面對面
成大事者不與眾謀 高志森
2013年01月09日透過亞視約高志森做訪問，招待殷勤的亞視公關特別提醒記者，要在文內提提高志森每週在亞視播出的節目《高志森微博》。
我實話實說，《高志森微博》不會不提、不能不提，因為它破曬香港收視紀錄，幾乎個個星期都錄得零收視。
一說零收視，高志森的回應字字鏗鏘：「成大事者不與眾謀！」
「大家信無綫嘅數據，但亞視話我聽有一百萬觀眾，點解我唔跟大家信零收視？成大事者不與眾謀！如果做創意工作嘅人下下跟大眾，你估王家衞套《阿飛正傳》、李安套《少年 Pi》拍之前搞全民公投，仲拍唔拍得成？」
17歲入行做編劇、今年 54歲的高志森事業起源於亞視；二十多年後又回流亞視主持節目、培訓藝員，一方面，我對高先生的話不以為然：典型的亞視思維，果然是亞視人。
另一方面，我也猶豫，亞視固然騎呢，難道無綫就好看得多嗎？
重點是，市場上有本錢又有分量能理直氣壯說出「成大事者不與眾謀」的人物並不多，作為《家有囍事》導演、又創造了今年再次重演的《我和春天有個約會》神話，高志森，絕對是一個。
談王征：「執咗佢？睇波唔好要球證啦，笨！」
高志森現時為亞視主持兩個節目，逢週六晚間播出的《高志森微博》，以及剛剛推出的《與星光同行》，前者講文化藝術；後者推薦經典粵語片。高志森說，《高志森微博》剛做滿一年，剛剛續了新約添食，做得上癮，因為自由自在，一整年下來，節目內容、嘉賓陣容，亞視上下無人過問。我弱弱地問道：「會唔會係亞視自己都冇人睇過呀？」高導演哈哈大笑：「點會？零收視個調查係無綫出錢，無綫講乜都得㗎啦！至少我嘅網站、我嘅圈子話我知，大家有睇。」
原籍廣東中山、在坪石邨出世長大、父親行船、母親駐家車衣，高志森說， 17歲中學畢業連會考還沒考過，亞視前身麗的電視就請他入職做編劇，同亞視絕對不會講錢：「當年坪石邨一個月屋租二百，出邊 office messenger月薪八百，亞視出千二蚊請我，已經夠我交租、畀家用，阿媽唔使再車衫，我喺呢行嘅起步係靠亞視，做咩要同亞視講錢？我喺出邊成日幫商業機構上堂、講 talk收得好貴嚇，但今次主講亞視培訓班，淨係攞車馬費。」
講師包括高志森、宮雪花的亞視藝員再培訓課程，最近鬧出炒人風波；而想出強制再培訓課程的王征，過去一年反發牌、大鬧政總、言行政策樣樣騎呢，高志森都話要撐：「我唔講炒人同執行手法，但係王征呢個『亞洲 CNN』嘅概念我 buy喎！做創意，離唔開三樣嘢， the best、 the first或者 the different。亞洲 CNN嘅概念，就算唔係最好，起碼係 the different or the first。香港有啲現象好奇怪，係唔係鍾意都嘈一餐，最興就係好刻薄咁去批評。舉個例子，當你睇場球賽，唔鍾意可以掟爛部電視、或者噓到冧凳，點噓點批評都好，邊個係吹哨子嗰個先？真插水假插水、馬勒當拿係手撞波定波撞人呢？咁鍾意插，但實質個電視係邊個 run先。話要執個台喎……不如以後睇波唔要球證囉，判唔判 12碼全球投票囉！我哋信個球證，係因為始終係個球證離個波最近。亞視係王征嘅，王征鍾意點 run就點 run，我哋呢行，唔可以搞公投。 90年我拍咗套戲，諗住改名叫《男歡女愛》，全公司上上下下十幾個員工、逐個敲門入嚟：高生你真係用呢個戲名呀？卒之我扭一扭轉咗名叫《偷情先生》。結果，嗰年最賣座電影係咩，你哋知唔知？《 90男歡女愛》呀！我頂佢個肺。由嗰一刻開始，我知啦，成大事者不與眾謀。」
說電影：「愈計數，死得愈快！」
全靠亞視扶一把， 17歲做編劇，高志森入行早，成名也早， 25歲已經開始做電影導演， 29歲第一次導演賀歲片，就創造了接下來一集又一集的《富貴逼人》系列；高志森舉出自己兩部作品，香港電影史上十大票房之一的《家有囍事》，和投資 200萬票房 2,000萬的《我和春天有個約會》為例，再次例證成大事者不與眾謀的道理：「 92年拍《家有囍事》，黃百鳴第一句就明確指示：『都係一家人、三兄弟溝女、大團圓結局，個故事同《八星報喜》一模一樣，你跟足五年前（ 87年）杜琪峯咁拍就得啦！』聽呢番說話，嬲到我全身起雞皮。我一個做創意工作嘅人，你叫我跟足第二個導演拍法？同你死過！