查小欣《爆足一周》腰斬
查小欣主持的無綫節目《爆足一周》終於眾望所歸，冇得留低！《爆足一周》播映一個月以來，不僅被網民狂插冇料爆，收視更插水，前一周收視跌到14點，創黃金時段新低。由於節目劣評如潮，無綫決定從善如流將節目腰斬，在播映完昨晚第四集後停播。《爆足一周》只播四集便壽終正寢，成為無綫壽命最短節目之一。
正當黎芷珊主持的無綫節目《最佳男主角》叫好叫座及添食再添食之際，逢周日晚10時播映、由查小欣、莊思敏和黎國輝（阿感）等主持的《爆足一周》反應卻差天共地，除收視插水，前一周平均收視由17點（約109萬觀眾）跌到14點（約90萬觀眾），跌破無綫黃金時段新低外，該節目自本月7日首播以來不停被網民狂插，力數查小欣七宗罪，包括狂踩爆料節目冇料爆，經常讀報紙、內容遲足一周，新聞變舊聞、冇觀眾緣、唔識做電視節目，在節目中叫足受訪嘉賓蘇永康名字幾十次、受訪嘉賓卡士弱、廢話連篇，內容沉悶，以及搵錯為無綫對頭人王維基拍劇的蘇永康做嘉賓等。
【最爆一刻】
查小欣主持的《爆足一周》昨晚終於有猛料爆，就是自爆腰斬命運。而莊思敏在微博上載昨日與查小欣等錄影最後一集的大合照，誓將成為歷史。微博圖片
總監：小欣姐唔開心
不少網民發起罷睇及要求腰斬《爆足一周》，無綫連日來商議後決定順從民意將原本13集節目腰斬，在播映完昨晚第四集後停播，改由蘇民峰主持的全新風水節目頂上。無綫80年曾被麗的劇集《大地恩情》打到落花流水而腰斬《輪流轉》一劇，05年無綫節目《有招出招》也試過欠缺參賽者而在第9集腰斬，今次《爆料一周》四集玩完，堪稱歷年壽命最短節目之一。
記者昨致電無綫非戲劇製作總監餘詠珊求證《爆足一周》腰斬消息，餘詠珊直認說：「確實係做埋今晚就停一停先，因為俾人鬧得太犀利，所以自己做個了斷，我哋想停一停、諗一諗，再深入了解嚇未來發展路向，同埋要研究將來應該點做、點先令觀眾鍾意，等重新包裝過後出年先再嚟過。佢哋今晚會喺節目同觀眾交代（腰斬）。」查小欣獲悉腰斬後反應如何？餘詠珊說：「小欣姐知道後好唔開心，我已經安慰咗佢。其實對佢、對公司都好，如果一路俾人鬧落去，負能量只會越嚟越大。」主持人之一莊思敏昨日傍晚上載一張與查小欣、阿感和監製衞世輝等人大合照，並謂：「保證你，今晚有嘢爆，唔睇就後悔啦。」
查小欣被轟節目中將舊聞當新聞，兼且經常讀報紙。電視圖片
連房祖名也只是做電話訪問，難怪被網民轟嘉賓和主持卡士太弱。
梁思浩：畀掌聲TVB
近日狂踩查小欣的梁思浩，昨在電話說：「好愕然，有啲失望，做電視有競爭先至有進步。」可認為自己有份鬧走查小欣？思浩說：「我講嘅係網民大部份意見，其實今次事件證明TVB係進步嘅，肯聽大家意見，佢哋斬咗個節目，但就贏番民心。」節目死因何在？思浩說：「我諗係搵咗唔係好適合做電視嘅人做電視，佢哋有個難處，節目有好多限制，例如唔講得TVB嘅人，所以未必有太多嘢講到。呢件事（腰斬）對成個電視行業嚟講係幾震撼。不得不承認，TVB如果係聽取觀眾意見而去斬，係值得畀掌聲TVB，因為觀眾先至係TVB嘅米飯班主。」
記者昨致電商台CEO陳志雲，對查小欣節目腰斬，他說：「唔覺得突然，喺媒體工作過，一定了解有好多策略性因素引致嘅即時調動係在所難免，始終節目安排要有彈性，但我家身份唔係咁適宜評論。」查小欣被商台炒魷後現又面臨失業，可考慮讓她回巢？陳志雲沒正面回應，只說：「小欣姐身兼多職，唔係得一份工。」
採訪：林妃
昨晚最後一集《爆足一周》，查小欣大打人情牌邀好友狄波拉（右）做訪問。微博圖片
陳志雲過檔商台後大改革，將主持《巴巴閉邊個夠我查篤撐》的查小欣（左一）踢走。資料圖片
撐得四周七宗罪
．爆極冇料
．卡士弱雞
．舊聞當新
．觀眾唾棄
．誤幫敵台
．廢話連篇
．電台風格
網中吟：網友一早罷睇
查小欣主持的《爆足一周》播映以來遭網民狂洗版插爆，要求節目腰斬外，更發起罷睇。
小多：佢個樣同髮型只適合做開咪。
野人1：最大問題係個節目cheap，一於全民杯葛創TBB最低收視。
LeeLK：咁寸唔認衰一於罷睇。
beu838：查老欣老早就應該退休啦，垃圾節目快啲摺埋。
victor1991415：畀芷珊開埋最佳女主角仲好啦。
littlebeebee：佢係咪臥底嚟㗎？想搞到tbb一點收視？
海外網民：不如大家下星期日睇亞視，無綫見收視低過亞視一定立刻腰斬哈哈。
西門吹雪！：這個節目再不改革，早晚腰斬。
qgal：我就覺得好奇怪，點解仲會有雙位數字收視！不過單位數收視還會遠嗎？
P.J.：小欣姐好心退休啦，當係積嚇陰德，根本冇人想睇佢。
幟哥：查X欣，你做電台算吧啦，唔係好想見到你真人。
.查小欣《爆足一周》腰斬
http://hk8news-e.blogspot.com/2012/10/blog-post_3738.html
