遊泳健將七歲開始落水當替身 謝雪心：遇到大浪最緊要 放鬆自己
橫跨電視、電影、舞台劇、粵劇界的謝雪心人稱心姐，舉手投足的優雅氣質，相信是從小參與粵劇訓練的副產品，纖瘦均稱的身段，相信是由自小習水參加多次渡海泳與遊泳比賽所得來的額外獎品。未滿三歲已經投身各大遊泳比賽，隨後更化身童星，參演粵劇，有謂三歲定八十，心姐未滿三歲，已注定其道路比一般人燦爛。
＜統籌＞林爽兒＜採訪＞Sammi＜攝影＞吳國明＜髮型＞HAIR CORNER．K11 —Jacky Wu
未到三歲心姐已被爸爸帶去學遊水，隨後便到YMCA參加訓練並出賽，當年首次參加渡海泳時仍未滿六歲，年紀小小但已經膽識過人。
她笑謂：「個時好記得，自己仲好細個，喺泳池練水個時手仲唔夠長拉自己上岸。當年秋冬天氣冇依家咁暖，一定喺十度以下，遊完啲人會俾薑我哋食驅寒，細個唔識以為係糖呀，點知辣死我！」
三歲學遊水
遊泳生涯中，心姐最大的天敵，就是毒海哲（白炸）。第一次被「炸」到，正中臉部：「成塊面腫曬！當晚爸爸幫我搽蛋白仲話我個樣好得意，第二日同學仔仲以為我俾媽咪打。」第二次則是一個具紀念價值的時刻，正是心姐奪得渡海泳全港女子公開組第五名的比賽中途：「遊到一半突然有嘢拖住喺手，原來又係白炸。我咬緊牙關搏命遊想快啲完成，所以就有第五名，但諗諗下可能冇白炸反而會遊得更快呢。」
好鬼老積
心姐初登銀幕，於其七歲開始。身為孔子第76代後人，原名孔令馥的她有一名擔任監製的叔公孔強，心姐因叔公邀請，首次拍戲便客串由吳楚帆主演的電影《七小福》：「個時我得七歲但已經好鬼老積，電咗一頭曲髮，仲話啲化妝師唔幫我畫眉，好貪靚。」此後便經常幫忙叔公拍戲，熟水性的她最常擔任下水替身，回想起來她笑言近年替身費用高企，未知當年有否向叔公收足替身酬勞。
雛鳳最高一個
踏入粵劇界，已是其十一歲的時候，當時任劍輝與白雪仙為利舞台的大型演出公開招徒，與叔公經過的心姐對此感興趣，年少懵懂的她甚麼也想試，就這樣便去到任白家面試，同場還有當時得令的八大導演：「個時咩都唔識，只覺得白雪仙好靚。佢哋做拉山、雲手叫我跟住做，但點知任姐話：『有啲可惜』。」原來當時年僅11歲的心姐所有功架都似模似樣， 唯獨身高只得4 呎11，與粵劇要求的5呎3有一段距離，但當時任白眼見她非常有潛質，於是把她收歸雛鳳鳴，成為第13個亦是最後一位雛鳳：「我之後每日跳200下繩，個時《李後主》演出前後三年，我扯高左成呎，件戲服都唔啱著，我依家5呎5吋，反而變咗雛鳳裡面最高嗰個。」
雖然已在粵劇界開拓， 但心姐仍不棄泳隊，當時她更參與東南亞拯溺與香港皇家拯溺總會， 兼以12歲之齡考獲教練資格，惟當時年紀太小，要待翌年滿13歲才能領取教練章。當時已在巡迴表演的她記得有次向仙姐任姐請假，到澳門為泳隊比賽：「個時我喺澳門一間酒店泳池比賽，點知佢哋兩老過咗嚟，喺酒店上面叫落黎同我打氣，依家回想起黎都好開心，好多謝佢哋嘅支持。」泳隊生涯亦於她15歲時終於完結，退出泳壇後她專注練功，一心一意向粵劇界發展。
師傅影迷庇蔭
於粵劇舞台發展數年，心姐毅然退出，為的是要與自小認識的泳隊師兄結婚：「個時年紀唔大，師傅會唔開心，個時未做人父母體會唔到父母嘅心，但我覺得事業同家庭係可以並重。」當時與丈夫已認識8年，大家青梅竹馬情投意合，很自然便走在一起結婚成家：「我個時以為結婚生小朋友係責任，可能我古老又唔識轉彎，但其實未嘗唔係一件好事。」成婚數年，誕下後來成為藝人的女兒珈穎後，心姐照顧她直至三歲，負上對初生嬰兒的責任後，便重踏舞台，這樣一別便已六年。
心姐謙虛，再踏舞台仍有不少粉絲追隨，她自言全靠師傅影迷的庇蔭，但其實當時年輕甜美的她退出前已成台柱，要吸引一群固定觀眾並非難事。機緣巧合下於96年心姐獲邀參演首套舞台劇《虎度門》幸得舞台劇編劇麥秋與杜國威的教導：「我第一次接觸舞台劇，好彩部戲講名伶嘅後台生活，即使我唔小心流流咗少少造手都可以接受。」同時亦因而得到亞視的青睞，讓心姐再跨界進入電視圈，同年拍攝首部劇集《親親 親我》，隨即加入亞視主力拍劇。
隔行如隔山
於亞視拍劇的她仍不時演出舞台劇，更試過擔任奧運的遊泳評述員，她直言於不同界別學到的東西實在太多：「隔行如隔山，個日去唔同界別做嘢，好多嘢都有排學，日日都當自己係新人就學到好多嘢。以前做大戲，要打響鑼鼓先出場好有型，做舞台劇個時靜蠅蠅真係好唔習慣，到後來做電視、拍電影，所有野都要從頭學過。」
約滿亞視後直至08年才與無綫簽約，參演首部劇集《巾幗梟雄》爆出，憑劇奪得最佳女配角獎，再一次證實心姐一青平步青雲，順利非常。
近年開始心姐亦會間中客串電影，早前更參演何韻詩的故事形式MTV，心姐可謂涉足甚廣。
問到她當中最喜歡的範疇，她卻謂：「可以話我花心，我全部都好鍾意，每樣嘢我都好enjoy！」
受不少磨練
演出方面開始未能滿足心姐，近年心姐花多了時間於回饋社會，探訪獨居長者、教導小朋友、服務社會：「我會用得意啲嘅方式教佢哋，例如叫佢哋望金魚嚟練習粵劇嘅造手同眼神，又會同小朋友分享遊渡海泳心得，我唔望佢哋咁細個明白背後嘅道理，只係希望佢哋大個會慢慢諗起我同佢哋講過，遇到大浪最緊要放鬆自己，過左去就會風平浪靜。」一生平穩順暢的心姐相信亦受過不少磨練，才得出這一番領悟。
.游泳健將七歲開始落水當替身 謝雪心：遇到大浪最緊要 放鬆自己
http://hk8news-e.blogspot.com/2012/10/blog-post_7995.html