我要反面多謝黃百鳴，全靠佢呢句，我諗盡辦法跟住個 story line去拍唔同嘅嘢，結果喺澳洲睇咗場《愛登士家庭》畀我啟示，拍咗一套將所有普通不過盡量推至最極端最荒謬嘅《家有囍事》出嚟，毛舜筠尋仇可以揸架電單車入屋，周星馳傻咗因為俾個鵪鶉蛋擊中腦囟。黃百鳴場場戲都話太癲唔得，係張國榮同毛毛次次都調虎離山叫走佢，我至拍得成之嘛！ 94年拍《我和春天有個約會》，冇一個投資者肯畀錢我開。女性為主、歌舞劇、懷舊、卡士弱、文藝片，仲有片名過長，呢套戲集齊電影所有必死元素，我按咗層樓問銀行借三百萬，用二百五十萬拍成套戲，結果收二千萬票房。掉轉頭我樣樣計盡嘅戲，死得最快。從此我學識一個教訓，唔好計啦，問嚇自己有冇火先啦，有道火，就乜都唔理，拍咗先算！」
90年代中，電影火被老翻和合資片澆熄，對舞台劇的火因為《我和春天有個約會》而燃起，高志森十多年專心搞舞台劇：「我啲錢擺曬落去舞台劇，所以我話冇必要同焦媛結婚，因為我冇身家分，我淨係儲劇、唔儲錢嘅！」直到今年，落實會與師傅黃百鳴合拍地道港產片：「霑叔話，做創意，就係將元素重新組合。元素可以有限，但係組合方式可以無限。我每個星期堅持睇兩部電影、籌備緊一個電影五年、已經同我心目中嘅演員傾緊，我點會對電影冇火？點會化啫？我唔會化㗎！」
論政治：「無知，才會舉起米字旗！」
九十年代停拍電影，高志森說，一不想益賊、二不願拍合資片：「一合資就要講國語、請內地演員、要去上海北京拍外景，又要審批；一合資就潮流興就大家拍埋同一樣，好似有一排個個導演都拍盔甲片（古裝戰爭片）一樣，搞到我有盔甲恐懼症！ Sorry，我唔想講國語、我唔識拍盔甲片，咪唔拍囉！」電影圈走向合資潮流，因為香港得七百萬人口，大中華卻講緊億億聲的觀眾和票房，看似純廣東話港產片死硬，高志森卻說未必：「我同香港好多電影界人士同政府商討幾年，爭取緊每年無限額入口廣東話電影入廣東省，今年終於有機會實行，所以我至話今年係時候拍番電影。」
講到政府，又來到是非話題，近年高志森因為撐高鐵、撐特首成為市民眼中「建制派」，早前國教風波批評黃之鋒做 show、冇家教再激民憤，訪問前一天正是元旦倒梁遊行，高志森第一句就批評：「嗰啲攞住米字旗出嚟遊行嘅，係無知啫……我真係唔覺得以前嘅香港好啲。以前你有冇可能知港督有冇僭建？英國統治時代，仲唔民主，港督係上邊話邊個就邊個，幾時係香港人選出嚟？至於話洗腦，話洗腦嗰個，可能喺度洗緊人腦呢？可能洗人腦嗰個，已經被人洗咗腦呢？根本係煽動！香港就係有一班咁嘅人，心甘情願被煽動，坐喺到等你嚟煽動。我講嘅嘢，你全部可以照寫，我唔怕。我同你意見唔同，你就話我收咗共產黨好處、係狗，又話要罷睇我啲戲。我啲戲都有講六四、有諷刺李鵬，我啲舞台劇，喺大陸都係禁劇。我唔覺得自己媚共，相反話反共班人，又做咗啲咩先？口講話民主，但係用罷睇去箝制他人自由出聲，根本就係魂不附體，講一套做一套。文化藝術，幾時開始同政治掛鈎呢？我講嘢取悅觀眾，票房就唔會仆啦咩？我套戲係得嘅，自然有目標觀眾，怕咩你哋唔睇？人係立體㗎，唔係非黑即白、非是即非啦！淨係得黑白，冇嘢睇到，水墨畫遇水都會變灰，𠵱家嗰班批評我嘅人，都係黑白論啫。」
森之愛情
九十年代，是高志森的人生轉捩點，對電影死心，帶著老婆與一對女兒移民夏威夷；《我和春天有個約會》首演翌日坐上飛往夏威夷的飛機，該劇卻大收特收欲罷不能；原定在夏威夷投個電視頻道專播華語片，反而回流投身舞台劇，結果婚姻破裂離婚收場； 98年離婚， 99年戀上年輕 18年的舞台劇演員焦媛，高志森說焦媛真正用生命在演戲，兩人相戀 13年感情不變，不結婚是因為，一旦掛著高太的身份，沒法再接全裸戲，才是焦媛藝術生涯的絆腳石。
對於愛情和人生的體會，高志森說，和電影一樣，冇得計數：「夏威夷嘅中國人好孤寒，我估我留喺嗰度都開唔到個華語頻道，𠵱家只會係一個喺沙灘踢住拖嘅阿伯。所有嘢冇得計、冇得 plan， plan唯一意義，就係若幹年後攞出嚟對比，到底有幾多嘢偏離咗航道之嘛！」
.[FACE]成大事者不與眾謀 高志森
http://veryy8.blogspot.com/2013/01/face_7955.html.[FACE]成大事者不與眾謀 高志森
http://veryy8.blogspot.com/2013/01/face_7955.html
