綠葉王：王俊棠惡足30年

高大威猛的王俊棠，人稱棠哥，演繹反派可說是手到拿來，沒有一個監製不收貨，不過棠哥其實是「唔出聲嚇死人，出聲就笑死人」。79年入行拍過電影，直至97年入無綫，棠哥才發現自己最大弱點是記對白，尤其是當年飾演鰲拜，簡直是攞佢命！熱愛唱歌的他更會開演唱會，歌影視瓣瓣有佢份。撰文：黃曉妍

入行前，王俊棠跟鄺美寶做模特兒，當時還有梁家輝，一起為澳門第一屆時裝展行騷，棠哥笑指當年的他十分貪靚；另一邊廂，他在disco工作，有次李修賢走到disco找他拍戲，當年是79年，就這樣，棠哥踏上電影圈之路。棠哥說：「第一部《流氓公僕》演反派，要我背面全裸，冇所謂啦，自己身形OK，又黐曬膠布，淨係睇到pat pat。之後好多電影都係搵我演反派，冇辦法，個樣衰。」

■王俊棠縱橫歌影視圈，近年更涉足飲食界，化身廚神話咁易。

攝影：黃偉雄

外傳棠哥曾是譚詠麟保鑣，他否認說：「邊有可能呀！」又有傳他是李修賢旗下萬能影業公司演員，棠哥說：「我冇簽萬能，我唯一簽就係TVB，我唔鍾意俾人綁住，覺得好無謂，我家都係俾TVB綁住。」

■第一部王俊棠演出的電影《流氓公僕》已演反派，跟李修賢（右）合作。劇照

■憶述跟樊少皇（左）合演電影《初生之犢》，王俊棠拍到周身傷，有苦自己知。劇照

拍劇凸顯弱點

談到拍戲的難忘事，棠哥憶述跟樊少皇合作《初生之犢》，他尷尬笑說：「我俾樊少皇打，我識鬼打咩，識打都未必夠佢打，佢隻腳真係好犀利。拍戲係有武指，大家都度好曬位，佢喺我側邊用腳踢埋嚟，我就用手去擋，點知擋高咗，我睇咗兩個禮拜跌打，咳都痛，傷咗氣門，第二次又打到另一邊，好彩淨係踢上面。」

拍戲受傷視作等閒，即使痛得要死，也要忍痛上陣，棠哥說：「喺泰國拍外景，我喺兩層樓高嘅屋頂跳落嚟，地下只係鋪咗一塊榻榻米，我落地嗰陣拗柴，我冇得鬱，腫曬，好少少都要繼續拍。我仲要喺水果市場坐住快船，企喺船頭揸住條繩好有型咁，但當時我痛到死，冇辦法，拍戲受傷係人都試過。」

拍電影拍到97年，機緣巧合下棠哥加入TVB至今：「90年我開咗間卡拉OK，嗰陣我已經識好多電影人同電視人，有次個同事帶監製鄺業生落嚟，我就咁拍第一套劇《陀槍師姐》。」棠哥發現自己越拍越唔識做戲，他說：「電視用三部機拍，電影就單機拍，如果唔影你，你就唔使做戲，但電視要繼續畀反應，越做越知自己唔得，第二套《鹿鼎記》飾演鰲拜，呢套攞我命喇，文言文，從未讀過咁難讀嘅對白，成頁紙，又要黐鬚，又要壓低把聲講說話，記對白記到我癲。好多場戲都喺大殿上，好多前輩喺度，初初拍講到一半，但三機拍又要記行去邊個位、幾時點樣轉身，當時我仲未控制到呢樣嘢，半頁紙唔得，NG再嚟，讀到半頁紙嘅一半，又再嚟，最後都係要分開拍。」

■王俊棠演《鹿鼎記》鰲拜一角，被對白考起。

劇照

■獲邀加入無綫，王俊棠演《陀槍師姐》，起初有點不習慣。劇照

奸角深入民心

棠哥未有灰心，默默克服自己的弱點，他表示回到家，對住鏡練習，他認為自己有了畫面才去演繹，不能夠死記對白。由於樣子太有威嚴，大部份角色都是反派，但監製王心慰給他轉型機會，拍了《烈火雄心》、《天幕下的戀人》、《愛．回家》等，他笑說：「不過王維基搶走咗好多人，所以又叫我做番反派，可能我演奸角太深入民心，監製會放心。」

講到唱歌，相信大家都會想到《歡樂滿東華》之全台藝員卡拉之星大唱遊，棠哥參與多年，為慈善機構籌得不少善款。棠哥自小喜歡唱歌，笑言已當自己是歌手，06年曾與李龍基、大L、威利舉行「四大哥王演唱會」。提起威水史，棠哥擔任張琪朗演唱會嘉賓時合唱《縴夫的愛》，他說：「呢首歌好hit，YouTube點擊率有四萬幾（應該是五萬幾），好犀利，啲人話我唱女聲都OK，因為我反串唱。」此外，棠哥今晚在荃灣大會堂舉行演唱會，屆時曾航生和馬蹄露擔任表演嘉賓。

卡拉之星　為善最樂

■《歡樂滿東華》卡拉之星環節總少不了王俊棠參與。

王俊棠79年拍電影晉身娛樂圈，97年加入無綫後，參演的劇集多不勝數，包括《鹿鼎記》的鰲拜、《陀槍師姐》的聶世官、《潛行狙擊》的羅勝、《雷霆掃毒》的九紋龍和《愛．回家》的雷武，還有《烈火雄心》、《天幕下的戀人》、《誰家灶頭無煙火》、《缺宅男女》、《護花危情》、《天梯》等，雖然棠哥大部份角色都是惡霸、社團人士等，後來他轉型成功，不用再扮演反派角色。除劇集外，最為人熟悉的就是棠哥曾參與《歡樂滿東華》的全台藝員卡拉之星大唱遊，籌募善款。

.綠葉王：王俊棠惡足30年
http://hk8news-e.blogspot.com/2012/11/30_20.html