力抗亞視歧視 Mr. Gay亞軍 Tommy：我有骨氣夠膽行出嚟！ MF,

2013年10月30日星期三

力抗亞視歧視　 Mr. Gay亞軍 Tommy：我有骨氣夠膽行出嚟！ MF,

Tommy家住大澳，拍攝當日是在九龍城朋友家中進行，採訪時身穿條泳褲正是比賽當天「戰褲」:「自己冇錢搬出嚟，有時方便開工就寄居朋友屋企。」

搜尋氣

力抗亞視歧視　 Mr. Gay亞軍 Tommy：我有骨氣夠膽行出嚟！

電視發牌風波未解決，同志仍需努力，不過正面影響已經浮現，無綫宣布新工時政策，藝員開工從此不再昏天黑地沒完沒了，呢啲咪革命囉！

其實電視圈陰暗面，唔係得大台先至有！亞視《通識小學堂》主持 Tommy（梁景煌）就因為公開性取向、參加 Mr. Gay HK選舉而被亞視高層照肺，被踢出主持群、更威脅要告違約，不過 Tommy話未驚過：「冇人企出嚟，社會就永遠唔會有進步，冇錯點解唔去做？」

其他影片

自細學習芭蕾舞，入讀過演藝學院、平時亦靠跳舞、教舞增加收入，所以着泳褲拉一字馬，對 Tommy嚟講係基本功啫。

打算參加 Mr.Gay選舉呢件事，我係被同事出賣。亞視高層叫我去照肺，話會影響自己同公司形象，又話要告我毀約，告我侵犯公司肖像權，我唔驚喎，我都有搵律師……上星期一（ 21日），我攞亞軍報道一出街，就收到 PA同事通知，話呢個星期唔使再返去錄影；又唔使我返工，我律師 call佢哋又冇人回覆，咁即係點？呢啲就係亞視風格。所以我真係好支持王維基發牌，令觀眾同藝人都多啲選擇。一台獨大唔係淨係無綫衰，亞視都有份造成，乜都要慳，咩劇都唔拍，全公司全靠賽馬節目賺錢……你知唔知我每日返亞視成個死城一樣，有幾灰？

其實基冇錯㗎，自古都有同性戀啦，我哋跳舞圈有好多同志，仲有好多電視台高層，我都喺基吧見唔少啦！啲人成日鬧我屎忽鬼、大菊花……你咪鬧囉，我又唔會少忽肉嘅！同志係我性取向，但係我有骨氣、我夠膽行出嚟，同埋我專一，唔會為錢出賣自己囉。我爺爺撈偏，留低啲身家，我同爸爸都係住大澳，靠爺爺剩番嘅身家過活。但係我都 23歲仔，我都想靠自己，亞視每個月得 6,000蚊人工，連食飯搭車都唔夠，出去教跳舞、做騷都係想增加自己收入自食其力啫！我見過好多例子，同志被打壓、被屋企人遺棄，搞到要𠝹手燒炭放棄自己。

其實我之所以勇敢，最主要係父母支持。佢哋得我一粒仔，佢哋都想傳宗接代都要面，我屋企仲要住大澳一個咁封閉保守嘅地方，但我爹哋媽咪乜都唔理，因為佢哋知道冇嘢重要得過我開心囉。我唔怕你哋叫我乸型，唔好睇小今次我呢一小步，如果個個驚、個個唔敢行呢一小步，咁同志就永遠都改變唔到現狀！