2012年11月3日星期六

鵬哥扮畢佬　笑到你跌倒

鵬哥扮畢佬　笑到你跌倒

金像獎最佳男配角盧海鵬是扮嘢鼻祖，他累積了33年爆笑本色，近日荷李活型佬畢彼特（Brad Pitt）的Chanel No.5廣告出街即被全球惡搞，鵬哥為宣傳下月的舞台劇，即變身戇爆畢佬，還搞爛gag寸盡特首梁振英和「完美奸人」鄭子誠，大放笑彈。

現年70歲的盧海鵬，累積了近40年的演戲經驗，他不論正經或搞笑演出都令觀眾看得拍爛手掌，鵬哥於79年初次扮盲俠勝新太郎被發掘搞笑天份，扮足33年，堪稱扮嘢鼻祖。他近日忙於為下月14和15日在九龍灣國際展貿中心Star Hall公演的兩場《蝦仔爹哋音樂舞台劇II》造勢，前日他惡搞48歲荷李活型佬畢彼特的Chanel No.5香水廣告，變身畢佬大講爛gag，笑到你碌地。/p>

70歲的搞笑鼻祖盧海鵬，前日惡搞畢佬（小圖）在香水廣告的造型，為下月舞台劇拍宣傳片。

「學佢戇居居亂噏」

香水向來是女性恩物，Chanel No.5最近破格邀畢佬做代言人，有指他的酬金是天價700萬美元（約5,400萬港元），全個廣告僅30秒，並以黑白製作，鵬哥前日跟足畢佬在廣告中的造型，長髮兼留鬚，身上則穿上恤衫，照辦煮碗在鏡頭前口噏噏，單看畫面已非常重口味。

鵬哥（左圖）把廣告中戇居居的畢佬（右圖）演得出神入化。

鵬哥變身畢佬為《蝦仔爹哋II》拍攝宣傳片，他的爛gag幾乎玩盡近日熱爆話題和人物，民望下滑的特首梁振英首當其衝，還有國民教育、世界末日和網友熱捧的「完美奸人」鄭子誠等，鵬哥一臉嚴肅對著鏡頭說：「有人話，阿爺撐CY（梁振英），我就話，買餸要靠師奶。有人話，要搞國民教育，我就話，應該學now搞國民性教育。有人話Hong Kong is dying，我就話，有陰謀嘅係鄭子誠。所有人話，末日就到喇喎，你都霎戇嘅，咁都信！」鵬哥炮製笑彈真的有一手，木訥表情襯以爆笑台詞，令人忍俊不禁。

問到為何這次宣傳片選中玩畢佬？鵬哥昨日在電話中說：「佢個廣告hit嘛，都係學佢個廣告亂噏，佢戇居居，我見咁流行咪學佢講嚇其他嘢。」

鬧無綫對白遭刪走

鵬哥透露前日拍攝暢順，他說：「造型唔係好難，我都係噏幾句，好快就完成。」鵬哥近年為開工而留鬚，所以出鏡的長鬚如假包換，再笠假髮便成翻版畢佬。

令人笑爆肚的對白，鵬哥大爆原稿繼續喪鬧娘家無綫，但後來出街片段卻刪走，他說：「費事又鬧佢啦，台詞係幕後嘅人度嘅。」鵬哥近日都有爆粗鬧無綫，鵬哥忽然收火是否覺得鬧極唔醒？他說：「唔關我事。」盧海鵬試咪奇招街知巷聞，鵬哥拍攝時沒爆金句嗎？他說：「改嚇啦！」70歲的他腦筋轉數絕對不遜年輕人，鵬哥謙虛說：「轉數有幾快？唔係點撈呢行。」

採訪：丁寧