跑兩夜場執 50萬 黎耀祥遭大胸女狙擊

2013年11月29日星期五

跑兩夜場執 50萬　黎耀祥遭大胸女狙擊

又見到你？

（真實對白）

娛樂喧

跑兩夜場執 50萬　黎耀祥遭大胸女狙擊

由雙視帝黎耀祥及陳豪鬥戲的台慶劇《法外風雲》，被指不夠專業兼劇情浮誇，大結局更似足鬧劇，劇集無聲無息落幕。

今年黎耀祥劇集套套出師不利，但三屆視帝美譽令他在內地爆紅。近幾年他每星期都會有一至兩次到內地登台、剪綵或出席活動，每次企硬 30萬人仔酬勞，年賺近二千萬，比在無綫拍劇足足多出十倍。

上周三（ 20日），黎耀祥拍完外景即上中山連走兩場登台，快食執 50萬。場內更有唔少大胸女自動拋波餅贈興，不過踩足 48小時冇瞓過的黎耀祥，肯定無福消受。

上周三（ 20日），黎耀祥在 TVB拍完《男大當婚》外景，嗱嗱臨與老婆坐中港保母車，坐足三粒鐘車程直踩中山小欖酒吧演出。

一如過往，他所到之處必引起哄動，現場數名大胸女及多名大漢爭著與他合照，黎亦無托手踭。可是，慘被逼埋牆角的祥嫂見情況愈來愈混亂，忍唔住發火：「夠嘞，唔影喇，要出場！」

拋胸 pink lady

黎耀祥行到邊都見到粉紅女郎夾胸追住握手，更試過狼死到被對方𢱑住隻腳，嚇得黎耀祥大叫：「嘩，乜行到邊都見到你？」

踩足 48小時

當晚，黎耀祥第一場騷約晚上十二時開始，他站在唔夠半米闊的台上獻唱四首飲歌〈新鴛鴦蝴蝶夢〉、〈花心〉、〈舊歡如夢〉及飲歌〈紅蝴蝶〉。其間一名穿開胸衫露半球的 pink lady，不停夾胸追住黎耀祥握手。當黎經過面前，她更扯實對方雙腳，令黎險些跌倒。好在視帝祥臨危不亂，還打趣向對方說：「嘩！乜行到邊都見到你？」

唱完一場，黎耀祥立即上車， 45分鐘車程轉到石岐酒吧趕第二場，觀眾同樣熱烈瘋狂。由於一連兩場酒吧均屬同一老闆，黎收特惠價 50萬跑兩場（原本 30萬一場）。黎耀祥唱完已經是深夜兩點，返到香港，沖個涼換件衫，早上六時又要返 TVB拍外景，踩足 48小時冇得瞓。

逼到口張開

雖然貴為三屆視帝，為賺錢一樣唔介意到人多擠逼的細場登台。當晚黎耀祥由保安護送上台時，逼到口張開兼反眼，窒息咁滯。

大漢輪住握

當晚不少兇神惡煞的老細級人馬輪住與黎耀祥握手影相，黎為免得失對方，即趕緊握手，笑面迎人。

祥嫂黑面

黎耀祥遭群女箝住影相，被逼到牆角的祥嫂（黃圈）混亂中俾人踩中一腳，即時忍唔住黑面。

簽名紅酒遭炒賣

完騷後，主辦單位要黎耀祥在紅酒及烈酒上簽名，有人衝口而出：「攞去炒㗎，簽咗名貴好多！」黎依然冇 say no。

為仔奔波

事實上，黎耀祥 08年憑《巾幗梟雄》柴九爆紅後，多年來不少內地電視台都有搵他拍劇。面對一套收近五百萬的豐厚酬勞，卻不為所動，他更揚言不會效法鄭嘉穎及林峯北上拍大陸劇，「我個仔十六歲，係成長關鍵期，唔想幾個月見唔到佢，依家接啲 Job，一、兩日就可以返屋企同家人見面。我人生冇幾多個十年，有得賺就賺啦，寧願辛苦啲，都想儲多啲錢留俾個仔。希望將來阿仔同自己生活可以好啲吖嘛！」老竇賺錢仔享福，過多十年他已六十歲，難怪要積穀防饑啦！