香港好聲音 胡鴻鈞

FACE週刊 第280期

一樣是出身自歌唱比賽，當《超級巨聲》胡鴻鈞見識過熱捲全國的歌唱比賽《中國好聲音》，只有一個感想：「自卑！」

兩年前參加歷屆競爭最激烈、最有口碑的《超級巨聲 2》獲得亞軍，兩年後被唱片公司星煥羅致旗下、最近推出處男專輯《雙飛》、主唱重頭劇《天梯》主題曲〈一生一心〉又被網友狂讚，才 22歲的胡鴻鈞，一點沒有少年得志、一點沒有鬆毛鬆翼：

「公司話我新碟賣得唔錯、網上面嘅留言八成都係好聽說話，但係做人唔可以淨係揀啲好聽嘅嚟聽……出咗碟又點？中國咁大，臥虎藏龍，求其執一件，贏曬啦！」

不管是十三億裏挑出來，還是七百萬裏挑出來，都是千挑萬選的好聲音。

雖然後知後覺慢人幾年才跟風搞真人騷選唱得素人，能找到香港好聲音，我覺得還是該給無綫記上一功。

為愛情犧牲？

故事靈感同樣來自 09年瘋傳中國的深山廝守五十年愛情故事，去年組合 C AllStar先行唱紅〈天梯〉。先入為主的網民聽到遲來埗到的劇集版〈天梯〉由「巨聲」胡鴻鈞主唱，第一反應都是喝倒采。胡鴻鈞的聲音卻有能耐讓網友們從反對到支持，討論區民意一面倒撐他比前作有過之而無不及。

主唱重頭劇《天梯》主題曲，雖然有 C AllStar珠玉在前，胡鴻鈞的唱功和演繹方式一樣獲網友勁撐。

有啲人驚被影響心情、打擊信心，好怕上網睇留言，我又覺得，嗰啲反應同評價最直接，做人如果只係識揀啲好聽嘅嚟聽，又點會進步呢？話我曲風千篇一律、唱歌爭咗個人風格、經驗又唔夠，我唔會覺得受打擊，咁人哋真係冇鬧錯吖嘛……冇經驗冇信心，咪唱到有為止囉。我睇番自己啱啱開始參加《超級巨聲》，冇一次唱歌唔係望住地下，因為我真係好怕望觀眾，一啲都唔覺得自己唱得好、值得掌聲。入行兩年，每唱一次，信心就多啲，信心愈多，技巧愈好，正評比負評多咗，我嘅信心又因此累積多啲，下次可以再表現得好啲。

胡鴻鈞 2月簽約星煥唱片，做欣宜、許廷鏗師弟，並於上月中推出首張個人專輯《雙飛》。

唱〈一生一心〉同出碟，我都冇畀自己太大壓力。就好似以前考試一樣，要努力就喺考試前溫好，都考完咯，仲擔心嚟做乜？我年紀唔大，經歷又實在有限，唱歌同人哋鬥澎湃鬥情感，一定輸蝕。我可以做嘅，就係盡量體會歌詞、盡量想像意境，同埋搞清楚自己到底欠啲乜。不過老老實實，開頭見到〈一生一心〉嘅詞，我都係一知半解、充滿懷疑。我好懷疑，呢個年代仲會唔會有呢種不顧一切嘅愛情出現，屋企人喜好、工作事業、仲有經濟負擔，要考慮嘅嘢咁多，係唔係真係有一個人會令你掉低一切呢？最起碼，愛情喺我嘅生命中一定唔會係第一位。

拔萃仔歌星夢

今年才從理工大學商學院畢業的胡鴻鈞，從小被媽媽力穀進名校（中學畢業於傳統名校拔萃男書院），被爸爸洗腦式灌輸「要搵大錢一定要做生意」。乖巧聽話直到 20歲仔第一次逆父母意，與無綫簽約入行做歌手。胡鴻鈞說，同年紀的人，別人都戀愛大過天，自己則是第一次為自己作主，要做就要做到最好。

