方中信楊怡打出「兄弟」情
方中信與楊怡兩度合作過，火花卻從戲內伸延到戲外，男仔頭性格的阿怡，不諱言與方中信以「打交」維繫友情，不過拍攝期間適逢阿怡遇上不快事，身為老友的方中信即挺身開解，令伊人感動非常，但他亦揶揄阿怡：「下次嘔唔好倚偎去嗰個位就得啦！」
繼多年前的劇集《建築有情天》後，方中信與楊怡於新劇《仁心解碼Ⅱ》再度碰頭，雖然並非演情侶，只是以醫生及臥底身份一同查案，但甫開工即盡顯默契，被阿怡視為劇集靈魂人物的方中信，大讚他演出淡定，再加上有自己一套演繹方法，令到對手很易進入情緒，認為若然新一輩男藝人學到其優點，定必大有作為。
男仔頭性格的楊怡與方中信拍劇之餘經常玩到癲。
楊怡對於方中信雪中送炭記在心中。
打爛啲道具
談到與型男方中信演對手，很容易會被對方電親，阿怡笑指二人關係如兄弟，拍攝時互相過招，即使事前夾定如何對答，但很多時方中信也會爆肚，考她臨場執生技巧，更謂：「我同佢嘅恩怨喺《建》劇開始，大家一見就打餐飽，仲好激烈添，雖然伍詠薇最勁，但我都三甲以內，大家玩到癲曬，喺片場成日整爛道具，你推我撞，不過全部傷痕喺我哋度，佢一啲事都冇，但都係開心嘅。」
雖然遇上一個貪玩的對手，但阿怡不諱言方中信也有細心一面，透露拍攝期間自己發生不愉快事情，身為老友的他即開解，雖然只是一兩句說話，但其心意阿怡已一一收下，還謂：「當時我情緒又冇乜嘢，返去開工仲同方中信玩，覺得唔係事實唔需要困擾，真係都要放低，對住同事佢哋唔知咁多，只可以精神上支持，冇可能幫手解決問題，不過依家都已經過咗去，唔會太過在意，又唔係咩大不了。」
拎視後值得
面對拍檔大頂高帽笠下，方中信亦照單全收，大讚阿怡演技了得，否則也不能成為視後，貪玩的他又不忘揶揄對方謂：「依家你人生經驗好多，拍戲同感情經驗又豐富咗，唔好都唔拎視後啦！其實拍拖係人生必經階段，只要下次嘔唔好倚偎去嗰個位就得啦！不過都要讚一讚你好有演員道德，拍外景受傷拗柴，拐拐嚇都要撐住開工。」對於老友先取笑後讚賞這招，阿怡哭笑不得不懂招架，場面惹笑！
.方中信楊怡打出「兄弟」情
http://veryy8.blogspot.com/2013/03/blog-post_8439.html.方中信楊怡打出「兄弟」情
http://veryy8.blogspot.com/2013/03/blog-post_8439.html
