前《學警》編審朱鏡祺 數TVB抄劇 抄到一模一樣

FACE週刊 第292期

王維基的香港電視（ HKTV）誓要大搞，除咗撬走大班小生花旦甘草外，一班幕後精英流失先令無綫最頭痕。

人稱朱 sir的前無綫編審朱鏡祺，編過《學警狙擊》捧紅過 Laughing哥謝天華。朱 sir在無綫服務咁多年，現任 HKTV創作部總監，他對舊東家固然有感情，但更是又愛又恨。無綫一台獨大，朱鏡祺話好多人已經厭倦咗睇經常「全場照抄」的電視劇，正值無綫全民選視帝視後的頒獎禮過後，朱 sir說：「佢哋係時候醒啦！」

朱鏡祺在無綫工作超過 20年，現轉投香港電視，頭炮係佢最拿手的警匪片《警界線》，朱說：「新公司創作空間好大，喺無綫冇可能做到！」

我同無綫好有感情。離開嗰陣我都好唔捨得，有真情亦有流眼淚，同外事部講咗好多真心話。佢哋有時都會有人情味嘅，不過係要有事發生，例如有人想走先警覺到。

o依家已經唔係睇無綫劇送飯嘅年代，好多人厭倦咗睇電視劇，只係因為冇得揀所以都要睇，佢哋係時候醒啦！

我哋創作雖然話有自由，但係好多題材例如同性戀、宗教、政治都唔可以拍，甚至社工同低下階層都唔可以涉及，因為好易惹投訴，亦唔可以講啲敏感話題。

香港電視吸納唔少無綫演員和幕後工作人員。朱鏡祺話現在創作題材比之前更大膽，同性戀都可以拍。

朱 sir話當年《學警狙擊》裏原本冇 Laughing哥一角，估唔到佢做配角可以搶過主角，之後仲成為社會熱話。

我試過提出拍一啲同性戀嘅劇種，上面即刻話：「你呢啲唔係電視劇嚟，呢個冇得諗㗎喎！」之後開林峯套《不速之約》，高層又話唔好成套劇都講魔鬼，咁樣會唔收得！

另外抄劇都係一個問題，近年嗰套《談情說案》開始真係嚴重咗，入面 3個角色都同日劇《神探伽俐略》一模一樣。每年製作部總監（曾勵珍及梁家樹）都會 pass落嚟叫我哋盡量安排角色畀呢班演員。總監話要某演員做某角色，我哋明知角色唔啱佢，但都要 tune啱角色畀佢演。好似我創造 Laughing呢個角色，開頭 TVB都話冇理由配角搶過主角喎，係我堅持由謝天華演呢個角色，開頭佢哋都唔 like㗎！

採訪、撰文：張佩姍

攝影：周凱瑩

.前《學警》編審朱鏡祺 數TVB抄劇 抄到一模一樣
http://veryy8.blogspot.com/2012/12/tvb_26.html.前《學警》編審朱鏡祺 數TVB抄劇 抄到一模一樣
http://veryy8.blogspot.com/2012/12/tvb_26.html