同你吟一吟
上個禮拜，兩位媽咪級港姐李嘉欣、郭可盈分別出席公開活動。先講大美人，年屆41嘅李嘉欣，上星期四晚（十月十三日）出席遊艇活動，無論真人抑或上鏡，生完Jayden嘅許太依然容光煥發，身材肥瘦適中。星期日（十六日），見到就快42歲，瘦到火柴人咁嘅郭可盈宣傳新款BB車，踎底同小朋友合照，一對爆筋鳳爪腳，零脂肪零美感，相當嚇人。
唔一定瘦先叫做靚，但日久失修，對於四字頭嘅女性，只能夠講句恨錯難返。最佳例證有45歲嘅鄧萃雯，睇得出近兩年雯女好俾心機化妝扮靚，上個禮拜二（十一日）佢著住一件直條裙宣傳內地電視劇《還珠格格》，條紋設計最蝦人著，加上身材唔爭氣，令雯女嘅肥臂粗腿表露無遺。至於44歲周慧敏，上星期四（十三日）以model身份出席時裝騷，由於條裙太窄，周姑娘又實在太好肉，加上個樣承受唔到濃妝紅唇，八珍睇完張相，仲以為佢提早同大家哈佬喂！ ####
41歲肥瘦適中嘅李嘉欣，生完仔仔依然keep住靚。
42歲打側睇，郭可盈瘦到可以俾風吹得起，對腳皮包骨，用少少力踎低，連腳筋都睇見，驚！
44歲復古頭紅唇再配金色貼身吊帶裙，突然覺得周慧敏老咗起碼五年！
45歲
其實雯女條裙設計冇事，問題在於佢嘅身形，加埋肥臂爛腳，扣分！
1128期
