2012年11月9日星期五

最嚇素顏女歌手

2012年11月09日

萬聖節𠵱嘩鬼叫完，不過娛樂圈嘅驚嚇指數仍然持續，薛凱琪、鍾嘉欣、 G.E.M.、何韻詩同雨僑五位女歌手，不約而同喺微博發放佢哋嘅素顏照。為咗表揚佢哋嘅勇氣，媽咪姐決定頒發一個「最嚇素顏女歌手」獎項。結果由今年 31歲嘅薛凱琪，以打褶眼袋奪得！恭喜曬， Fiona。

薛凱琪（ Fiona）近年拼命搵錢養家。早前先過檔黃栢高到筆轉會費嘅佢，原來近日又飛咗去杭州拍戲，仲唔怕辛苦，拍完十粒鐘戲後即刻做 gym。可惜 31歲嘅佢真係不再青春，捱到殘曬，黑眼圈之外，眼袋仲大到打褶，攞呢個獎的確實至名歸。

21歲嘅阿 G.E.M.為咗餐餐大魚大肉，於是搏命跑步，佢仲將運動後嘅滴汗 look放上微博任睇㖭！話到尾青春大曬，即使素顏，但阿 G.E.M.嘅皮膚始終零瑕疵，係佢攞命表情出事啫！

28歲嘅鍾嘉欣，深明「身體是財富」嘅道理，於是病癒後立即跑步 keep fit。不過細心啲睇，被無綫洗禮嘅嘉欣，額頭出咗幾粒暗瘡，眼袋亦都唔弱。勝在保守慣嘅嘉欣今次露下心口，轉移視線成功，注定無緣攞獎。

其實要數最驚嚇，何韻詩呢張啱啱瞓醒頭都唔梳，成個宅男咁款嘅素顏 look，絕對係獎項大熱。弊在阿詩唔理好醜，呢款 man爆嘅素顏 look經常見人，驚嚇度都係輸俾 Fiona！

曾經被指五官執過嘅雨僑，最近就同經理人蕭定一鬧交，罵戰日日見報，難怪佢冇覺好瞓，對眼腫得鬼咁 3D。不過佢明知自己素顏趕客，於是佢打定底話「不夠完美反而讓人記住你」。冇錯，雨僑今次有份角逐，當贏咗㗎喇。