2013年2月9日星期六

姚子羚野蠻女友

無綫藝人姚子羚（Elaine）入行已十年，予人印象柔弱的她實則十分爽朗健談，說話坦率而不做作，又不介意別人笑她貌似AV女優立花里子而被封為「立花子羚」。坦言想早日成家立室的Elaine，揚言拍拖只要兩年就夠，確實爽快。

不少藝人曾被網民指似日本某某AV女優而被起花名，如歌手鄧麗欣（Stephy）因貌似女優吉澤明步而被稱為「鄧明步」。姚子羚則被指似女優立花里子而有「立花子羚」之稱，她笑言不介意被人這樣稱呼：「咁樣證明我有Fantasy（幻想）嘛！（大笑）！其實我同佢都係做演藝呢行，只係拍嘅戲唔同，『技術要求』亦唔同！（覺唔覺自己個樣似佢？）或者啲人覺得我同佢係感覺似吧，有次喺後台撞到個廚師，佢一見到我就大叫：『嘩，立花啊！』竟然唔係叫我子羚！」她坦言「立花子羚」形象已經進佔其他人的心裏，成為了Icon，她豁達地說：「其實冇乜嘢，都係一個認識我嘅渠道啫！」

拒談是非

提及早前李珊珊在微博上暗指她嘲諷鄧健泓的鋸「扒」之說「涼薄」，Elaine說：「唔提喇！唔想件事更複雜，總之我同Katy（龔嘉欣）知咩事，佢過緊新生活就得啦！」

談到感情生活，Elaine自言目前有追求者：「佢係圈外人，其實我唔Prefer（偏向）同圈中人拍拖，我唔慣喺同一個工作環境中朝見晚見，尤其如果要拍同一套劇會好尷尬！」不過她也指圈中人做男友的好處是容易明白自己的工作，但畢竟藝人的工作時間不定，都是圈外人較好，她說：「夾一個都好過夾兩個吖嘛！」

30出頭的Elaine也坦言有一顆恨嫁的心：「我想快啲結婚生仔。（要咩條件？）其實我淨係想搵個老公可以一齊長久咁生活。（經濟條件？）咁要有，始終要Support個Family嘛！」她自言找老公不會憑感覺：「有時候感覺會影響咗自己揀邊個人，好多人都話老公未必係自己最鍾意，其實悶啲都冇所謂，最緊要住得埋。」

她自爆小時候拍拖相當橫蠻：「就算錯嘅係我都會照發脾氣，要佢氹！依家大個咗雖然唔會咁難頂，但我有時比較挑剔同情緒化，嗰陣最好咪理我同唔好出聲，我好快就會冇事！」

想演喜劇

對於七年之癢，Elaine另有一番看法，她認為拍拖最多拍兩年就夠：「最重要都係認識對方性格，睇嚇配唔配到，開頭拍拖嗰段時間梗係開心o架啦！但拍得五至六年，愛情就變成責任，當對方好似親人咁，我唔想同親人結婚啊！」

Elaine將在新劇《單戀雙城》中飾演歌手，並在事業運下滑時翻兜前男友作曲人，利用他的影響力和才華為自己寫歌穀事業，她說：「呢個角色有啲似自己，但我唔會利用人達到自己嘅目的。」談到近期的無綫劇集好像多了很多強姦戲及露Bra等性感場面，她竟自嘲說：「拍咗都冇人睇，相信同佢哋（指高海寧）反應會唔同囉！（會唔會拍？）如果係劇情需要，健康性感可以接受。」她自言最想演的角色是行政人員和「另類」角色：「我想做嚇黐線婆、喜劇，試嚇Over Acting！」

後記：性格爽直從不掩飾

Elaine給人感覺十分硬朗，是個性情中人。自言是個「男仔頭」的她，性格爽直，從不掩飾，所以朋友常諷刺她：「你到底有乜好？吸引人鍾意你啊？」Elaine往往會答：「鍾意我嘅人會好鍾意，覺得我好好玩、好Sweet；唔鍾意我都好，我都唔會刻意討好佢。」果然有性格！

姚子羚被指似AV女優立花里子，因而有「立花子羚」之稱。

Elaine自爆曾經是野蠻女友，就算自己錯了也會照發脾氣。