金像獎專題：江若琳一舉攻影後
【第32屆香港電影金像獎頒獎禮之女主角篇】剛剛才體會到何謂演戲，江若琳（Elanne）便被人高高舉起捧到金像獎的高峯，下月13日舉行的香港電影金像獎，江若琳首度提名就已問鼎最高榮譽──影後。江若琳認真地說：「我經常同人講《高舉．愛》係我第一部作品，係我第一部知道乜嘢係演戲嘅作品。」
撰文：張俊銘
入行8年，至今拍了十多部電影，Elanne坦言從前確不知演戲是何物，她今日翻看舊作品總覺演得不好：「可能我個人比較空洞，唔知道傷心、痛苦係點，以前冇乜經歷，但好慶幸遇上人生好低潮嘅時間，當時真係見到好多人情冷暖，人生出現好多角色，好嘅角色、唔好嘅角色，呢啲經歷會令你多咗好多體會，成長得好快，對以後拍戲有好大幫助。o依家諗番起，人其實唔使驚失敗，因為低潮同失敗，對你將來係有用。」
■江若琳經常對人說《高舉．愛》是她第一部知道演戲真義的作品。攝影：陳志嵐
增肥20磅
Elanne能有今日，全拜導演邱禮濤及杜汶澤兩位恩人所賜，Elanne指自己是個沒自信的女孩子，自卑令她曾想過放棄這個甚有發揮機會的角色，身邊很多人給予不同意見，甚至大潑冷水，Elanne說：「我當時同導演講想放棄，導演好唔開心，佢話個角色唔係你，我唔會搵第二個去演，我真係好感動，佢願意畀呢個機會我，導演話點解人哋講你信，我講你唔信，令我對導演有一份愧疚、同時好感恩，因為喺拍攝過程，佢幫咗我好多。」
■江若琳為演好舉重選手而增肥20磅，結果一舉就獲提名影後。
■江若琳每日練習舉鐵，更試過失手弄傷背部。
Elanne為演好舉重選手一角增肥20磅，每朝兩小時跟香港專業舉重教練練習舉鐵，返家再跟專業健身教練操肌肉，她說：「我訓練完一個禮拜，已經唔可以好似正常人咁行路，拐嚇拐嚇，姿勢好奇怪。人哋訓練係由細個開始，但我由中途練起，一個月時間訓練，要做到專業選手，當時由舉竹杆開始，趴低起身，兩個鐘不停咁練，跟住就舉餅，5公斤、10公斤、25公斤咁加上去。」
Elanne形容自己曾經身心俱疲，幸得杜汶澤每日的關心及鼓勵，她說：「我好辛苦想休息嗰陣，佢同我講，呢部戲係屬於你嘅，你每一秒都唔可以放棄。」
沖涼都會喊
拍攝期間，Elanne發現自己有抑鬱症狀，她說：「我情緒好壓抑，感覺到一個愛我嘅人，喺生命中消失嗰種痛，沖沖嚇涼都會喊。記得有場戲要拍杜汶澤墓碑，導演話冇劇本，建議我不如對住墓碑講嘢，叫我想同佢講乜嘢就講，嗰一刻我相信杜汶澤係我好愛嘅人，我同佢講你應承陪我去攞金牌、陪我去奧運，點解做唔到？跟住我就係咁喊，呢個shot係一剔過，點知一拍完，我都未問導演做得好唔好，佢就即刻話收工，第二日導演話佢頂唔順，佢叫收工係唔想俾人見到佢喊，原來投入有咁意想不到嘅效果，當時冇覺得自己演緊戲，而係真實生活。」
■江若琳說她有兩位恩人，就是杜汶澤和導演邱禮濤。
■入行8年，拍了十多部戲，江若琳卻坦言以前不知演戲是何物。
《17歲的夏天》劇照
雖然擔心自己有抑鬱，但Elanne同時亦為此感到興奮，她說：「當你所有情感投入先至有呢種感覺，係第一次真正對演戲有體會，以前因為唔識演戲，淨係知道背熟對白，好用力去演，其實當你同角色連成一線時，你對住鏡頭做乜都得，我終於發覺到，因為《高舉．愛》而好鍾意拍戲。」
髮型：James Lee of HAIR
化妝：諺朣小白
服裝：（短裙） NI2H、（長裙） Ted Baker
飾物：Dear Bell
場地提供：Harlan’s（The ONE）
第三十二屆香港電影金像獎 最佳女主角入圍名單
周迅
《大魔術師》
楊千嬅
《春嬌與志明》
鄭秀文
《高海拔之戀II》
江若琳
《高舉．愛》
周迅
《聽風者》
與偶像周迅爭影後
■江若琳說周迅是她的偶像，所以金像獎只要有幸與她合照已經很開心。
江若琳於07年19歲正式入行做歌手，但她在17歲已開始客串電影，曾在不同的鬼片、恐怖片演出，亦演過精神分裂者，Elanne表示，正式演出的電影算是《男兒本色》，亦是她認為過去自己演出最肉酸的一部，Elanne說：「呢部算係我入行後正式第一部戲，但係第一部就同謝霆鋒、餘文樂、吳京及房祖名拍陳木勝導演，個壓力係幾咁大幾咁驚，當時18歲，演一個警察，自己係零經驗，睇番好多不足，極度幼嫩嘅新人。」
■江若琳演出電影《男兒本色》，和房祖名（左一）、謝霆鋒（右二）及吳京合作，壓力當然不小。
合照已開心
今屆金像獎獲提名影後的包括周迅、楊千嬅及鄭秀文，Elanne指周迅是她的偶像，她笑言在金像獎頒獎禮，有幸與周迅影合照已經開心，Elanne指周迅擺在鏡頭前已極有魅力，不需作任何表情，一個眼神已經有戲，影後級完全不用懷疑。楊千嬅是Elanne很尊敬的前輩，她謂不太好意思去評論前輩的演技。Sammi是個厲害的演員，既可搞笑又可演《長恨歌》中深層的角色。對於奪影後Elanne自言沒信心：「冇乜，對一個咁冇自信心嘅女仔，去到有提名女演員已經係收穫。」
.金像獎專題：江若琳一舉攻影後
http://veryy8.blogspot.com/2013/03/blog-post_4136.html.金像獎專題：江若琳一舉攻影後
http://veryy8.blogspot.com/2013/03/blog-post_4136.html
