娛頭
唐樓搬豪宅 包食住包工作 恭碩良拖憶蓮示威
2012年10月25日四十六歲林憶蓮與三十五歲恭碩良自前年撻著後，戀情近日終於轉入直路。今年初，恭碩良由尖沙咀加連威老道唐樓，搬入憶蓮赤柱獨立屋同居，融入憶蓮母女之家，過富貴生活。有天後做靠山，包食住包工作，恭碩良亦愛屋及烏，教結他教打鼓，氹掂憶蓮十四歲反叛女喜兒，接受這個哎吔老豆。
得女兒接受新戀情，近年打扮愈來愈年輕的憶蓮，拍拖開綠燈唔再避忌，有指她近月更打本給恭碩良，在上環開設錄音室，出錢力撐小男友。
原來，愛情可以令女人回春，亦可以幫男人上岸。
口花花
年齡相差十一載，並無阻林憶蓮與恭碩良發展姊弟戀，二人拍拖兩年，雖然由女方主動埋身開始，但恭碩良對憶蓮亦耍盡冧招，將對方馴得貼貼服服。
「係人都知，憶蓮愛才氣，一○年已經好冧阿 Jun，主動搵佢幫手做世界巡迴嘅鼓手，憶蓮做曬主動，不停撩佢傾偈，好快就過曬電。當然阿 Jun冧女亦有一手，因為憶蓮，佢甩咗之前個葡籍女友，又成日話憶蓮 pretty、 sexy，嗌佢做 baby，成個護花使者咁，又唔俾其他男仔埋女友身，憶蓮不知幾受落。」憶蓮身邊人說。
歌神俾面
今年初，恭碩良更搬入憶蓮位於赤柱的獨立屋，關係親上加親。
「以前阿 Jun同 MC Jin好老友，一齊夾份租屋住，後來 MC Jin結婚，阿 Jun自己租咗加連威老道唐樓住，憶蓮唔想同男友成日分開，今年初叫阿 Jun搬入赤柱一齊住。其實憶蓮最初都怕個女唔接受，之前佢同 auntie Choi（蔡美詩）行得好埋，個女嬲到出曬面，好在阿 Jun好用心同喜兒相處，知道佢鍾意玩音樂，就教佢結他同打鼓，大家同聲同氣，喜兒對阿 Jun加曬分。」
對感情完全投入的憶蓮，更借助自己在樂壇的地位及人脈，幫男友事業鋪路。
「憶蓮所有 concert都預阿 Jun一份，呢方面收入已經好穩定，有憶蓮做靠山，大家都俾多幾分面佢，近年，阿 Jun仲幫埋 Eason、學友嘅 concert world tour做鼓手，長做長有。」阿 Jun好友說。
打本開 band房
成功登堂入室，有憶蓮全面照顧的恭碩良，還可任用女友名下三部車及司機，出入唔使再坐的士。
「就算喺班 friend面前，佢兩個都好鬼癡纏，睇得出憶蓮好冧阿 Jun，如果唔使開工，憶蓮仲會做埋阿 Jun司機，接載佢出入。」憶蓮友人說。
有屋住有工開，近月恭碩良更得憶蓮打本，在上環開設錄音室。
「雖然係澳門鼓王，但做幕後收入有限。以前阿 Jun都係同朋友夾份喺香港仔搞 band房，依家唔使再同人孖份，新嘅錄音室比以前嗰間大好多。」
已經肯定男友身份，憶蓮同恭碩良戀情亦逐漸浮面。上週六（十月二十日），恭碩良在九展開騷，場地僅容納六百多人，唱慣過萬人紅館騷的憶蓮，唔介意紆尊降貴踩場做嘉賓，下晝五點幾做埋司機，揸住 Mini Cooper親自載男友到會場，並全程陪實男友彩排兼俾意見。
到晚上八時半開 show，憶蓮依然寸步不離留在後台 𥄫實，到演唱會臨近尾聲，她更以嘉賓身份上台，獻唱由恭碩良作曲的《出軌的女人》。
「一聽見阿 Jun開演唱會，憶蓮已經開口話上台合唱，本來同一日有個內地 job搵佢，憶蓮有錢唔賺，將時間留俾阿 Jun。」
完騷後，憶蓮預先安排好在尖沙咀赫德道一間樓上蠔吧，包場幫男友慶功，招呼近四十多位阿 Jun的親朋好友。
「憶蓮一向唔鍾意應酬，但係佢俾阿 Jun影響好多，依家都變咗好玩得，成個青春曬。」知情者說。
十指緊扣
當晚慶功宴，由十二點玩到淩晨近四點，據知當晚所有來賓食飽後，場內即調暗燈光，變成 rave場，有專人打碟「焚機」，以便大家跳舞。
「憶蓮陪住阿 Jun同幾個朋友坐喺露台，邊食邊傾，阿 Jun好吹得，全程講多過食，憶蓮俾佢氹到係咁笑，點幾鐘 party開始，憶蓮都喺舞池邊攞住杯嘢飲 un un嚇，阿 Jun已經 high曬，係咁跳 hip hop。」一名當晚在場朋友說。
