2012年12月26日星期三

Chok警出更森美

FACE週刊第292期

39歲的商台台柱森美首處男演出的電視劇《法網狙擊》上週開播，於是，我和攝影師為他設計了懷舊風味的兵捉賊相片，作為這次專訪的主題概念。

要是別的 DJ，妄想他能一相分飾兩角，當然有難度。不過，森美不是一般的 DJ。 20歲加入商台、 25歲已經獨當一面成為最受歡迎電台主持，森美早就不只 DJ一個身份：編劇、作家、 BoyBand主唱、舞台劇、棟篤笑、電影男主角、電視主持，自編自導自演愛情劇《森之愛情》；還有這次減肥十磅在電視劇裏演督察，拍出浴戲騷腹肌再同女主角激吻……森美，堪稱香港播音史上最 chok的 DJ。

葵盛西邨出世長大，現在家住九龍塘豪宅，老婆揸 Benz、兒子讀喇沙，我問森美，可以從葵盛西邨跳進九龍塘、瓣瓣掂撈得風生水起，父母一定很引以為榮吧？

森美回憶起當年母親為自己向聖方濟愛德小學校長下跪、父親為送自己考喇沙入學試頭笠膠袋在雨中推壞車的畫面，突然掉下眼淚，幾次哭到說不出話：「好衰……拍劇叫我喊、我又喊唔出。佢哋為我做嘅嘢，我未必會為仔女做，但我又成日迫佢哋接受我套諗法……我唔係父母嘅驕傲又諗嘢好怪，我係覺得慚愧。」

這一天，我對森美又多了層看法，原來，他不只能 chok，還很會哭。

愛迪生同愛因斯坦都似我，專注力失調。

下午三點，坐在石硤尾南山商場的大排檔圓桌前做訪問，森美的嘴巴沒停過，眼睛也東張西望沒停過。森美說，五六年前看醫生，醫生一坐下就說他東張西望冇時停，一定是患了專注力失調：「醫生話我讀書一定唔叻，我話唔係喎，我讀書好叻。醫生話：『咁你一定係天才啦！』嘩哈哈哈……所以話，有專注力失調唔好氣餒，愛迪生同愛因斯坦都同我一樣，專注力失調?！」見慣他的 chok樣、聽慣他在節目裏專制橫蠻寸拍檔小儀，我本來不意外森美拿自己和舉世天才比較。繼續聽他說下去，原來不是他的本意：「細個我打排球叻，踢波唔得，因為我每日都打排球，好少踢波。但係有啲同學平時少練，一上場足排籃樣樣都掂，嗰啲就係天才，我唔係。好細個我已經知，自己唔叻，所以我唔好勝；亦都係好細個，我就知屋企搵得八千蚊一個月，個個月攞千幾二千蚊送我去讀書，我一定要勤力。我信奉嗰套好多香港人都唔信，就係勤力。」

父親是消防員、母親是家庭主婦，一個兼職揸的士送他進名校聖士提反寄宿、一個跪求小學校長收他做學生，森美說起父母，泣不成聲。

森美說，只要勤力，口才演技自信，全都能練：「做 DJ，個個以為把口叻就得，其實考嘅係寫文章，所有嘢離唔開起承轉合。我做 DJ頭十年，每日都將要講嘅嘢全部寫成稿，每個 gag設計過；做司儀做主持，係我十幾年大小騷都接，喺無數雞騷裏面累積番嚟嘅功夫；我講笑唔叻，做棟篤笑係我將黃子華嘅騷反反覆覆翻睇，將人哋笑話計成公式，再跟個公式計計笑話，每晚跟朋友落蘭桂坊講畀啲唔識嘅人聽，人哋唔笑，咪返去再改囉！要 chok住做男主角，我更加冇諗過自己得，當年黃柏高簽我，我同佢講想做吳孟達。但係佢話，做人個目標要 set得高啲，目標係射月亮，對準月亮就會射到星星，但係對住啲星星，可能最終乜都射唔到，所以佢至開套《甜絲絲》畀我做男主角之嘛！」

