謙仔馬路狂奔 險成輪下魂
由羅仲謙、梁烈唯、沈震軒同伍允龍等主演嘅《古惑仔：江湖新秩序》將於12月上映，所以近日積極趕拍，前晚11點幾，飾演陳浩南嘅謙仔同扮演山雞嘅唯唯喺旺角追殺坤沈震軒，佢哋喺車來車往嘅彌敦道馬路上展開追逐戰。
由於劇組全程打遊擊戰，一見交通燈轉紅色就即衝出去進行拍攝，沈震軒由滙豐銀行打斜跑過馬路，來回跑咗三四次，現場車輛眾多，所以過程又狼狽又危險。沈震軒拍完之後，就到謙仔同唯唯拍攝，因為要夾兩個人同時喪跑嘅時間，有份擔任動作導演嘅伍允龍事前已作出指導，並試拍兩次，其間佢哋為安全起見，亦有截停車輛。
《今日我至危》
只差一點點就撞正……的士！羅仲謙同梁烈唯認真搏命，前晚拍戲為求逼真，喺車來車往嘅旺角街頭喪跑劈友，只差兩秒就被衝黃燈嘅的士撞倒。
坤沈震軒喪跑幾粒鐘，難怪佢拍到腳軟。
古惑仔玩轉彌敦道之後，又轉場到西洋菜街，佢哋三個行路似足江湖人物。
伍允龍（中）擔任動作導演，指導演員走位。
的士衝燈急煞停
殊不知到正式拍攝時，謙仔同唯唯如常起勁照跑，但因為有的士衝黃燈，只差兩秒就撞倒兩人，好彩的士即時煞停，但司機不滿兩人衝出馬路，即響號以表不滿。
事後謙仔話：「因為馬路唔會冇車，所以想有車先跑，真係好高難度，我哋以為架的士會停，不過喺安全情況下，加少少真實鏡頭自己都OK，原本想喺車來車往先跑，但劇組話太危險。」
採訪：溫敏芝 攝影：黃偉雄
上一則:梁政玨拋胸 姣壓Chilam
下一則:阿葛抱粉絲碌地
.謙仔馬路狂奔 險成輪下魂
http://hk8news-e.blogspot.com/2012/10/blog-post_4425.html
