞穴韓松洞。
搞壯舉爬攞命崖，四十六歲劉玉翠，驚到失控「放啼」！
要徒手行過峭壁，劉玉翠驚到不理鏡頭影住，喊到豬頭。「終於明白咩叫一山還有一山險，每一日經歷驚處未算驚，頂硬上。」女工作人員不時從旁安慰。
搏到咁，冇理由唔俾牌！（設計對白）
腳軟行唔鬱
出發探險前，劉玉翠、艾威和周俊偉即使接受過基本攀石訓練，但身處大部分只能容納一隻腳位、要徒手抓實峭壁前行的懸崖，弱質纖纖的劉玉翠和年屆五十八的艾威，甚至連壯男周俊偉都差啲捱唔住。
大隊先要穿過泥濘的雨林帶，再攀山涉水，爬過大而亂的石堆才到達韓松洞口，每日路經「唔係路」的路及最少有廿幾樓高的懸崖，劉玉翠一到洞口，已率先崩潰喪喊。「以為用遊繩上落山已經係好辛苦，點知入到洞裡面，環境仲驚險，連遊繩都用唔到，只能雙手抓實石隙，跟住專家一步一驚心咁行，我真係驚到腳軟，忍唔住狂喊！第一日就好想走，唔做！但根本就唔可以返轉頭，我叫自己唔好有放棄念頭，因為一放棄就鬆懈，好易跣腳跌落山崖。」一殼眼淚的劉玉翠說。
辛苦值得，因為劉玉翠是全球首個女性華人，踏足韓松洞室，這次非一般體驗，更令曾患驚恐症的她，克服恐懼情緒。
起步時要經過雨林帶，前路全是大石堆。
克服重重困難，完成任務的她獲英國專家 Howard Limbert讚有勇氣，並指她是全球第一個成功踏足該洞室的女華人。
這個峭壁算是易行的一個，因最難行的只能容納一個腳位，且攝影師要放下器材雙手抓實爬過，故洞內最艱險路程，冇人拍得到。
今趟最大收穫之一，就是跟專家一起發現一個從未踏足的洞內領域，發現三億年的古化石，非常珍貴。
三億年古石
至於身懷大肚腩兼畏高的艾威，驚恐程度亦不遜於驚到喊的劉玉翠，甚至要飲酒壯膽，方能起行。
「去到洞口，衞星電話已經收唔到，直升機去唔到；萬一有乜意外，我哋只能靠當地嚮導孭我哋，用兩日時間行返出去。心理壓力好大，今次真係好體會到咩叫唔好行差踏錯。」艾威說。
沿途都是險象環生的懸崖路，十日九夜無涼沖、在滿布蛇蟲鼠蟻的沙地搭帳幕過夜，吃盡苦頭；但眼淚汗水無白費，探險期間，周俊偉與專家在洞內一個被稱為「未知領域」內發現三億年古化石及白色生物，令台前幕後成為全球首個發現這些古蹟的攝製隊，成為玩命最大回報。
「帶隊嘅英國專家話個『未知領略』係從未有人踏足過，佢哋帶咗啲古化石同未發現過嘅白色昆蟲返英國研究，好開心我哋成為全球首隊華人攝製隊，成功穿越韓松洞。」節目監製鄧婉媚說。
王維基未攞牌，先攞彩！
周俊偉用遊繩從韓松洞的盡頭爬上洞口，成為全球首隊華人攝製隊穿越韓松洞，當然要拉起香港特區旗同 HKTV旗。
三人中，最大膽的周俊偉與兩名專家攀爬這座有六十米高的「方解石」。不能用遊繩，要徒手攀上近乎垂直的山，膽量與氣力驚人。
在洞內行走及生活，其中要忍受洞內濕度高的寒冷，還有是每次開餐，滿布洞穴的燕子會跌雀屎落嚟加料。
容得下 747
香港電視玩命地點韓松洞，是全球最大洞穴，位於越南洞海區，於○九年被英國洞穴探索家 Howard Limbert發現後，越南政府每年只批准兩隊攝製隊，於三至五月旱季，並指定由專家 Howard帶領下，方能踏足這極度危險的洞穴進行探索。
洞穴有七公里長，最闊九十米，高二百米，可容納一架七四七飛機越過。專家 Howard稱，數年來有國家地理頻道、日本 NHK及越南的河內電視台踏足洞穴，但能夠成功穿越，只有國家地理頻道及王維基揸旗的香港電視。
.劉玉翠爬攞命崖喪喊 玩命拍節目《挑戰》
http://veryy8.blogspot.com/2013/03/blog-post_8512.html.劉玉翠爬攞命崖喪喊 玩命拍節目《挑戰》
http://veryy8.blogspot.com/2013/03/blog-post_8512.html
