與栢芝關係好轉 霆鋒：為仔做戲
英皇集團為慶祝踏入70周年，噚晚喺灣仔會展舉行晚宴，老闆楊受成率領旗下藝人謝霆鋒、容祖兒、古巨基和Twins等盛裝赴會，新加盟嘅影帝任達華同影後惠英紅同孫佳君等都有現身，就連劉德華、甄子丹、徐小鳳、張家輝、範冰冰、洪金寶同阿仔洪天明都畀面撐場，唐英年、李嘉誠、霍震霆、方逸華、賭王何鴻燊同四太梁安琪，仲有徐子淇同老公李家誠及老爺李兆基等政商名人都嚟埋，現場星光熠熠，衣香鬢影。眾女星都爭住拋胸搶鏡，其中範冰冰的紅衣look卻有點嚇人。
範冰冰呢個白面紅裙look唔係鬼咁靚，係鬼咁靈異至真。攝影：黃文偉
甄子丹（右）笑到四萬咁口嘅樣，同謝霆鋒cool爆簡直相映成趣。
拉姑（右）同婷婷以及未來女婿安志傑一齊撐場。
Twins嘅阿嬌（左）同蔡卓妍好似做左右護法咁傍住容祖兒影相。
「個心好噏」
霆鋒早前被拍到跟前妻張栢芝帶大仔Lucas遊水，霆鋒否認復合，佢話：「我講咗好多次完全係為小朋友著想，嗰日佢哋遊水，我有時間咪去，囝囝仲細，只想帶畀佢健全家庭。」對於栢芝腰間豬腩肉，佢力撐話：「佢唔係十八、九歲，佢又生咗兩個細路。」霆鋒直認同栢芝家關係好咗，Lucas仲試過問佢可唔可以留低過夜，霆鋒話：「聽到個心好噏，唔開心，家感覺舒服就OK，學校有時要影全家福，就算做戲都要影，一切以兩個仔為主。」
平日甚少出席應酬活動嘅劉德華，噚晚都單拖現身。
惠英紅噚晚超低胸晚裝赴會，搶盡風頭。
徐子淇同老公李家誠蹺實老爺李兆基（中），大曬溫馨。
英皇一姐容祖兒著住透視裝步入會場，佢大擦公司鞋話：「我諗住去到公司一百周年派對。」問佢中秋係咪同男友劉浩龍人月兩團圓？佢話：「我唔喺香港，唔答呢啲嘢，想低調啲。」
有雜誌偷拍到洪金寶喺北京密會北京影視學院女學生王沁宜，佢勞氣話：「娛樂圈做嘢要睇化啲，我同太太互相信任，唔通我唔可以同女性傾偈。」佢講到激動仲爆粗。
撰文：洪紅克
首富李嘉誠（左）畀面赴會，楊受成親自招呼。
六嬸方逸華喺李寶安陪同下出席晚會，但六叔依然冇影。
選特首失敗嘅唐英年都嚟湊熱鬧。
下一則:林志玲禁售胸器
.與栢芝關係好轉 霆鋒：為仔做戲
http://hk8news-d.blogspot.com/2012/09/blog-post_1893.html