淩晨四時散 band，愛得火熱的憶蓮、恭碩良十指緊扣拖實落樓攞車，向友人 say goodbye時，恭碩良更舉起勝利 V字手勢，高調宣示主權，即使發現記者影相，照樣拖實繼續行，由憶蓮做司機一起歸家。
見記者一直尾隨，到了淺水灣附近，恭碩良主動護花，落車走向記者身邊，以往脾氣暴躁，試過打人上庭的恭碩良，當晚全程表現友善，他更即場在馬路中心跳了一 part「蓮步舞」讓記者拍照交差。
至於坐在車上的憶蓮，見到男友奇招護花，則偷偷冧笑，十分享受。
無得比
過去一年，憶蓮密密巡迴走埠，愛情至上，但搵錢絕無放軟手腳，至於曾經被視為憤青的恭碩良，貼上天後男友稱號後，工作量急劇上升，出騷走埠品牌活動一個接一個，全靠憶蓮背後發功，但講到身家同收入，兩個始終差一截。
林憶蓮
香港演唱會 80萬× 2場 160萬
美加、國內演唱會 100萬× 11場 1100萬
芒果群星 come芒音樂會 10萬
長春電影節表演嘉賓 5萬
Balmain Paris fashion show＋香港 party 60萬
廣州海心沙跨年盛典 80萬
演唱會 DVD分紅 150萬
娛樂場 Boujis開幕 50萬
合共： 1,615萬
恭碩良
林憶蓮巡迴演唱會鼓手 6萬× 13場 78萬
其他演唱會鼓手 6萬× 5場 30萬
新碟《 Playback is a Bitch》分紅 3萬
活動 1.5萬× 3場 4.5萬
dior Homme Catalog 3萬
音樂表演 2萬× 7場 14萬
平面廣告 8萬× 3個 24萬
演唱會 10萬
合共： 166.5萬
獨愛才子
林憶蓮的情史，稱不上多姿多采，五隻手指數得曬，全部都係工作夥伴，無樣無錢但勝在有才華，助事業、得愛情，雙贏。
許願形象顧問、唱片監製
89年開始擔任林憶蓮的形象顧問，兩人日對夜對，火速撻著。許願曾為她設計出好評如潮的《激情》爆炸頭，其後更為她的專輯《野花》做埋監製，直至女方戀上有婦之夫李宗盛，兩人於 93年分手。
李宗盛全面音樂人
97年，林憶蓮事業如日方中，爆出介入李宗盛與前 DJ朱 衞茵的婚姻，直接令二人離婚收場。 98年 2月，林憶蓮奉女成婚， 5月誕下愛女李喜兒。其後二人多次傳出婚變， 04年，李宗盛發聲明，承認已離婚。
陳煇虹前唱片公司高層
84年，初入行做商台 DJ的林憶蓮，與份屬同事的陳煇虹撻著，但這段初戀只維持半年。兩人之後分別經歷婚姻失敗， 05年林憶蓮回港準備復出，在初戀男友的穿針引線下，加盟金牌，憶蓮更翻撻舊情人，拍拖一年多， 06年陳煇虹宣布兩人再次分手。
蔡美詩廣告導演
曾執導電影《莎莎嘉嘉站起來》的蔡美詩，本身是廣告導演，在廣告界頗有名氣，去年她為憶蓮拍攝新歌 MV撻著，一度進駐天後的赤柱大宅，據了解，由於憶蓮女兒李喜兒對蔡美詩極為反感，加速二人的親密關係終結。
野獸變鵪鶉
99年出道的恭碩良曾被封為澳門鼓王，性格出名火爆， 01年與名模女友楊崢被記者影到拍拖入酒店，即發狂動粗，拿出一百元掟落地給記者，又強行拆菲林，有指此事引起他所屬的環球唱片公司不滿，將他放入雪櫃。 02年在九展開騷，唱粗口歌舉中指做不文動作，粗人一個。
10年因澳門女友疑被非禮，一怒之下在澳門山頂醫院，揮拳打爆急症室醫生眼角，被澳門檢察院起訴，被裁定一項傷人罪，罰款兩萬，賠償受害醫生 35萬。但自從兩年前搭上憶蓮後，恭碩良性格開始變得溫馴收斂，更諗盡方法氹掂憶蓮女喜兒，成個人唔同曬。
.[壹週刊]唐樓搬豪宅 包食住包工作 恭碩良拖憶蓮示威
http://hk8news-e.blogspot.com/2012/10/blog-post_9815.html
