真面目
叔叔抱抱 王征帶隊唱 K私玩 ATV小白臉任錫
2013年01月02日亞視反發牌愈搞愈出醜，除了喺政總門外搞集會被市民鬧爆外，最近無厘頭強迫性要藝員參加所謂「演藝訓練計劃」，老細王征竟因不滿出席率低，於前週冬至日（上月 21日）殺雞儆猴，炒咗缺席的四名藝員包括戚黛黛等人，再遭全城圍插冇人情味。
個台冇人睇，藝員已經夠慘，最慘係班藝員除被揭要做知客應酬王征好友外，更有電視台員工爆料，原來王征曾試過私人吹雞搞卡拉 OK私 P，其間更有疑似星光幫成員黃文韜在場慘遭狼吻。喺亞視撈，真係要 EQ超高先頂得住。
早前盛傳亞視老細王征將亞視變私人俱樂部，要求旗下亞姐及藝人載歌載舞陪客戶食飯劈酒，又要一班亞洲小姐及先生，做埋迎賓招呼王征的內地好友，連 PR都要撈埋。
先陪飯局
王征當日先吹雞叫曬一班亞姐及星光幫，於九龍香格里拉陪客食飯，而據知星光一幫成員譚杏藍（右圖）亦為陪食成員之一，但她卻失憶說：「係咩？冇、冇啲咁嘅事。」
再去唱 K
之後王征再拉隊到 K場開私 P，其間有人飲大兩杯，竟走出舞池位狼吻黃文韜。
搞私人派對
但據知亞視唔只要做 PR，有前亞視員工向本刊爆料，原來兩年前王征初入主亞視時，曾搞私人卡拉 OK派對。
該前亞視員工稱：「大約兩年前，王征叫曬當年班星光幫同亞姐，一齊去九龍香格里拉酒店陪佢啲內地富豪朋友食飯，我哋要先經過廚房先再入到間 VIP房，地點好神秘，之後王征意猶未盡，臨時即場吹雞叫曬成班人去卡拉 OK，大家梗係和應啦，點知去到卡拉 OK，個個飲大兩杯後，有人忽然箍住當年個星光幫成員 黃文韜咀，大家都扮睇唔到。」
認同王征飯局
於 K局中遭人狼吻任錫，黃文韜本週一（ 31日）回應時就一度口窒窒說：「兩年前嘅嘢唔記得啦，太耐啦，我哋（同王征）耐唔耐都會出去，我哋好多呢啲咁嘅 party，因為太多所以唔記得啦，（你俾人任錫喎？）冇……應該冇……我哋星光幫嚟㗎嘛，去唱 K好正常啫！」說畢便以工作為由掛線！
對於做亞視藝員特別多應酬，亞視星光幫成員陳蕾亦承認：「係經常要應酬啲客，一般都喺亞視個廠搞，我聽過大約有 10次，我哋要一早 standby，都係上台唱嚇歌啫，有試過飛去北京做騷，但公司都畀番機票酒店錢同計番騷錢，不過就冇聽過有人被抽水！」亞視騎呢嘢真係好睇過佢啲零收視節目多多聲！
被炒 4小強追糧
王征入主亞視後，騎呢改革一大堆，最近更因開辦「演藝訓練計劃」俾亞視藝員而引起軒然大波。於前週冬至日（上月 21日），王征怒炒包括戚黛黛等 4名藝員，封口兩週後， 4人於本週一（上月 31日）下午接受 nowTV訪問，直稱被炒後亞視仍未出糧，被炒之一的張啟樂更稱不排除會採取法律行動追糧，結果張啟樂即晚就收到話出咗支票，叫佢隨時可以返公司攞，亞視忽然好有效率。
至於被外界插爆無聊兼洗腦的所謂「演藝訓練計劃」仍如常進行，上週五（ 12月 28日），亞視邀請高志森講自己經歷及教授當藝員心得，又搵宮雪花上堂講選美秘史，最騎呢係搵鮮魚行學校校長梁紀昌講藝人責任，同學仔雖然坐定定聽，但其實大部分都釣緊魚，認真嘥時間！
上週五（上月 28日），高志森到亞視總部演講，三大亞視高層親自上前道謝，查實當日上堂亞視全程錄播，更安排於 29日晚上播出，成班高層純粹做騷。
前亞視藝員左起車車（張紫櫻）、陳綺雯、張啟樂（ Ben）及戚黛黛等人昨日到 now出席錄影， 4人無奈大講被炒原因，到同晚忽然又收到亞視通知有票收，而在亞視做足 15年的張啟樂更說：「我遲啲先上去攞，睇嚇個數目啱唔啱，如果數目唔合理先算！」
宮雪花盲撐
下午換 64歲前亞姐宮雪花上堂，花姐大講當年選美事，花姐為亞視出心出力，仲擦曬鞋說：「我覺得大家應該同心合力為公司，唔好搞小圈子分化公司。」
聽到眼瞓
由於課程由上午 10時開始，直落到下午 5點，唔少藝員雖有出席但聽到一半都忍唔住釣魚，就算係有儀態嘅亞姐姚佳雯（左二）最終都頂唔順。
月薪$7,000做埋 PR
王征將亞視變做私人開 party嘅場地，把亞姐、星光幫收為己用，已經唔係新鮮事。據知一般亞視藝員薪酬由 7千蚊起跳，以星光幫為例，月薪 7千已包一年 84個騷，要爆騷後先再有花紅分。生活艱難，班藝員仔邊敢反抗老細。
陳霽平硬撐男友
亞視反發牌搞到滿城風雨，前員工個個插，而執行董事盛品儒近期又於反發牌記招中公開誤講粗口，成為網友笑柄，但幸好仍有簽約王維基的緋聞女友陳霽平力撐：「佢冇同我呻過亞視嘅嘢，淨係話𠵱家面對緊一個好大嘅挑戰，我當然支持佢啦！」支持又唔去埋 ATV？
.[FACE]叔叔抱抱 王征帶隊唱 K私玩 ATV小白臉任錫
http://veryy8.blogspot.com/2013/01/face-k-atv.html.[FACE]叔叔抱抱 王征帶隊唱 K私玩 ATV小白臉任錫
http://veryy8.blogspot.com/2013/01/face-k-atv.html
