真面目
王子駕到 男神 6日親民騷 阮馬素啃老麥𥄫減價波鞋
2013年01月02日被港女封為男神的德國體操界型男兼倫敦奧運雙料銀牌得主阮馬素（ Marcel Nguyen），上週四（ 27日）殺入香港展開一連六日旋風訪港之旅。由抵港當天至舉行擊掌會，一直被大群港女包抄，名不虛傳。
今次訪港之旅，阮馬素除了出席倒數及其他宣傳活動，仲帶埋女朋友同家人一齊遊覽香港。六日五夜，男神全程表現親民，既冇助手保鑣跟身，亦唔介意食老麥，更喪𥄫減價波鞋。隨和又靚仔，抵佢咁受歡迎嘅。
今年 25歲，於倫敦奧運連摘男子全能體操及雙槓銀牌的德國體操運動員阮馬素（ Marcel Nguyen），上週四帶埋化妝師女友 Alexa、家姐及阿媽一齊旋風襲港。由上週五至本週一， Marcel曾去過尖沙咀帝國中心出席擊掌會，又到順利邨體育館跟香港體操隊員作交流，除夕夜更在尖東用湯馬斯全旋同香港市民轉住倒數迎接 2013。
有求必應
Marcel雖然只得 5呎 5吋唔算高大，但勝在靚仔，尤其一雙殺死人嘅電眼電到班港女著曬迷。加上 Marcel來港後每逢有 fans叫佢簽名，甚至合照都永冇 say no兼笑笑口，極度親民。
唔好以為 Marcel是萬人迷兼且是倫奧體操獎牌得主一定好駕勢。 Marcel連日來除出席指定活動外，更要接受超過 20間傳媒輪住訪問，所以留港期間，冇乜時間四圍遊覽，更冇乜機會 shopping食好嘢。
週日（ 30日）下午， Marcel去完順利邨體育館同班香港體操隊員交流，再趕返尖東接受傳媒訪問後，傍晚便同工作人員一齊截的士返去下榻的尖沙咀皇家太平洋酒店稍作休息。
男神轉住倒數
於去年倫敦奧運摘下兩面銀牌嘅阮馬素，由 12月 28日開始訪港， 6日內佢會出席技術示範，舉行體操學堂，更會於 31號晚，於尖東以「湯馬斯全旋」同觀眾轉住倒數！
今次邀請阮馬素來港的信和中心發言人話：「每年我哋都會請啲好特別嘅人物嚟參加我哋嘅商場活動，今年請阮馬素，因為佢又靚仔又夠受歡迎，同埋得佢一個可以玩住湯馬斯全旋倒數。」至於酬勞就唔方便透露。
齋睇唔買
連日來並沒有時間同女友 Alexa拍拖的 Marcel，當晚終於抽出時間，帶埋女友 Alexa、家姐 Denise同阿媽 Hedy一齊落去酒店樓下的中港城 shopping（竟然唔去隔籬同胞最愛名店林立海港城！），其間 Marcel同女友先去馬拉松體育用品店睇波鞋，雖然二人曾睇中唔少半價波鞋，但左計右計最後都係忍手唔買。之後 2人經過商場內的麥當勞會合阿媽及家姐一齊醫肚，平民成咁，唔怪得喺老麥內冇人認得出呢位世界級男神就喺左近啦！
阮馬素爆比賽禁慾傳聞
阮馬素雖然代表德國出戰倫奧，但佢 嘅父親原來係越南人，所以佢有個越南姓氏「 Nguyen」（阮）。本週一佢接受本刊訪問，除 咗爆自己原來從未去過越南，仲話打算 30歲就同現任女友結婚，港女要死心喇！
F：《 FACE》 M：阮馬素
F：你父親係越南人，你有冇喺越南生活過？感覺如何？
M：我從來冇去過。因為我絕大部分喺越南嘅親戚都已經移居德國，所以冇乜機會去。加上做咗運動員後又超忙，有機會我都想去。
F：你咁靚仔，有冇諗過做明星？
M：從來都冇。我安於現狀，想做好一個體操選手。
F：你同你現任女友都拍 咗拖兩年，有無諗過結婚？佢係唔係你心目中「 The One」？
M：都係 嘅。不過現階段冇諗過結婚住，因為我仲想專心比賽，參加下一屆（ 2016年） 嘅巴西奧運會。我想 30歲先結婚。
F：你身高只得 5呎 5吋，身高比較輸蝕。而且傳聞你女友比你仲高 2cm，你介意嗎？
M：唔介意，身高係天生 嘅。而且我女友其實係矮過我。
F：有傳聞話奧運選手 喺比賽期間為免影響比賽表現係要禁慾，係咪真？你自己亦有無禁慾？
M：（大笑）當然唔係真！（咁你自己 喺比賽期間有無性生活？）我成日練習，加上 啲隊友都係男人，點有性生活呀？哈哈！
F：你平日 嘅飲食習慣係點？我 哋發現你去食麥當勞喎！
M：我 喺比賽期間係唔食澱粉質 嘅，只會食沙律同雞肉。至於唔使比賽我就乜都可以食。好似𠵱家咁，我係放緊假，當然乜都可以食啦。
.[FACE]王子駕到 男神 6日親民騷 阮馬素啃老麥𥄫減價波鞋
http://veryy8.blogspot.com/2013/01/face-6.html.[FACE]王子駕到 男神 6日親民騷 阮馬素啃老麥𥄫減價波鞋
http://veryy8.blogspot.com/2013/01/face-6.html
