2013年2月7日 星期四

林峯賜名分 認戀吳千語

林峯昨晚錄影《勁歌金曲》前,一臉嚴肅向傳媒宣布戀情,與早前在電台的含春樣頓成對比。


林峯賜名分 認戀吳千語

無綫33歲Chok王林峯被指與19歲影壇新星吳千語撻著,並以新歌《BB》憑歌寄意,兩人戀情愈見公開,但女方即被起底指家境麻麻,在連番報道「壓迫」下,昨晚林峯挺身而出維護女方,承認戀情,正式給千語BB冠以女友名分,他多番強調「要做番男人要做嘅嘢」,甚少高調承認戀情的Chok王,突變深情冧女王!

「不羈的峯」林峯予人情場浪子感覺,年前與內地乳牛潘霜霜拍拖,亦因床照曝光才被迫認頭,但最近他與影壇新星吳千語傳蜜運後頓變羔羊,兩人因合作電影《男人如衣服》時暗中撻著,林峯以新歌《BB》憑歌寄意勁肉麻,關係一日千里!但緋聞傳出後惹來不少負面報道,千語BB被揭家境一般,父親以斬叉燒維生,兩人被指同居,又有指林峯揼9萬元月租寓所養女友一家。



林峯昨晚錄影《勁歌金曲》前,一臉嚴肅向傳媒宣布戀情,與早前在電台的含春樣頓成對比。

未知是否飽受困擾,昨日林峯到將軍澳電視城錄影《勁歌金曲》,開騷前突然主動表示有事宣布,神情嚴肅的他自爆拍拖,並收起含春笑容多次強調「要做番男人要做嘅嘢」!

吳千語「守得雲開」,成為林峯主動承認戀情的第一個女星。

吳千語「守得雲開」,成為林峯主動承認戀情的第一個女星。

吳千語「守得雲開」,成為林峯主動承認戀情的第一個女星。

林=林峯 記=記者

林(一臉嚴肅):一向工作以外的新聞我都唔解釋,前排有部分報道影響到我愛錫嘅人同埋佢屋企人,作為男人要以正視聽!

記:你講BB?

林(語氣肯定):係!

記:吳千語?

林(斬釘截鐵):係!每逢牽涉到我屋企人,我都好反感,呢啲人對我好重要!有報道話我哋一齊租屋(指同居),我係幾唔開心、幾嬲,我係冇見過uncle、auntie,竟然講到租埋屋,呢樣嘢影響到人哋嘅印象,佢哋亦冇必要畀人評論。(緊張瞪大眼)我希望保護女方,今日係要搞清楚情況,好多嘢扭曲咗,人哋家境係唔錯,唔想一個好女仔、一個我關心嘅人畀人誤解,唔希望繼續糾纏喺唔真實嘅事上面,之前冇去講清楚,係因為工作以外嘅嘢唔想分享。

「拍咗拖一段日子」

記:你係同吳千語拍拖?

林(面露笑容):係!作為男人要做番男人要做嘅嘢!

記:拍咗幾耐?

林:一段日子,我想講嘅嘢係咁多,唔係要同大家分享,係想以正視聽。

記:女方唔開心?

林:唔係,係唔希望大家戴有色眼鏡去睇,我自己幾嬲,唔希望有人再作嘢。

「唔小心」見過家長

記:之前你冇試過咁高調?

林:冇話高唔高調,只係做番必須要做嘅嘢。(見過家長?)我冇帶過佢返廈門,但有撞過嘅。

記:點解揀吳千語?

林:佢係好女仔嚟嘅。

記:因為拍戲撻著?

林:好多嘢嘅,呢樣係我私人事,多謝大家關心。

記:鬆口氣?

林:都會o架!

記:好多fans反對戀情喎!

林:冇聽過,最緊要大家認真對待,相信會祝福我哋。

記:同公司傾過?

林:冇喎!公司唔理我私人事。

記:樂易玲知唔知?

林:我係個體,工作以外我有自己生活。

記:但佢(樂易玲)幫過你否認喎!

林:佢冇否認,但呢樣冇必要去研究喇!

記:女友哭訴?

林(語氣緊張):冇!大家唔好誤會,冇任何人知我今晚咁講,我有自己主權,身邊嘅人都會支持我,希望追訪適可而止。

最後林峯補充拍拖是開心事,希望得到祝福,但再否認同居,跟千語BB亦沒有金錢瓜葛。公開戀情後的林峯如釋重負,在台上錄影時心情大好不時笑曬,跳唱快歌《Nice》亦加倍落力,最後更抽中價值二千多元的金蛇,果然人逢喜事精神爽!