我大學讀商學院，呢個時候照計啱啱畢業，應該打緊求職信周圍搵緊工。其實讀商嘅人不愁出路，我可以去做 management、可以去 in做 HR。可以入大公司、又可以做銀行。樣樣都可以做，其實樣樣都唔精，我可以去任何一間大公司，但係任何公司，亦都多我一個唔多、少我一個唔少。係唱歌先至令我覺得自己獨特，搵到自己價值何在。兩年前《超級巨聲》比賽尾段，我哋已經要同公司傾合約，係我咁大個仔第一次逆媽咪嘅意，唔理佢反對，堅持簽約。

我爹哋係生意人，媽咪做公司行政管理，佢哋由細到大都教我一定要讀書好至有出息；想住大屋、過好生活，就一定要搵大錢。我一直聽話聽教、自動自覺，中學喺拔萃全級二百幾人，保持住喺頭四十名嘅中上成績…… 20歲以前，我讀書係為咗父母讀； 20歲以後，我選擇簽約，先至係第一次為自己做決定，行一條由自己揀嘅路。有啲人願意嘗試，但係會畀自己一個時限，我唔會。有人同我講過，畀個時限自己，就一定唔會全情投入、出盡全力。條路係我自己揀，衰咗我冇得怨人，但係我要做就一定會破釜沉舟，唔諗後路。

胡鴻鈞近日另一響朵作，是與許廷鏗、王梓軒在籌款節目《星光熠熠耀保良》合唱經典金曲一節，被網友盛讚。

10年 9月 12日，胡鴻鈞以總分 0.2分之差輸給大熱林欣彤，獲得《超級巨聲 2》亞軍。《蘋果日報》圖片

爭女？唔係我作風！

同屆《巨聲》冠軍林欣彤，是巨聲幫中人氣最高、發展最好，亦是「情史」最豐富的一個。 10年巨聲尾聲，有傳六強中有三個都在力追林欣彤，其中一個就是胡鴻鈞。

幾好笑，睇得多，自己有份傳緋聞就真係第一次。唔係真我至會笑得出，識我嘅人都知，我覺得拍拖好浪費時間，仲要三個爭一個？我一定唔會爭埋一份！

我拍過兩次拖，兩次都係對方提出分手，佢哋話，頂唔順我，覺得我唔再需要佢哋……失戀會唔開心，但係對我嚟講從來都唔係世界末日，我爹哋又係好遲結婚，我諗我同佢諗嘅一樣，男人後生時應該專注事業，冇經濟基礎，用咩去成家立室？

我想有一個女朋友，唔使成日叫我陪、唔使我成日打畀佢、隔好耐見一次面都仲係可以 keep到感情……我都知應該搵唔到一個 22歲嘅女仔會同我一樣諗法，咁咪索性唔嘥時間唔拍拖囉。鍾意唱歌嘅人好多，但係唔係個個都可以有機會做歌手，拍拖幾時拍都得，但係男人嘅機會走咗就唔知幾時至等到下一個。

與同屆林欣彤傳過緋聞，現時林欣彤卻與羅孝勇感情發展穩定，更傳同居於何文田。《蘋果日報》圖片

求學年代父母望子成龍，胡鴻鈞說只敢偷偷參加歌唱比賽。

狂 sell個仔

早前胡鴻鈞應邀為雜誌做家居訪問，還帶著胡爸爸一齊上鏡。《忽然 1周》圖片

年初和唱片公司簽約，年底出碟，胡鴻鈞說，合約列明只包出一張唱片：「爹哋媽咪唔贊成我入行，但係有日經過屋企個廳，我聽到爹哋同朋友講電話，勁開心咁話：『我個仔出碟呀，聽嚇啦！好好聽㗎！』……我唔怕做一碟歌手，冇下一個出碟機會，我最怕係對我有期望嘅人失望。因為我最大嘅快樂，係令到身邊人快樂。」兒子窩心，父親 hard sell，好一對父子倆。

撰文：朱小博

攝影：範仲良　

髮型： Miko Wong@Beauty Tech

化妝： Cyrus Lee@Beauty Tech

形象： Bryan@the Flaming

服裝： another

.香港好聲音 胡鴻鈞
http://hk8news-d.blogspot.com/2012/10/blog-post_9637.html