39歲蒙嘉慧同鄭伊健協議不生BB
39歲YoYo同伊健傾掂唔生BB
蒙嘉慧（YoYo）月前與鄭伊健結束愛情長跑，在日本東京古堡低調結婚，正當全城期待兩人啤出「古惑B」時，婚後首次接受專訪的YoYo竟高呼：「佗仔似坐監、生仔似噩夢！」又直指伊健的性格令她卻步不敢生B。她又笑言奶奶從未給予生B壓力，看來她這個鄭家媳婦認真易當！
今年「蒙麵戀」終修成正果，39歲的YoYo與45歲的伊健結束愛情長跑，在東京古堡完婚。正當全城期待二人努力造人之際，YoYo日前為新劇《仁心解碼II》接受本報專訪時卻爆出生仔如發噩夢：「見到朋友佗住BB已經要諗定幫小朋友報Playgroup，真係煩！有次發夢夢見自己有咗，夢裏覺得係一個噩夢！要煩小朋友讀咩小學，自己又怕填表，要填好多表o架！覺得佢慘，我又慘！我同伊健都有共識，暫時唔考慮生小朋友。」她更直指佗B感覺似坐監：「如果我有咗，懷胎十月對我嚟講好似坐監。加埋前四後六喎！好似坐咗成年監！而且我哋有養貓，早前知道朋友養嘅貓搞到佢嘅小朋友氣管敏感入咗急症室，如果要放棄隻貓，都好難取捨！」
老公太縱小朋友
YoYo更大讚奶奶開通，從來沒有給予自己要傳宗接代的壓力：「伊健嘅哥哥都有小朋友，所以奶奶都冇畀過壓力我！」她又指伊健的「寬宏」性格亦是令她卻步不想生小孩的原因：「佢太縱容小朋友，我哋將來教導小朋友都一定好難有共識！」
談到婚後感情生活有否更勝從前，YoYo坦言其實沒甚分別：「其實我以前一向都有Keep住做家頭細務，婚後生活都冇咩分別！」但正所謂「近朱者赤、近墨者黑」，曾一度情緒受困的YoYo坦言受「枕邊人」影響，性格變得更樂觀：「好多年前因為工作壓力大，擔心唔夠工作，啱啱拍完一套劇就已經緊張定下一項工作，嗰時一瞓醒張開眼就諗，一諗就驚，發覺自己唔對路之後，間中都有睇醫生。（伊健影響你更樂觀？）佢係一個好好嘅人辦，記性唔好，唔開心嘅嘢、工作辛苦都唔記得，只係記得開心嘅嘢！識佢之前我拍拖又唔開心、工作又有壓力，但之後我學識面對困難，應該去享受自己有能力去解決問題。」
拍策騎戲險受傷
另外，伊健與周渝民、吳尊和林峯等日前赴北京出席電影《忠烈楊家將》記者會。伊健透露拍攝騎馬戲時驚險重重，幸好當時身繫威吔逃過一劫：「帥要付出很多！剛開始時大家都不太能控制馬匹，最後連文戲都可以在馬上演，這一幕最帥！」幸好伊健「大步檻過」，否則YoYo一定嚇到花容失色！
YoYo笑言佗仔似坐監、生仔似噩夢，故不敢生BB！ 
幸好奶奶沒有給予生B壓力，YoYo認真有福！
遊戲人間生活多姿采
鄭伊健和蒙嘉慧（YoYo）婚後沒有生B念頭，誓要享受二人世界！其實YoYo在未認識伊健前，經常打牌兼夜蒲，惟與伊健相戀後即修心養性，還被對方的陽光味所感染，兩人經常相約打羽毛球、踩單車和跑步，向健康人生邁進。
此外，他們亦經常蜜遊外地，除2011年被發現到巴黎踩單車外，二人更多次被拍得同遊日本。縱使沒有愛情結晶品，但生活依然多姿多采，節目多籮籮！
YoYo怕開玩具舖：自己份糧都唔管
對於早前有指獲老公鄭伊健打本開玩具店做老闆娘，蒙嘉慧（YoYo）斬釘截鐵否認，並強調自己錢銀觀念很差：「唔會啦！平時我連自己份糧都唔管，又點會去管生意，錢銀呢啲嘢好煩！我以前試過租屋畀人，但唔會個個月Check租客有冇交租，如果我咁樣做生意一定蝕本啦！（婚後減產？）入行以來都唔多產，再減會餓死！」
另外，據知即將約滿無綫的YoYo，續約無綫的成數不高，更有傳無綫因而未有安排她出席新劇《仁心解碼II》的所有宣傳活動。YoYo亦直認已收到相關通知：「我之前一直都有預檔期出席宣傳活動，但近日我已經被通知唔使去。」對於是否如傳聞所指過檔王維基的「香港電視」，她則不置可否：「今日我都仲喺無綫，合約嘅嘢交畀經理人去傾，喺TVB咁多年拍得都開心，當然希望呢個關係可以延續，但唔係可以單方面控制！」《仁》劇監製羅永賢亦直認對於YoYo未能配合宣傳感可惜：「但公司覺得呢個時期敏感，所以都要配合！」
冇子女債一身輕
雖然心急求子的圈中人多不勝數，但亦有藝人喜歡唱反調，結婚後也不願生BB，誓與另一半「無債一身輕」！
陳百祥
藝人陳百祥（阿叻）雖曾笑言自己「唔配種」及「冇仔生」，但事實上他曾透露因賭性重，凡事去到盡，故決意不生仔免加重負擔。
歐陽震華
無綫藝人歐陽震華（Bobby）與太太傅潔嫻結婚17年，一直享受二人世界。而Bobby曾透露不生BB是不想太太辛苦，故決定以養狗為樂。
劉青雲
影帝劉青雲與郭藹明1998年拉埋天窗，結婚以來恩愛非常，但青雲一直無意生B：「因為家姐細佬都有下一代，所以我冇壓力，而且養人責任好大。」
.39歲蒙嘉慧同鄭伊健協議不生BB
http://veryy8.blogspot.com/2013/03/39bb.html.39歲蒙嘉慧同鄭伊健協議不生BB
http://veryy8.blogspot.com/2013/03/39bb.html