榮升「峯嫂」的千語BB身處內地拍劇,其經理人向她轉告「喜訊」後,她回應時亦盡見小鳥依人:「一切返嚟先講,但以男方講嘅嘢作準。」

女友感言觸動護花神經

林峯公開承認與吳千語拍拖,千語BB身份三級跳,榮登「正印」。一直提感情事即「耍太極」的林峯,今次破天荒公開講戀情,原來全因受到吳千語上周在微博的澄清而觸動其護花神經。

林峯因電影《男人如衣服》與吳千語朝夕相對,擦出愛火。

林峯因電影《男人如衣服》與吳千語朝夕相對,擦出愛火。

上周六,吳千語連發兩條微博,為連日來指她父親以「斬叉燒」維生及獲「女婿」林峯照顧而變得富貴的報道極力澄清,她寫道:「面對連日來傷害我人格的報導(道),我已盡力以笑平衡失落,不影響工作!昨日(2月1日)看到報導(道)把我家人也牽進來,我爸媽非但未有埋怨我,反而更擔心我的狀況,我心實在非常難過!」明顯已壓力爆煲!她更來為父母護航:「我可以無奈接受被誤會,但爸媽只是普通人,請不要傷害他們。」澄清父母除認識其經理人黃百鳴外,家人並不認識任何藝人,更表示現居單位是自己與家人一起租住。千語感言一出,即時觸動男友神經,主動站出來公開關係,保護女友。

舊愛李彩華驚爆當年秘情

被視為林峯初戀情人的李彩華,昨日被問到林峯公開戀情一事,她語帶輕鬆說:「都唔會愕然,阿峯不嬲都係有承擔嘅人,當年大家拍拖兩個都想認,不過當時大家入行冇耐,公司唔贊成,依家時代唔同,拍拖、結婚都會出嚟講,我都戥佢開心,祝福佢哋。」

李彩華

李彩華

另外,曾秘密跟林峯拍拖的潘霜霜,當年為證身份不惜自拍床照,昨日她得悉舊愛公開認拍拖後說:「那不很正常嗎?其實跟我也沒有關係!(當年他跟你拍拖可沒公開承認?)階段不同吧!他已這麼大的一個人,應該要有承擔,要不哪有女人願意跟他?我覺得最起碼要給女生一個身份。」霜霜更寸爆地說:「沒有擔當的不是個男人!」此外,林峯另一位緋聞女友劉羽琦現時身處內地,對於林峯的事只稱一概不會回應。

峯語戀情定杭州

林峯與吳千語去年4月因在杭州合作電影《男人如衣服》而拍出愛火花,有指他們在電影煞科K局徹夜談情,同年7月被拍得在中環撐枱腳,更綿綿情話一小時,兩人搭的士離開時發現記者,林峯突然跳車喪跑閃人,留下吳千語一人在車廂,但都未有承認戀情。

千語早前高調捧林峯個唱,相信有與同場的林父相見。

千語早前高調捧林峯個唱,相信有與同場的林父相見。

直至今年關係才明朗化,林峯奪得勁歌「最受歡迎男歌星」時在台上公開多謝「BB」,隨即令人揣測吳千語就是他口中的「BB」外,連日來談及吳千語時林峯亦春風滿面,笑不攏嘴。早前吳千語毫不避嫌現身林峯的演唱會撐場,而林峯亦含情脈脈地望著女友坐的方向唱情歌,戀人關係昭然若揭!

林峯父親

林父

樂易玲無限量撐愛將

無綫高層樂易玲處處維護林峯,之前更公開表示林峯一定不會「閃婚」,不過今次林峯主動公開戀情護女友,宣示「主權」,更坦言事前未有告知樂小姐!樂易玲昨晚接受電話訪問時表示林峯事前的確未有告知她,但他也很在乎樂小姐的反應,已事後即時致電給她。樂小姐謂:「佢大個仔,對自己嘅決定擔當得起,咁多年嚟遇到挫折我都支持佢,何況依家係開心事,我會支持佢!佢覺得想同需要去做嘅話,我都會畀支持佢,作為佢長輩、經理人,會畀佢無限量支持,(怕唔怕影響工作?)公司好多人都結婚、生仔,男女拍拖好正常,而且佢係一個好勤力嘅人。」

無綫高層樂易玲(資料圖片)

無綫高層樂易玲(資料圖片)

同居到閃婚 傳聞不絕

自藝人林峯與吳千語傳出緋聞,有關二人的是非新聞不絕,今年更先後傳出半山同居、吳千語父親搬入豪宅、二人閃婚,愈傳愈烈,不過雙方統統否認傳聞!

半山玩同居

今年傳出林峯將女友私有化,豪擲八萬蚊港幣月租半山豪宅同住,更與吳千語同居超過半年。

千語父被屈

有傳吳千語父親在燒味舖工作,獲林峯愛屋及烏,由沙田搬到月租九萬元港幣的堅尼地城豪宅,地點更只與吳千語的半山豪宅相隔一條街。

見家長閃婚

有指林峯已經帶吳千語回家鄉廈門見家長,四處玩樂之餘,更加秘密玩閃婚,不過事後林峯直指傳聞離譜。

網民叫吳千語滾

正當林峯大方承認與吳千語拍拖,好多粉絲和網友在吳千語的微博內洗板,不足兩小時已有四百多個留言,粉絲反應各異,有人送上祝福,但亦有大批網民反對二人拍拖,直言毀滅了林峯男神形象:「無論怎樣我們都不會接受!」網友Agnes表示:「熱戀中情侶係叫BB,但是你唔好唔記得阿峯都係叫我哋Honey!」網友maymaymimi更說:「不敢接受的事實啊!」更有網友又偏激表示:「怎麼會這樣!吳千語你給我滾!」



.林峯賜名分 認戀吳千語
http://veryy8.blogspot.com/2013/02/blog-post_2739.html
.林峯賜名分 認戀吳千語
http://veryy8.blogspot.com/2013/02/blog-post_2739.html