2012年9月9日星期日

陳庭欣葉翠翠得失錯對

陳庭欣葉翠翠得失錯對

今屆「民選港姐冠軍」事敗，搞到怨聲載道，有人認為冠軍應該是朱千雪，但後冠卻落在張名雅頭上。畢竟賽果已成定局，網絡癱瘓也許是天意，冠軍天注定，「過來人」葉翠翠及陳庭欣憶述往昔，不排除是誤打誤撞種下的因果。也許，港姐冠軍，只是一連串美麗的誤會。

兩年前，陳庭欣（Toby）在一片輿論聲中摘下後冠，得獎後被封為「豬扒港姐」的她並無因而氣餒，反之推動她愈做愈好：「我本身性格樂觀，屋企人又好支持我，都冇為呢啲嘢而喊，每個人都有自己嘅諗法，最緊要做好自己！」當日她在母親不停慫恿下參選，甚至被「哦」到有些反感：「我話我唔去，要去你自己去！到後來我畢業返嚟香港去咗填表，心諗未必有面試機會，敷衍住佢先，點知好順利過咗兩次面試！」

曾想過放棄

選港姐是不少少女的美夢，幻想中，港姐總是衣著光鮮，手握杯中物感受閃光燈的熾熱，奈何現實跟幻想往往存在距離，尤其是Toby參選當年要遠赴印度拍外景，攝氏50度的高溫差點熱融她的港姐夢：「每日瞓得3個鐘，去之前都擔心衞生情況，有人仲誇張到話要戴泳鏡沖涼，驚啲水入眼！每日又熱又曬，個妝都溶曬，去完呢個Trip，以後去邊都唔會驚！」辛苦完返港後，有一晚她突然眼濕濕想放棄：「嗰時想趁開始咗一陣，快啲Quit咗佢！」

參選港姐期間，Toby表示父親儼如陪選，因他堅持每次都接送，就算要等到幾夜都任勞任怨：「就算拍到淩晨阿爸都會嚟接我，到依家我都好感動！」直至現在，這位廿四孝爸爸都愛接送Toby返工放工，不過最遺憾就是選美當晚，陳父本有上台演講環節，可惜因為節目超時而臨時腰斬。

司儀界發展

得獎後，很多人會因為未記得Toby的名字而以「港姐冠軍」來稱呼她，她認為只有在任的時候有「港姐冠軍」的感覺，卸任後她只是「港姐」一名。牙尖嘴利的她向主持方向發展，最近客串劇集：「啱啱客串咗《法網追擊》，唔好阻住人收工已經好好！」她亦有留意今屆港姐選舉，對亞軍黃心穎的應對能力另眼相看：「司儀問佢有冇信心攞冠軍？佢答有，因為歷屆都冇一個冠軍係姓『黃』！呢個答案好顯得出佢好清楚港姐歷史，換轉係我都唔會咁有信心！」

後記：港姐嫁得好？

嫁得好的港姐比比皆是，不禁引伸出一個疑問：美貌與智慧並重=嫁得好？Toby對這個說法存疑，雖然港姐的確有多些機會出席慈善場合，認識有愛心的男士，但她繼續坐冷板櫈，無人問津，她感慨戲就睇得多：「何必偏偏唔揀我？」

於2005年當選港姐冠軍的葉翠翠，早於讀大學1年級時已報名參選，雖然過了第一輪面試，但她卻缺席第二輪面試，當時她認為還是留待大學畢業後再作決定。參選港姐這個諗法向來是由她家人灌輸的，直至大學畢業後，終於的起心肝參選：「家人好想我去學嚇嘢，我就想讀完書做一年嘢，拎啲人生經驗先！」

輕鬆上戰場

比賽當日，翠翠完全忘記在參加選美，全個過程都輕鬆面對，毫無決勝心卻為她贏來後冠，連她亦始料不及：「我就當係做一場騷嘅心態，既冇壓力亦唔緊張，我最期待就係對答嘅環節，其實就算司儀質疑你嘅答案，都只係想畀個機會你發揮！」直到贏的一刻，整件事就像注定，翠翠也只是以最真的一面示人：「我只係做番平時做嘅嘢，我唔會諗人哋件衫好似靚啲，唔會同人比較！」

甚麼名銜、獎品都不及過程中的得著，難得一大班女仔團結起來做一件事，翠翠跟其他參選佳麗到現在仍保持聯絡：「無論有冇被選出都有得著，冇人寫包單，最緊要踏出第一步！」有時她會想，若當年冇參選港姐，她所行的路會有多不同：「人嘅將來唔係畀命運控制，而係自己選擇點去行，個天可以安排你參選港姐，但都要睇你自己點做，將來係靠你自己奮鬥同抉擇！」

做好呢份工

加入娛樂圈本非在翠翠的人生藍圖中，她現在很鍾意拍戲，每日都覺過得開心：「娛圈係一個鍛煉加經歷，藝人除咗工作，亦都係一個課程，令我學會凡事都認真感受！」選擇了演戲這條路，她笑言會做好呢份工：「做呢行一樣可以結婚生仔，我會一路繼續做落去，直至冇人鍾意睇為止！」她堅信上天已安排好前路，她唯一可以做的，就是做好每一個抉擇，並從錯誤中學習。

後記：選美鐵人賽！

鏡頭前的港姐總是打扮靚靚、容光煥發，但她們背後要花的體力分分鐘勁過三項鐵人！翠翠當年拍外景時試過連續21日，每日只瞓兩小時，挑戰人體極限：「選港姐係一項鍛煉，無論EQ、IQ定係耐力都會提升，人生有機會參加一次係好值得！」

摘冠後曾招惹是非，反令陳庭欣愈戰愈強。

葉翠翠性格樂觀，對未來躊躇滿志。