田蕊妮有錢冇幸福：我想離婚！

夫妻本是同林鳥。今年結婚七周年的田蕊妮，承認曾想離開杜汶澤，但非因大難臨頭，又或發現有小三才各自飛。而是當身邊男人名成利就後，兩人的幸福距離竟漸行漸遠。一連五日，田蕊妮在本報盡訴女人心經，包括工作、婚姻等點滴。

哈哈！我真係好崇拜好愛杜汶澤o架！今年結婚七周年，佢仲親自下廚整咗個大餐我食，呢啲生活上嘅小情小趣，已經令我好感恩，我亦唔會再記住當年畀我發現有第三者呢件事！首先澄清，我向來都唔會check佢電話，只係女人直覺，嗰輪感覺上係距離我好遠。

田蕊妮慶幸當年沒有在老公低潮時離開，現在生活非常美滿。

直至有次同成班人食飯，突然間有人SMS佢，佢咁啱去咗廁所冇拎電話，我只係習慣，冇心之下幫佢望一望，就見到有個親暱短訊。短訊內容係咩唔想講，但當然唔會開心啦！當阿澤返埋位，我只係講：「有SMS搵你喎！」佢望一望部電話，即刻知自己賴咗嘢啦！食完飯一上車，大家當然會嘈起上嚟，最後佢有氹番我。

「做乜嘢都驚會影響佢」

我係好善忘，我最後決定咗唔走，就唔會拎番呢單嘢出嚟繼續鬧佢。我愛佢當然因為佢charm，任何一個人都會有異性喺身邊出現，以前我會認為係啲女人衰，但依家覺得係睇佢有冇定力。如果佢選擇去做就要承擔後果，咁就OK，Let Go！我相信佢識得諗，同埋冇得擔心。好多嘢未發生，冇得擔心咁多，依家呢一刻開心就夠。

杜汶澤與無數女星合作，雖然甚少傳緋聞，但原來他曾偷食被老婆發現。



兩公婆性格大情大性，天生一對。



杜汶澤常常炮製美食冧田蕊妮。



兩人今年結婚七周年，經歷了不少風雨。

反而我最想離婚嘅時候，唔係因為有小三，而係有段時間，真係同佢溝通唔到，有錢時真係唔快樂！但如果之後唔係有低潮，我諗我哋已經離咗婚。當年佢好成功時，個個都走嚟話：「阿田，叫你老公改嚇！唔好咩都講到咁大！」我知大家係為阿澤好，但任何人點講都好，只有佢自己想改先會改。我最唔開心，係大家之間基本溝通都好迷失！身為太太我應該做啲咩去配合佢？咁講怕唔怕令佢唔好？點著衫先唔會影響佢呢？我真係好驚！做乜嘢都驚影響佢！

同佢傾偈，又完全傾唔到，我話佢知有咩唔開心，佢又好似聽唔入耳咁！兩夫妻好似陌生人，個感覺好迷失、好疏離。當時我真係想走！有日坐喺廳，喺度諗：「如果今日有人話我同佢嘅緣分到此為止，咁就好嘞！」我試過搬去酒店或去朋友屋企暫住，但絕對唔敢返娘家。因為父母初時都反對我同佢一齊，我唔想屋企人知，怕難修補。不過我好小女人，過兩日又返去。

「呢個時候離開佢好慘」

直至有唔少負面報道湧埋阿澤到，我開始諗，我係佢唯一信任嘅人，如果呢個時候離開佢，佢會好慘，所以選擇留低陪佢一齊面對。最初戥佢唔抵，叫佢出嚟澄清，包括傳佢話吳君如生仔冇屎忽，又傳佢又有賭債。我好肯定阿澤唔會咁講，同我一齊冇賭過。但阿澤話唔澄清，佢好有智慧咁話：「咁樣寫我，大家都係打份工啫！信咪買囉！一定係人哋覺得我係有問題先至咁寫！」

「買風水物品闢是非」

阿澤有好多負面新聞，當時我唔知點幫佢，我係小女人，惟有走去拜神或買風水物品幫佢闢是非，逐漸接觸到寧波車。接觸多咗，聽多咗簡單做人處事道理，原來好多簡單嘅道理係遺忘咗。2008年年尾我真正皈依，初時學打坐，一坐低唔夠五秒，就會起番身，諗好多無謂嘢。人原來諗太多，未試過心閒。依家我同阿澤有共同信仰，令我哋相處更平和。

文：專案組

攝：劉智源

服裝：Zadig & Voltaire

場地：L’hotel Island South

阿澤多女埋身唔抗拒

身為愛妻號的杜汶澤直言，當年田蕊妮跟他一起可以「淒涼」來形容。他說：「老婆當然係最大受害者，我掂嗰陣好花弗兼爛玩！尤其你紅時，一定多女人埋身，來自五湖四海，多啲嚟密啲手唔會抗拒。但嗰幾年又玩又使錢，其實係唔開心。佢嫁我時其實真係可以退休，我又搵到錢，日日過闊太生活。但係大家距離愈來愈遠，溝通唔到，到我唔掂時佢又要同我捱，你話佢係咪好慘好淒涼？」

田蕊妮大讚杜汶澤細心，很懂得照顧她。

阿澤慶幸現時兩公婆找到真正的幸褔，閒來談宗教談生活或親自下廚，安坐家中也是幸福。他說：「娶到阿田係我一生最啱嘅選擇！」

老公細心溝女最叻

好奇怪，阿澤真係冇表達過會擔心我會有狂蜂浪蝶。如果我同其他人拍親熱戲，問佢個心有冇乸住，會畀佢話黐線！好似著衫咁，阿澤會話：「你咁後生，有身材應該畀人睇嚇啦！」又或者話：「你以前著衫好大膽，結婚之後都可以o架！」

其實阿澤溝女好叻，細心過我，仲好鍾意搞驚喜浪漫。如果我喺屋企，佢一定會早過我起身，親自煮早餐畀我食，仲要煮完拎上床，名副其實係breakfast bed，好似拍荷里活片咁。

平時大家都會臨瞓睇書，阿澤睇好多，但我又好懶睇，所以會問：「老公！今日講咩bedside story我聽。」有時大家傾開偈會隨時傾天光。今年結婚七周年，連埋拍拖大家一齊十三年，阿澤畀驚喜我，整咗成枱餸畀我食。呢啲小情小趣，買幾多名牌都冇用。經歷咁多嘢之後，佢係一百分老公。下一世，問我想唔想同阿澤做番夫妻？我會覺得大家會結合咗，做同一個人！

.田蕊妮有錢冇幸福：我想離婚！
http://hk8news-d.blogspot.com/2012/10/blog-post_9201.html