外來語
到底發生咩事幹？使唔使扯埋孔子、亞里士多德，仲要左一句「爛仔」右一句「黑社會」鬧人呢？不如搬個神出嚟吖笨！又唔拘喎，11月3D大電影《天魔戰神》，講鄉下仔為反抗暴政，聯同希臘諸神共同殺敵，更由頭打到尾，徹徹底底將爛仔所為極致化。
坦白講，《天魔戰神》嘅卡士，真係油麻地。稍為大粒啲，都係得金像影帝米奇洛基（Mickey Rourke）。不過做人萬不能咁膚淺，電影由《戰狼300》班底製作，耗資超過1億5千萬美元，仲係港人至愛3D。最最最重要，主角由新任「超人」亨利卡維（Henry Cavill）擔正。
荷里活黑仔
亨亨嘅出身其實普通到唔普通，既唔係童星出身亦無猛人撐，純粹由奀星升上三打七，再到二打六，漸漸為人認識。可惜吖，時不我與。《蝙蝠俠：俠影之謎》選新任「蝙蝠俠」時，曾考慮過亨亨，但最終輸咗俾基斯頓比爾（Christian Bale）。到2005年拍《新鐵金剛智破皇家賭場》，亨亨本大有機會成為新「007」，無奈再度撻Q，被丹尼爾格力（Daniel Craig）中途截胡。同年華納開拍《超人強戰回歸》，亨亨心諗：一次唔得，兩次唔得，第三次一定得啦啩！點知都係衰收尾，俾Brandon Routh成功搶灘。由於亨亨連續3次撻到應一應，權威電影雜誌《Empire》都我見猶憐，封佢為「荷里活最不幸嘅人」。不過衰運唔會行一世嘅，亨亨先被《戰狼300》監製相中，第一次擔正咁大部片。現正就為新作《Man Of Steel》飾演「超人」。原來上一套《超人強戰回歸》口碑普通，Brandon Routh自然冇得留低。不過電影公司眼見英雄電影長拍長有，諗住再翻叮多一次，改由亨亨主演。講番《天魔戰神》，今次古仔跟《戰狼300》、《人•神•魔戰》差唔多，同樣以希臘神話做藍本。劇情講米奇洛基意欲統治全希臘，藉機推翻希臘諸神嘅政權。宙斯身為諸神首領，自然要搵個打手去擺平件事，而重任呢，就落喺亨亨身上。所以爛仔基本上唔怕做，問題係做完會唔會被驅逐離場。
神仙下凡
《天魔戰神》一眾希臘神仙雖貴為神，但身懷絕技兼且鍾意落手落腳打人，絕對係非一般神仙咁簡單。 ####
導演塔森辛仿照《戰狼300》大玩色彩效果，佢自言電影糅合文藝復興藝術風格以及《搏擊會》打鬥場面，風格與別不同。
有神仙自然有魔法，亨亨手持呢把弓箭能遇神殺神，遇佛殺佛，勁嘢。
班神仙一方面要對付混世魔頭，一方面鬼打鬼，互相對打。
亨亨為角色減肥25磅，再日日操肌，全身脂肪百分比只得6%，可以話要腹肌有腹肌，要胸肌有胸肌。就算滿身黑油，肌肉都清晰可見。
《一百萬零一夜》菲達萍杜飾演嘅女祭司能預知未來，最終同亨亨一齊去殺敵。
特技場面，大把。巨浪沖冧城牆已經係小兒科。
亨亨嘅超人look早前已率先曝光（右圖），家下佢喺加拿大繼續拍攝，以留鬚爆肌造型現身。
海波王米奇洛基飾演嘅大奸角與泰坦神族有血緣關係。但泰坦神族被宙斯諸神所滅，米奇因此決意報仇。
雅典娜戰爭、智慧女神，亦係宙斯女兒。由《變形金剛2》索女Isabel Lucas飾演。
波塞頓海神波塞頓既係主角爸爸、同時係宙斯細佬。《吸血新世紀》Kellan Lutz為演好角色，日日吞16隻雞蛋，增肥25磅。
阿瑞斯戰神阿瑞斯相傳有一把絕世弓箭可以統治世界。米奇洛基就係為咗尋找呢把弓箭而大開殺戒。
847期
