馬國明冧岑麗香BBQ撻著
貴為圈中筍盤的男神馬國明，異性緣相當旺盛，更深得一班圈中花旦歡心，先後跟胡定欣、朱晨麗及唐詩詠傳出緋聞，個個爭住為馬國明「封盤」，不過他似乎不為所動，昨日反而自爆在新年期間與「宅男女神」岑麗香BBQ，而香香則大讚馬國明「好Nice好好人」，令另一緋聞女友朱晨麗非常冇癮︰「呢啲嘢問番佢哋。」
圈中不少筍盤早已被Mark實，未「封盤」的39歲男神馬國明，感情生活自然受外界關注，不少女藝人對他虎視眈眈，早前他與朱晨麗的緋聞傳得熱烘烘，近日又與唐詩詠傳緋聞，不過馬國明昨日自爆與去年上位的「宅男女神」岑麗香（香香）有新緋聞。馬國明昨日出席《2013國際中華小姐競選》活動，原本只被追問與唐詩詠的緋聞，但他卻口多多自爆「之前同香香去聚會BBQ」，關係似乎不簡單，他說︰「尋日我都覺得奇怪，喺化妝間又有記者問我覺得香香點，好唔好，大家對我感情生活比我阿媽仲關心，其實我知佢問乜，因為之前同香香、工作人員去導演度聚會。」問到覺得香香為人如何？他說︰「係問我邊個女仔，我係答好好o架啦！」
「預咗會有緋聞」
成為新緋聞女友的香香昨日接受電話訪問，提到馬國明指他倆人早前BBQ，她笑說︰「唔係情人節去，係新年期間成班去，而且我哋唔係一齊去。」對於因此傳出緋聞，她甜笑說︰「哈哈！唔係啩！依家到我喇！講真，我哋冇乜嘢，入行預咗會有緋聞。」雖然否認拍拖，但其後卻大讚馬國明︰「我覺得佢好Nice，好好人，不過冇諗有冇得發展，聽到好多女仔講佢係筍盤，但我喺外國返嚟，唔係咁清楚啲人背景。」
曾跟馬國明傳緋聞的朱晨麗，昨日在電話中被問到馬國明與香香的緋聞，她語帶醋意地說︰「呢啲嘢問番佢哋，之前佢話想有多啲緋聞，依家多咗，恭喜佢成功咗。」問到是否呷醋？她說︰「我點會呷醋，做嘢都冇時間。」她強調與馬國明是朋友，雖然已很久沒有見面，但卻大讚對方︰「同佢一段時間冇見，但過年都有傳訊息恭賀佢。其實佢為人孝順又好人，幾欣賞佢，佢係筍盤嘛！但發展呢啲隨緣啦！依家專注工作。」
「個個都有機會」
至於昨日有報道指他與唐詩詠秘撻3個月及拍到共膳？馬國明否認︰「佢有打畀我問『乜我哋拍咗拖3個月？』真係搞笑，之前都有報道過，只係成班人去林子善度食飯。」他表示當對方是妹妹，但問二人有否發展機會？他想一想才說︰「佢性格好，但唔知佢嗰邊（崔建邦）點，其實大家都唔會問對方感情。（單身會追佢？）唔知，做朋友嘅要求唔同女朋友。」而唐詩詠則於電話中直言「個個都有機會」追求︰「佢幾好人，大家關係幾好，但同佢拍多幾套劇先，呢啲嘢隨緣！」
岑麗香
年齡：28歲（1984年11月17日）
身高：1米64
三圍：33C、23、33.5
代表作：2010年國際中華小姐冠軍，憑劇集《巴不得媽媽……》獲封「宅男女神」。
朱晨麗
年齡：25歲（1987年12月2日）
身高：1米68
三圍：34C、23、34.5
代表作：2011年香港小姐冠軍，有「翻版陳法拉」之稱，因拍劇集《名媛望族》與馬國明傳緋聞。
拍檔撻著譜戀曲
圈中有不少姻緣都是因拍劇或電影促成，同劇演員日對夜對而日久生情，關係突飛猛進，繼而成為情侶。
楊冪劉愷威
內地女星楊冪與港星劉愷威前年5月因拍攝《如意》墮入愛河，去年年初更在微博大方承認戀情，而劉愷威亦曾送贈值3,000萬港元的香港豪宅給楊冪。
陳豪陳茵媺
「無綫筍盤」陳豪兩年前因與陳茵媺合作劇集《心戰》而撻著，前年11月更被本報踢爆二人在深井半同居，去年11月更被網友踢爆蜜遊法國。
羅仲謙楊怡
無綫花旦楊怡在2011年拍攝劇集《On Call 36小時》而跟羅仲謙譜出戀曲，同年11月二人被拍到在大埔BBQ，而去年楊怡奪視後一刻，更發現謙仔眼濕濕。
林子善力證「馬唐」不過電
馬國明日前被拍到與唐詩詠、林子善等人食飯慶祝生日而被傳撻著唐詩詠三個月，當晚有份和馬國明食飯慶生的林子善卻坦言二人「唔過電」，沒有可能拍拖！昨晚子善接受電話訪問時說：「報道亂作，佢哋冇可能喺埋一齊！（撮合佢哋？）唔會！我識咗佢哋咁耐，知道佢哋唔係對方杯茶，都唔過電！佢哋依家都係單身。（唐詩詠早前傳與崔建邦翻撻？）唔係！我嗰晚問過詩詠，佢否認咗。」
夫妻宮相沖結婚機會微
人人都說馬國明是城中筍盤，事業財富兩得意，但不知其姻緣運是否亦一帆風順。堪輿學家陳子才表示，肖虎的馬國明在2012至2013年夫妻宮相合，而結婚年則在2018至2019年：「佢舊年有機會遇到目標，但因為呢段情似是而非而令佢苦惱到今年。而屬兔嘅朱晨麗命格則帶有鹹池桃花，意指會有不少霧水情緣，容易令別人產生好感，但要到30歲後先有機會搵到結婚或固定對象。岑麗香嘅夫妻宮同馬國明相沖，所以兩個一齊嘅可能性甚低。」不知朱晨麗是否就是馬國明去年所遇到的對象，而兩人的結婚年期亦不謀而合，看來二人戀情的確「有機」！
.馬國明冧岑麗香BBQ撻着
http://veryy8.blogspot.com/2013/02/bbq.html.馬國明冧岑麗香BBQ撻着
http://veryy8.blogspot.com/2013/02/bbq.html
