封面
𥄫中 1年 喪攞電話 肌佬主持搶溝岑麗香
2012年10月03日靠《巴不得媽媽》的香香公主彈起，濕身透 bra狙擊苟姑娘成為新一代宅男女神的岑麗香，原來唔只得電車仔歡心，連肌肉型男都嗒佢糖。
早喺 1年前，《超級巨聲 2》的隊長「大隻肌男」陳國峰，已經暗 like尚未變成公主的岑麗香，經過一年電話攻勢，上週三做完節目後，陳國峰更主動陪公主坐車返香閨。溝女神身體力行，陳國峰又不避嫌冧讚香香公主「好可愛、好純情」。冧到咁揚， 29歲陳國峰因住變電車公敵喎。
鬼祟匿牆
的士未到，陳國峰做哨兵睇水，而岑麗香則匿埋避見人，但仍不時忍不住探頭偷望有車未，似好心急返歸。
新紮女神岑麗香， 10年以「國際中華小姐」冠軍簽約無綫。 27歲女雖然拍電視劇唔多，但自從《巴不得媽媽》後，入屋形象討好的岑麗香，無綫已安排多套劇集力捧，包括下年的重頭劇《衝上雲霄 2》，明顯穀佢上位做花旦。
嗲聲招兵
從加拿大回港的岑麗香，講嘢嗲聲嗲氣得人歡心，之前有傳熱情舉動搞到連將為人夫的錢嘉樂都失控中招，雖然緋聞似宣傳，但據知錢太湯盈盈確實嬲爆捉過錢嘉樂問話，不過岑麗香裙下兵仔又點只錢嘉樂一個，其中《超級巨聲 2》隊長陳國峰更早於一年前已 𥄫中女神天生麗質。
護送上車
的士到達後，兩人快速跳上車，陳國峰說：「我叫佢一齊搭嘅，我順路啫！」
焗返屋企
醒目的岑麗香晨早知有兩間傳媒的採訪車跟到佢實，撇唔甩記者，惟有焗住自己返將軍澳中心屋企，臨上樓仲要同記者揮手 bye bye。
即場抄牌
據知當時陳國峰擔任主持的《兄弟幫》節目，曾邀請岑麗香和唐詩詠做嘉賓接受訪問，據知當日陳國峰對「邦嫂」零興趣，反而跟初出茅蘆的岑麗香卻言談甚歡，之後陳國峰更即場主動問岑麗香攞電話，至上週三（ 26日），陳國峰再出招向監製提出邀請香香公主做嘉賓，兩人前後腳鬼祟離開，男方實 call定的士送女神回家，接送做到足，陳國峰亦不避嫌讚香香公主好可愛。
F：《 FACE》 陳：陳國峰
F：係咪追岑麗香呀？
陳：我哋識咗 1年啦……佢份人幾得意，講嘢又好搞笑，佢好可愛、又純情，不過我唔係追佢，朋友啫，了解嚇先啦！
F：你主動提議搵佢上你個節目喎？
陳：我有畀意見啦！唔係我話曬事嘅，不過我都有贊成請佢嚟，之前佢同錢嘉樂單緋聞咁 hit，今次咪再請佢嚟澄清嚇囉，佢近排又咁紅！
F：你送佢返屋企？
陳：嗰日係我叫佢一齊搭的士嘅，咁收廠冇曬人，剩番佢一個，我順路啫，佢仲擔心啲記者見到我哋，又傳我哋緋聞添。
男方咁主動，本刊週一（ 10月 1日）致電岑麗香，問陳國峰係咪佢杯茶時，岑麗香笑曬口話：「哈哈，我都唔知自己鍾意邊 type，我哋係朋友啫，而且唔係好熟，因為我唔熟香港，有車咪一齊坐囉！」見車就上冇問題，唔好亂震就得喇！
《兄弟幫》結緣
巨聲二幫隊長陳國峰有「胸肌隊長」之稱，雖然在比賽中只得第六名，但佢演繹楊宗緯的〈洋蔥〉就成為參賽者中難度最高的歌曲。據知陳國峰去年第一次跟岑麗香見面後，已即時攞公主電話，但陳國峰說：「我係有佢電話，不過只係傾公事，我好少打畀佢，唔想再有緋聞影響佢！」大隻佬真係細心喎！
香香公主出巡
岑麗香近期勁 hit，除接騷冇停手外，連明年重頭劇《衝上雲霄 2》都要嗱嗱聲加個角色畀佢，不過靚女身子弱，上週五（ 28日），本刊發現岑麗香素顏睇醫生，週一（ 10月 1日）香香公主話：「我之前耳水不平衡，不過唔係好嚴重，食咗幾日藥冇乜事啦！」保重呀公主！
新金蛋 1個月 8騷
憑《巴不得媽媽》入曬屋，岑麗香行騷出席活動亦愈來愈多，身價亦連隨三級跳，由初出道幾千蚊一個騷，到 𠵱家 6萬幾一個騷價，仲要未必 mark到， TVB新一代金蛋非香香莫屬！
12/9 Joy& Peace秋冬時裝發布會
18/9 ATSURO TAYAMA時裝騷
19/9 超級國家盃 2012馬球賽
22/9 九展婚紗騷
23/9 鑽石山商場活動
25/9 Ted Baker時裝騷， Cole Haan時裝騷
27/9 Juicy Couture時裝活動
.[FACE]𥄫中 1年 喪攞電話 肌佬主持搶溝岑麗香
http://hk8news-d.blogspot.com/2012/10/face-1.html
