田蕊妮幸福背後：我遇見小三

近年「小三」這名詞，在娛樂圈屢見不鮮，也許每段愛情故事，「小三」總會輕輕擦身而過。陳嘉容（Eunis）今次請來田蕊妮（阿田）作客，只因阿田與杜汶澤的幸福婚姻中，也曾經歷這種痛。阿田直言小三防不勝防，關鍵在於另一半有最終選擇權，亦要學會承擔後果。

田蕊妮（右）跟陳嘉容老友鬼鬼，無所不談。

陳 = 陳嘉容　田 = 田蕊妮

曾嗌分手

陳：前排睇報紙，阿澤自爆婚前被你懷疑有小三？

眾人早前為宣傳新片拍下搞笑相，田蕊妮作狀扭阿澤耳仔，在旁的DaDa一臉無辜。



田蕊妮與陳嘉容盡訴對愛情的領悟。

田：唔係懷疑，係直情有第三者！嗰時我同杜先生仲拍緊拖，有一晚有個人send短訊嚟，唔知點解突然有個直覺叫我睇，結果真係出事！當時我梗係又傷心又意外，於是講咗好多傷害佢嘅說話，亦講過分手！

阿田與阿澤現今非常恩愛。

陳：你冇畀機會佢解釋？

田：當時個人好亂，亦都聽唔入耳，我鬧佢都係用把口傷害佢，佢係用個心傷害我！後尾我冷靜落嚟，諗番喺娛樂圈接觸嘅人真係幾多，有能力嘅人都吸引到異性埋身，睇嚇自己夠唔夠定力；如果連異性都唔想埋身，即係你唔夠吸引力喇！後來我都同杜先生傾，最後選擇權都喺佢度，後果亦係佢自己承擔。

陳：我聽過唔少女性朋友，都唔好彩畀小三搶走男友，你覺得要點提防？

田：其實冇得講o架，個個例子唔同，我亦唔係專家。不過我覺得要先處理好自己情緒先，要睇嚇同伴侶之間嘅關係。男人雖然對大胸女人比較好奇，有慾念好正常，有冇行動係另一回事。我同阿澤嘅相處之道係唔會管束對方，畀空間大家，如果成日諗住另一半會搞搞震，係同自己過唔去，變得唔開心。雖然我都唔敢保證同杜先生可以走到尾，但係及時行樂係最緊要。

大病過後

陳：今年四月嗰時，杜先生患咗罕有怪病米勒費雪症候群，嚴重者會四肢癱瘓和窒息致死！

田：當阿澤話我知有呢個病嗰陣，我當然有少少唔相信，當時我喺內地拍劇，明明我走之前老公都好健康，雖然生老病死係老生常談，但係當自己個老公出事，三十幾歲人就有咁大病，真係好意外，失眠咗好一段日子，個腦不停諗啲負面嘢！

陳：你哋點去面對呢個病？

田：我唔係好識面對，但老公反而處理得好成熟，甚至安慰番我，當時我同佢講要即刻返嚟照顧佢，佢話唔使，因為最緊要係休息。呢個病會令佢視力出現重影，即係好似睇3D電影時冇戴眼鏡咁，佢講笑話冇嘢嘅，咪好似飲醉酒暈暈哋咁上下，但我心諗日日咁暈都好辛苦喎，好彩劇組都體諒我，畀我即刻返嚟睇佢！

陳：見到佢一定喊死啦！

田：返嚟見到佢已經安心好多，第一時間拖實佢！本來我唔想佢擔心，但最後都忍唔住喺佢面前喊，好彩佢依家已經好番，大家都更加珍惜相處嘅時間。

放低臭脾氣

陳：我知你近年跟老公阿澤學佛，對你嚟講有咩意義？

田：我其實由細到大都信佛，只係以前冇對佛學方面鑽研，依家學識唔好將耳仔當係眼，咁會影響思想，以前我都好執著、脾氣好差，依家學識點去放低。

陳：變咗一隻小綿羊？

田：其實我不嬲係綿羊，哈哈！我可以對一個人好好，會毫無保留，因為我覺得係種緣分！

採訪：呂曉風

攝影：吳文聰

場地：Zummer

.田蕊妮幸福背後：我遇見小三
http://hk8news-d.blogspot.com/2012/09/blog-post_3450.html