飯局風波越鬧越大 黃浩告梁烈唯誹謗

【飯局風波之禍從口出】徐濠縈、何超儀和李璨琛等23人去年在徐淑敏（Suki）老公黃浩的餐廳開餐，成為「飯局事件」導火線，事件越鬧越大，曾志偉月初在婚宴涉嫌掌摑黃浩，上周被警方拘捕。無綫上位小生梁烈唯事後幫口寸爆黃浩有妄想被迫害症，黃浩不滿言論有誹謗成份，上周向梁烈唯發律師信。梁烈唯淡定懶理，昨日再揶揄說：「有啲人對號入座，反應會大啲。」

曾志偉本月5日在落選港姐鄭嘉雯婚宴上，與黃浩發生爭執，其間志偉涉嫌掌摑黃浩，志偉上周被警方拘捕，暫准保釋候查，下月中再向警方報到。飯局事件餘波未了，繼志偉被捕後，婚宴座上客沈嘉偉和梁漢文也被邀到警署提供資料，事發後力撐志偉的梁烈唯，出言揶揄黃浩，據知上周黃浩透過律師向梁烈唯發出律師信。

■黃浩本月初偕妻出席鄭嘉雯婚宴時自稱被掌摑，同場的梁烈唯事後撐志偉而寸爆黃浩。資料圖片

遭罵妄想被迫害症

當晚有份飲喜酒的梁烈唯，婚宴後翌日出席電影探班活動時，就涉掌摑事件說：「志偉哥成日鍾意同人玩，可能黃生緊張啲，有妄想被迫害症。我唔識黃浩，淨係知佢係徐淑敏老公，同埋一路吹啲新聞出嚟，較鍾意製造是非，令自己更有新聞價值。」黃浩不滿被抹黑，據知他上周向梁烈唯發律師信，文件已獲梁所屬無綫經理人簽收。黃浩要求梁烈唯今午前公開道歉，否則有進一步行動入稟控告他誹謗。昨日黃浩在電話中說：「我交咗畀律師處理，唔方便透露。」

記者昨午致電梁烈唯求證，他說：「冇收到，好呀，你哋話先至知，我唔擔心，冇乜好擔心，好小事啫，可能公司收咗，如果收咗會通知我，但我未知。」他揶揄黃浩有被害妄想症言猶在耳，但他否認言論過激，他說：「唔會喎，佢嘅嘢我唔會再講，冇乜意義再講落去。」

■梁烈唯昨日出席商場騷，他表示不會收回對黃浩的言論。

唯唯：我都出大狀

對於黃浩要求他今午前公開道歉，梁烈唯淡定說：「到時睇嚇點，我都搵自己個律師研究嚇，既然佢出律師，我都出個大狀。」他不覺力撐志偉搞到自己周身蟻，他說：「公道自在人心，香港係自由社會，如果講句嘢都話犯法，完全冇言論自由，我又唔係用粗言穢語攻擊人，佢覺得好大件事，我唔覺。可能有啲人覺得我語無倫次、囂張，把口喺人哋度，我阻止唔到。」梁烈唯企硬不收番自己言論，他說：「講完收番都係講咗，如果有啲人對號入座，反應會大啲。」梁烈唯的無綫經理人Amy也聲稱沒有收到律師信。

話你知：藝人撐志偉出位言論

梁烈唯疑多口惹上麻煩，其實不少藝人都曾回應過曾志偉涉掌摑黃浩的事件，當中有不少出位言論。

張衞健

發表日期：12/12

出位言論：「盡可能講道理唔用暴力，除非對牛彈琴。」

杜如風

發表日期：10/12

出位言論：「我係保護被遺棄動物協會代言人之一，我會包容任何動物。」

譚詠麟

發表日期：9/12

出位言論：「志偉皈依我佛，法號叫『覺悟』，如果出手打人，即係佛都有火。」

王祖藍

發表日期：9/12

出位言論：「希望大家留意多啲家庭，少啲報警，理多啲屋企就最好！」

吳君如

發表日期：9/12

出位言論：「牽涉嘅每個人都咁有名氣，我唔想回應被人抽水，也呼籲全演藝界人唔好回應，唔好再畀佢見報。」

薛家燕

發表日期：7/12

出位言論：「佢最近見報率的確比我多，我唔認識佢。」

資料來源：《蘋果》資料室

.飯局風波越鬧越大 黃浩告梁烈唯誹謗
http://veryy8.blogspot.com/2012/12/blog-post_6028.html.飯局風波越鬧越大 黃浩告梁烈唯誹謗
http://veryy8.blogspot.com/2012/12/blog-post_6028.html