手裏端著四十年歷史的排檔咖啡，森美讚老闆娘杯啡，說要扮陳豪品味咖啡，老闆娘讚森美「你靚仔過陳豪啦！」我問森美，進軍電視台是真的想做陳豪嗎，森美否認：「人去到呢啲年紀，可以做嘅已經做咗，做唔到嘅都叫試過，真係做唔到，已經冇乜火開始諗退休。拍套電視劇啫，可以帶我更上一層樓咩？仲上得去邊啫？有咩地方似得電視台，可以三個月冇時停日夜訓練做戲?？做完呢套劇，我諗我未來幾年都唔會再拍劇。」

為拍《法網狙擊》減肥 10磅，森美話絕非想 chok想靚仔：「角色係督察，理應似小柏林咁 fit，做戲唔同做主持，一肥就會好滑稽冇說服力。」

06年搞「我最想非禮的女藝人」選舉搞出事，與拍檔小儀被商台停職、公開道歉、又因疚辭去中大教職（電台製作客席講師）：「嗰次好錯，真係鬼揞眼！」《蘋果日報》圖片

最後悔，係冇同阿爸阿媽影一張畢業袍相。

森美原名梁志健，中五會考獲得 1A5B1E共 25分，以高分考入名校新亞書院預科，畢業後獲中大新聞及傳播學院錄取。大學第一年，他就因為勝出商業電台舉辦的「叱吒殺戮新大陸」 DJ比賽入職商台，首個節目是與潘紹聰主持的《青蘋果與紅提子》。

「好多人覺得入大學好巴閉，以為大學係一生人最重要嘅階段。但係我大學 Year 1已經入咗商台，開闊咗我嘅眼界，改變曬我人生觀，我一早知道呢個世界好大，讀書唔係唯一出路。就算親戚朋友、街坊鄰里得我一個入咗中大，我都唔覺得有乜嘢，仲迫埋父母接受我呢套諗法，所以，戴四方帽、行畢業禮嗰日，我冇同阿爸阿媽影一張相，連觀禮，都冇叫佢哋嚟！」

森美說自己是一個要別出心裁、要型要出位的人，考到車牌後第一架車是古董 Mini，不貴但貪它有 taste；有錢後買新車給老婆，自己則開 20年車齡 Benz，因為古董車要的不是錢而是眼光，一向以自己行徑沾沾自喜的他， 16年以後，卻說開始後悔，沒跟父母拍一張畢業相：「我好記得，幼稚園高班畢業，派位派唔到聖芳濟愛德小學，阿媽帶我去叩門，一見個校長行出嚟，就同個校長下跪，喊住話：『你收我個仔啦！』中一、中二，成績幾好，阿爸想轉我讀喇沙，考入學試嗰日，落住雨佢架的士爆胎，我坐喺架車度睇住阿爸個頭笠住個背心膠袋，淋住雨推架車埋油站……阿媽下跪，我覺得好瘀，係咁掹佢起身：『唔讀呢間咪讀第二間囉！』阿爸幫我轉校，我因為新學校冇曬啲朋友，嬲咗佢好耐……

從電影串星到 04年做愛情電影《甜絲絲》第一男主角，與女神樂基兒談情，森美話：「乜都試嚇，試過咪知自己唔係做男主角嘅料囉。」

自編自導自演愛情單元劇《森之愛情》，情商蔡卓妍、楊千嬅等紅星同自己談情說愛：「做演員同寫小說呢樣嘢好，可以滿足我思想出軌嘅幻想。」

「以前覺得，父母理所當然會為仔女做呢啲，到o依家自己做咗父母，至知道原來唔係。我個仔讀喇沙係自己考，我從來冇叩過門；學校搞舊生 party，我唔想去，老婆迫我至去。我見到人哋啲爹哋媽咪去同校長傾偈，傾完手震腳震話要出去食支煙定嚇神喎……人哋喺出邊做咗幾多年人、做慣大生意，都為仔女搞到手震腳震。你估我阿媽唔知當眾跪人唔好睇咩？佢哋為咗我，明知唔好，都會做。

