李寶安挑「基」批死收檔 無綫10億打造小紅館

雄霸電視行業45年的無綫電視，對政府擬多發三個免費電視牌照「爭食」，不免被觸動神經，集團總經理李寶安嚴陣對待這場電視大戰，並指無綫資金充裕，有逾35億銀彈打仗。面對高調求發牌的「香港電視」王維基的衝擊，會計出身兼在行內出名數口精的李寶安，以3大論點寸爆他形容為「街口王」的王維基，指他是業內初哥又唔識計數，隨時「生存唔到」收檔！

香港政府早於1998年公布開放免費電視市場政策，2009年底，三間機構香港電視（城市電訊）、now（電訊盈科）和奇妙電視（有線）申請牌照，當局於2011年原則上同意發牌，政府希望有更多競爭，但政策依舊不變，藉此保障電視台在一個「合適競爭」環境而非「極端競爭」的惡性環境。

「街口王」不忿被質疑專業而多次出言挑釁，李寶安亦按捺不住，除列出3大論點斥對方吹噓製作成本根本沒有38億元外，更寸爆他屬「初哥」，對劇集敏感題材不能賣埠此等無知，以及新一年節目巡禮同樣欠創意卻批評無綫而犯上同一錯誤。

李寶安說：「佢話每年拍600小時，每集100萬，每年即係6億，未計其他節目，新聞、綜藝、燈油火蠟同人工，加埋隨時過10億，計3年數就30億，起廠（香港電視位於將軍澳的多媒體製作中心）8億，即係38億，行內都知頭3年冇乜收入，因為要時間建立觀眾基礎，再者要確立收視調查，令廣告商確信收視結果，同埋特別收入來自海外賣埠劇集同發行；根據報道出嚟嘅未出街片段及內容，好多都賣唔到埠，例如：男咀男、女咀女，甩人頭……我哋做咗賣片咁耐，唔使調查都知賣唔到、批唔到，甚至唔准出口，禁o架嘛！連新加坡、馬來西亞、內地都禁，可能佢未清楚發行呢個環境，發行方面十個有十個都話做唔到，所以未來3年冇冇乜可能賺到錢，就算你話拍歌舞片，都有文化差異，唔係咁容易賣得到，如是者3年投資38億，頭幾年收入少，而佢公司數埋都冇38億，所以申請者本身都有問題！」

（點擊小圖查看大圖）

無綫穩坐龍頭 10億打造小紅館

無綫為迎接2017年50周年台慶大典，再有新投資！據李寶安透露，無綫將斥資逾10億元在將軍澳電視城17廠後的一幅空地，興建佔地逾1萬平方米的Grand Production Theatre「小紅館」，今年年初開始招標，預計2017年初落成。這座「小紅館」，意味著無綫將有不少大型演藝計劃在此地進行，猶如目前紅館日日有演唱會般熱鬧。

新廠面積6,000平方米，可容納2,000名觀眾，比舊一廠的700名觀眾座位超出近3倍，而廠外會有4,500平方米空地作戶外表演，規劃將與現有的古裝街連接，工程龐大。

無綫今次作出重大投資配合時代步伐，有新廠用，有更大地方工作，藝員及員工有更大發揮空間。李寶安稱主要因轉了新股東，加上經營環境穩定，有條件做創建配合演藝發展。硬件更新，軟件一樣有微調，當年無綫「刻薄絕橋」一年一騷，令不少藝人叫苦，最新得知這項「一騷制」已剔除。李寶安解釋：「上一個朝代啦！有啲文化係會變，大氣候變嘛！『街口王』係小氣候變化，不足以影響到我哋思維同運作，只要公司有能力、有空間就一定會對員工好，會將員工、觀眾、公司所有嘢平衡，唔會將所有利益推曬去投資者度，同事都要有合理嘅回報，如果公司有能力，甚至會將呢個回報加大、提升！」

.李寶安挑「基」批死收檔 無綫10億打造小紅館
http://veryy8.blogspot.com/2013/01/10.html.李寶安挑「基」批死收檔 無綫10億打造小紅館
http://veryy8.blogspot.com/2013/01/10.html