2012年9月7日星期五

黃翠如捱得牛命一條

藝員黃翠如首次擔正劇集女主角，拍劇日夜顛倒時間緊迫，她索性帶埋牙刷、睡衣在無綫「借宿一宵」，雖然如此，但翠如覺得拍劇不算辛苦：「我好似隻牛咁捱得！」

黃翠如轉投無綫後首拍電視劇《心路GPS》即擔正女主角，與上位小生陳展鵬及李司棋演對手戲。新丁翠如表示開工適應新環境比預期理想，面對夜接日、日接夜的趕工拍攝，為爭取時間休息，她索性在無綫「紮營」過夜。

黃翠如自命是隻牛，唔怕辛苦。

預咗喺公司度宿

翠如笑謂：「自己住得遠，又冇車牌，所以開完通宵廠索性喺休息室瞓，我帶埋牙膏、牙刷、拖鞋、睡衣及被返公司，咁樣可以慳番啲交通時間爭取休息。」

自命捱得似足隻牛的翠如不覺得拍劇辛苦，她說：「同以前拍旅遊節目比一啲都唔辛苦，以前拍旅遊特輯因為要趕行程，好多時都喺飛機上瞓覺，依家喺香港可以見到屋企人，可以返到屋企已經好幸福，開工又有叉雞飯食，心靈上已經係好大嘅安慰。」

多謝陳展鵬提點

首次在無綫拍劇就擔正主角的翠如沒有感到壓力，她說：「開工冇想像中咁緊張，拍得好開心，好多謝陳展鵬、麥長青教我點樣做準備功課。自己其實由頭到尾都冇諗排位呢樣嘢，所以人哋話係女主角，對我唔會構成壓力，自己只係集中精神做戲。」

翠如在劇中飾演助理編導，跟隨飾演導演的陳展鵬衝鋒陷陣，問到感情線發展，她說：「套劇主要係講親情嘅，監製話要睇表現再作安排，我諗佢哋已經寫好咗，賣關子唔畀我知啫。」