「我係慚愧，我做父母，未必會似佢哋，乜都願意為仔女做；做人個仔，又要成日迫佢哋接受我嗰套。我記得入大學時我揀入新聞系，阿媽喺部度問我，做咩唔揀醫，我一句『得』埋去『唔鍾意呀』；佢哋做咁多嘢，無非想我入間好學校，到我讀完大學，又唔畀佢哋嚟畢業禮；到九十年代經濟好，的士牌升、我又讀完書，終於身邊有錢剩啦，佢哋買隻靚啲嘅表戴嚇，我都嘈喧巴閉，話買咁貴做乜，時間過得快啲咩？……我咪就係呢啲仔囉，我成日都想攬嚇佢哋，錫佢哋一啖，但我性格好衰，愈親嘅人，愈係冷漠。所以我話，有我呢啲仔有咩好自豪？」

我女人最好嗰樣，係夠聽話！

自責是個頂心杉，森美其實始終是父母的驕傲，他說每次做完森美小儀舞台劇，小儀就說阿媽投訴，成晚無間斷聽森美媽媽讚個仔：「你睇嚇我個仔幾靚仔、幾叻？」自問是個不專一又不解溫柔的大男人，森美也說，想了好久想不到老婆的好處：「唯一一樣，咪夠乖，聽曬我話囉！」

入大學前拍過兩次拖，加入商台以後，森美結識做過童星、在商台任職的 Veronica，然後相戀、結婚，再生下一對現年分別十歲和六歲的兒女：「講樣嘢你聽，好好笑，早排我同老婆去睇醫生，等緊嗰陣佢喺度睇嗰啲專注力不足嘅單張，指住我話：『用情不專呀！病症嚟?！話緊你呀！』我答佢，我有病吖嘛，我都唔想?……嗰啲人話娶咗個老婆，就唔望第二啲女人，絕對係講大話！我就係知我份人唔專一，所以出到去會閂埋道門，唔畀自己同第二啲女人有機會，費事出事。做人要諗後果，犯唔犯錯自己可以控制到，不過思想出軌真係冇得控制，所以我成日寫愛情小說、廣播劇，又拍《森之愛情》，滿足嚇自己幻想囉！」

喜歡「出軌」的森美說，不會製造浪漫、不會哄老婆開心、每天晚上不說「我愛你」，但一定告訴老婆「你今日又老咗！」，唯一一樣會做的，是所有收入全盤交給老婆處置，已經勝過千言萬語：「當然都會感激，有個女人，忍受我嘅所有缺點，放棄自己嘅事業，每日留喺屋企幫我打點一切、睇住仔女，對仔女幾好、幾乖，音樂呀、朗誦呀間中有啲獎攞嚇，呢啲咪老婆教得好囉！」

老婆與兒女雖然少提，森美說自己是虔誠基督徒，按部就班結婚生子，從來沒有隱瞞。《蘋果日報》圖片

讀過喇沙、聖士提反，森美說絕對沒有在兒子入學一事上出過力拉過關係：「係佢自己考入去，要父母幫唔啱，再講，我唔覺得讀書係一切。」

落區

訪問途中，巧遇「熱血公民」黃洋達。寒暄兩句道別後，森美說：「從政好難?，落區工作唔容易，我唔識 social，畀我真係做唔嚟！」

森美又過謙啦，落區拍照殺到去大坑西邨，森美攬實屋邨女保安影合照疏通、落嘴頭氹老闆娘借出大排檔任我哋舞、情商文具鋪檔主給他做更衣梳化大本營，然後為大班中小學生男女青年簽名影相，遇著來港旅行的上海母女，再用普通話介紹新劇，森美這一天充當的不只是訪問主角，還是公關兼友誼大使，七歲到七十歲，都被他殺個片甲不流。

從不會 social到友誼大使，森美話，都有得練，又係靠勤力。

遇見黃洋達。