2013年3月21日 星期四

壹週刊 1202 娛樂名人 熊黛林入城場趕苟




探熱針

熊黛林入城場趕苟

郭富城一連九場《舞林盛宴演唱會安歌篇》,星期日(三月十七日)正式開鑼,夾啱時間,突然傳出城城拍廣告與女神苟芸慧撻着,更出動波子 911 GT3跑車,載女神去遊車河。

男友被傳暗嗒苟姑娘,身為正印城嫂的熊黛林馬上做嘢,即晚趕到紅館睇騷插旗宣示主權,更手持「打苟棒」,明刀明槍,入城場趕苟。

宣示主權

為了專注應付今次演唱會,郭富城聲稱已有一段時間冇同異性朋友見面,暗示同熊黛林少了來往,點知轉頭就傳出城城在這段「真空期」,秘密同苟芸慧撻着,並指兩人去年十月拍電訊廣告時,苟姑娘主動出擊電天王,城城更出動保時捷跑車,載對方出外兜風。

有自來苟送上門,雖然只屬傳聞,但身為正牌「城嫂」的熊黛林,當然唔會 A手旁觀。本週一(十八日)便帶埋阿媽去紅館,風騷踩場宣示主權,力證城嫂地位不變,但當被傳媒問到有關城城同苟芸慧傳緋聞時,熊黛林只瞪一瞪眼,沒有回應。

為進一步彰顯正印地位,每當城城向住自己方向唱歌,熊黛林都會揮動熒光棒,一副春樣望住男友,又攞手機影相,甚至情不自禁嘟起小嘴,隔空送吻。

在握手位環節,城城經過熊黛林的觀眾席位置附近,原本見唔到女友,但當熊黛林突然企起身,城城即時行返轉頭,向住女友方向揮手,令場內觀眾也發現了城嫂芳蹤,引起一陣哄動,個個攞起手機影城嫂。

據知,原本熊黛林打算到尾場才現身,但男友同苟姑娘忽傳緋聞,於是臨時臨急提前踩場,高調示威!

我夠新鮮呀!(設計對白)

苟芸慧表示只係一齊工作過兩次,私底下沒有聯絡。(《蘋果日報》圖片)

我有打苟棒,睇你敢唔敢!(設計對白)

熊黛林帶埋阿媽高調捧城城場,一副勝利者姿態。

熊黛林睇得十分投入,不時 fing熒光棒,又攞手機幫城城影相。

今次演唱會保留上次跳彈床部分,但城城就加插了更多高難度轉體動作。

隔空送吻

見到城城除衫,熊黛林即刻嘟起個嘴,作狀錫男友。

主場得利的熊黛林,企定定任人影,十分風騷。

城城同苟姑娘合作拍 MV傳出緋聞,以往城城同熊黛林都係拍 MV撻着,所以話熊黛林唔驚就假。

七百萬林寶

「苟熊大戰」隨時一觸即發,城城開騷一於少理,更將兩個最愛帶到紅館,首先出動一部全港首度曝光的白色林寶堅尼 Aventador LP700-4 Roadster,車價高達七百多萬。

「呢部車仲未正式投產,暫時全球只有一部,廠商專登由歐洲運嚟香港俾我演唱會用。(會唔會買番部?)會……講笑咋,其實我乖咗好多,好耐冇買嘢,不過廠商嗰邊話會做一隻全球獨有嘅 Aaron Kowk專色,咁樣嚟氹我買!」城城說。

之後連愛駒「愛的呼喚」都出埋場,但只係一比一模型,城城騎住出場。

「真實嘅『愛的呼喚』係黑色,但因為舞台效果,我將佢漂白,但係佢身上嘅馬鞍,全部同真嘅一樣。」

城城坐住架全球暫時只有一部林寶堅尼出場,相當架勢。

原本今次都有一個全新 360度旋轉機關,但因為彩排時有意外,所以要稍後場數先會出場。

全新一批歌衫,當中最性感就是這件透點 see though衫。

其中一 part城城要在地上扮蜘蛛俠同做出韻律泳動作,練習時城城整到大髀瘀曬。

苟芸慧在微博擺了一張同城城「合照」,更表示很喜歡這張相,冧城出曬面。

週二(三月十九日),熊黛林出席公開活動時,她表示睇到城城玩苟報導冇嬲,「一睇就知作啦,佢(城城)呢排開演唱會,有時間都休息,冇理呢啲無聊嘢!」

苟熊大戰

被熱捧成「高登女神」的苟芸慧,雖然人氣急升,但在電視界仍未能擔大旗,最多做第二女主角,論身價地位,始終唔及穩佔模界一線的「城嫂」熊黛林。

撰文、攝影:娛樂組

mailto:nextb@nextmedia.com


.壹週刊 1202 娛樂名人 熊黛林入城場趕苟
http://veryy8.blogspot.com/2013/03/1202.html
.壹週刊 1202 娛樂名人 熊黛林入城場趕苟
http://veryy8.blogspot.com/2013/03/1202.html