有話兒：王君馨處女捐軀
王君馨於07年贏得香港小姐亞軍，人氣未見高企，其後任何工作都做足一百分，亦不見取得同樣回報，反而穿著性感出席活動時，不經意自爆仍屬處女卻一鳴驚人。君馨不後悔爆出私隱，只怪自己有個性感身軀，作為專業演員的她學會平衡心態，不抗拒性感演出之餘，亦會繼續堅守教條及自己的底線。
撰文：羅美倫
■處女論一度令王君馨迷失，曾考慮是否適合繼續在娛樂圈發展。攝影：林德雄
■君馨早前拍新劇《法網囂雄》，被要求泳裝上陣。
在香港出世的王君馨，4歲與媽咪移民美國，在外國生活、讀書，作風洋化開放，任誰都沒想過這樣背景的26歲年輕女子，會自爆多年來奉行沒有婚前性行為的教條，娛樂圈竟有處女？不禁令人嘖嘖稱奇，君馨一番話，掀起娛樂圈一陣處女熱潮。問君馨自爆私隱可受困擾？她日前說：「冇喎，反而令其他人麻煩咗，大家問到孫耀威同苟芸慧好尷尬，冇人問我，其實我好細就有特別概念，如果我唔能夠愛一個男仔愛得好深，唔會講我愛你，亦唔可以同佢發生性關係，由細到大我視第一個男友就係結婚對象。」
分手保貞操
結果，君馨一直守住貞操，第二個男友亦因她拒絕有性行為而分手，君馨坦言：「呢個係白人男友，即使拍拖兩個月，但覺得佢唔係我要嫁嘅男仔，當我拒絕佢時，佢發我脾氣，佢好嬲點解深愛唔可以親密啲呢？但我認為佢唔尊重我，嗰樣嘢係咪真係咁重要？嗰時係慶祝拍拖兩個月，反正覺得唔係我嫁嗰個，就分手囉。」第三個男友是她美國讀大學時認識的台灣人，對方十分尊重她，一直保持純潔關係，君馨說：「可能佢之前拍拖嘅女仔年紀都大過佢，攞咗佢嘅貞操，所以驚咗，咁最好，我話如果我唔同你結婚我唔會做呢啲嘢，佢好尊重我。」可惜最終因君馨要到香港發展事業，令感情告終。
君馨的處女論曝光，有人欣賞她的坦白，但亦有人質疑可信性，君馨自己都覺得令人難以置信：「喺第三者立場我都冇可能信，邊有人5、6歲就認定唔為得你死嘅人就唔發生得關係?，呢啲係神畀我嘅概念去保護我，美國太多男仔，唔止拍拖三個男仔，仲有約會，但我覺得可以做老公至同佢拍拖，就算嗰時去玩、去跳舞，都好堅守呢樣嘢，好多人尊重，唔尊重即篩走。」君馨試過被男人寸她似修女，受過多次傷害，她坦言：「我覺得要留畀老公唔係唔好嘅嘢囉，諗番如果將來結婚，望住老公對眼，話我留番最寶貴嘅嘢畀你，覺得好sweet！我幻想如果老公都係咁講，留番畀我，咁幾好呢！我會冧到爆！」
■君馨於《飛虎》中挑逗羅仲謙，她坦言多番NG拍得好辛苦。電視圖片
■經過王祖藍的教導，君馨（右）接受自己的性感特質，衝破心理障礙。
性感似有罪
其實君馨的處女論早在兩年前面世，當日她向記者透露受浸，會遵守規條不會有婚前性行為，當時並沒有特別效果，直至兩個月前，她性感地出席活動再提自己是處女，即起了強大化學作用，她說：「我性格係開朗，鍾意攬攬抱抱而被誤會，但我唔會攬男仔，physical touch係我愛嘅語言，我傷心時你講嘢安慰我未必感受到愛，但攬一嚇即收到。」
君馨堅守貞操，因要尊重未來老公，但作為虔誠教徒，就連性感都似有罪，為此她一度感迷失，尤其愛表演的她，曾怕了男人的目光：「有諗過自己適唔適合呢個圈，想人望又唔想人咁樣望，更加唔想男人望住我，好憎、好矛盾，個心好辛苦。」不過卻令君馨知道想要和需要的分別，她說：「想要令人有動力，但需要可能會變得不擇手段，好多圈中人過咗呢個位難返轉頭，我唔想過咗底線，因為知道嗰條唔係正路，唔會出賣自己身體、尊嚴，人哋點係人哋事，我過唔到自己一關，如果過呢條底線，我就唔做呢行！」
為事業妥協
始終要繼續在娛樂圈發展，就要有某程度的妥協，例如君馨早前拍新劇《法網囂雄》，亦被要求泳裝上陣，她在思想上已作調整：「場戲講我落水捉海膽，上嚟出水芙蓉咁，原本我諗住著潛水衣，點知係要三點式，我咪當自己係安琪蓮娜祖莉咁。」君馨在《飛虎》中有場挑逗羅仲謙的戲都拍得辛苦：「NG咗好多次，有啲過唔到自己，我都明白搵我因為形象切合性感，後來王祖藍同我講，君馨你唔可以抗拒性感，因為你係演員，你係表達緊嗰個角色，唔可以因角色覺得人哋點睇你，否則做唔到演員，之後我諗通，既然個天畀個好身形我，點解要抗拒呢？」自此君馨明白堅守底線之餘，亦要學懂放開心理包袱，才能做到真正的表演者。
髮型：Mo of HH
化妝：Phoebe
服裝：Amen Papa
新戲被強姦
■君馨是虔誠教徒，對不尊重她的追求者，都會即時篩走。
入行五年，王君馨大多被定型做風騷角色，但隨時間令她成熟，戲路漸廣，早前就被楊盼盼看中邀請擔任電影女主角，有很多發揮機會，君馨說：「戲入面我好慘，要俾日本人強姦，事後導演讚我演得好，原來我都做得到，後來問盼盼姐點解搵我，佢話睇到我近幾年人開始成熟，話有場強姦戲唔知我可唔可以處理到，但角色矛盾心情複雜，結果我覺得既然安排得畀我就唔好諗做唔做得，我相信天覺得我得至畀我囉。」
除了演戲，已是《舞動奇跡》舞後的君馨對音樂熱誠亦很大，最近還開始寫歌，她望不久的將來可出唱片做歌手，君馨說：「希望遲啲識個叻嘅填詞人，將我嘅故事、歌，用好靚嘅文字表達出嚟，我好享受舞台，喺舞台唱歌、表演，係我下一個目標。」
■君馨自爆仍屬處女，即掀起娛樂圈一陣處女熱，與李亞男、岑麗香及苟芸慧被封四大處女。
微博圖片
■早已成為舞後的君馨，下一個目標是出唱片做歌手。
.有話兒：王君馨處女捐軀
http://veryy8.blogspot.com/2012/12/blog-post_461.html.有話兒：王君馨處女捐軀
http://veryy8.blogspot.com/2012/12/blog-post_461.html
