【明報專訊】香港首富李嘉誠一如以往，元旦日同大仔澤鉅齊齊去柴灣佛教墳場，拜祭超人外母同愛妻。呢兩父子糖黐豆，細佬澤楷就遲少少一支公到場會合。其間出現一名女子，向李嘉誠大叫「老竇」，仲叫「老竇」接佢返屋企。超人等人無理會佢，呢位戴白冷帽嘅女子情緒一度激動，又喊又叫，一時又坐喺馬路，超人嘅保安就全程戒備。
李澤楷一支公會合父兄
噚日雖然無除夕咁凍，但朝早都幾大風，同樣有戴冷帽嘅李超人心情唔錯，見到成班記者在場，佢笑笑口講「早晨」，仲逐一同記者握手，明顯係冷待遠處狂呼佢做「老竇」嘅中年女子。
超人同澤鉅以及兩名相信係新抱、孫女等人，肅然掃墓、上香及跪拜。其後，細仔李澤楷一支公，著條牛仔褲到場，澤楷拜祭期間，超人同澤鉅等在旁閒話家常。唔好以為澤楷唔識禮數，佢拜外婆時，行足三跪九拜㗎！
約一個鐘頭後，李家要走人，一直守候嘅白帽女再度激動，多次擠向阻擋佢嘅保安，一見超人又大叫「老竇接我走」、「點解唔認我呀」，最終佢都無法如願。Emily睇番資料，2007年元旦，有個名叫李玉蓮嘅內地女子，趁超人掃墓時想認「老竇」，唔知噚日嘅白帽女子係咪同佢係同一人？
■有片睇：http://link.mingpao.com/15732.htm
李澤楷遲到，但禮數做足，三跪九拜祭外婆。（劉永銳攝）
放大顯示李嘉誠（右一）同長子李澤鉅（右二）噚日上午8時45分到墳場拜祭，數名保鑣貼身保護。（劉永銳攝）
.李超人拜山被「女」追 白帽女高呼：老竇接我走 香港
http://veryy8.blogspot.com/2013/01/blog-post_1432.html.李超人拜山被「女」追 白帽女高呼：老竇接我走 香港
http://veryy8.blogspot.com/2013/01/blog-post_1432.html
