有話兒：河國榮等足25年圓出碟夢

一人有一個夢想，能操流利廣東話的澳洲人河國榮，來了香港25年參演過很多劇集，扮過無數警司和外籍高官角色，然而他來港的目的，其實是推出廣東碟，可惜一直沒被唱片公司睇中。死心不息的河國榮決定自資40多萬出碟，大唱張國榮、譚詠麟、張學友和陳百強的金曲，寧願蝕錢都要完成心願，網友更力撐他做新人王。

撰文：餘燕儀

47歲的河國榮等了25年才圓歌手夢，就算蝕錢都要出碟。攝影：林德雄

河國榮前三次都錄音失敗，反令他越挫越勇，堅持要唱到最好。

在澳洲土生土長的河國榮，讀書時認識了一名香港留學生，從此對廣東歌情有獨鍾，25年前他孤身來港發展，等足漫長歲月都沒機會做歌手，只能在電視台和電影圈中浮遊。現年47歲的他不能再等了，終於在兩年前決定自資出碟，預計明年一月推出，他說：「家第四次錄音，之前三次自己唔收貨，覺得把聲唔夠好，我唔想求其出，自己好奄尖，就算唔係好出色，都唔想太差，唔係想做鬼佬唱中文歌玩噱頭，今次隻碟全部靠自己，究竟有勇氣定蠢都未知！」

新碟唱盡四大巨星

自資40多萬出碟的河國榮，每星期錄音三次，每次三粒鐘：「錄音花咗唔少錢，但冇辦法，我嚟香港目的想唱歌，拍戲係意外。」他的處男碟取名《緣的根源》，翻唱譚詠麟（阿倫）、張國榮（哥哥）、張學友和陳百強的歌曲，河國榮為保持神秘，只肯透露其中一首歌是阿倫《愛的根源》：「我揀嘅歌都係初初接觸香港文化時唱過，每首歌有背後故事，好似點認識譚詠麟、張國榮，因為佢哋去澳洲登台時，我曾經做過佢哋司機，呢個係緣份嘅開始，所以隻碟叫《緣的根源》。」

珠玉在前，河國榮不會蠢到跟巨星比較：「我永遠唔會好過佢哋，自己特登三年冇聽佢哋嘅原版歌，就係想慢慢搵自己方法唱，家我都唔記得佢哋點唱，唔怕受影響。」

阿倫（右）當年知道河國榮識唱他的歌，綵排時即找他上台合唱。資料圖片

當年張國榮出殯，河國榮現身靈堂送偶像最後一程。

河國榮（右一）常在劇集中扮演警官，並曾跟林保怡（右二）合作。《刑事情報科》劇照

憶同哥哥傾三小時

對於這四位巨星，河國榮衷心佩服：「哥哥係完美主義者，佢唱快歌、跳舞都好過其他人；阿倫60幾歲都可以開演唱會，隨時唱三個幾鐘真係好勁，我幫佢哋做過司機，佢哋好nice，有次同哥哥遊車河，佢話想自己揸車，喺香港冇乜機會，我坐佢隔籬，佢同我傾咗三個鐘，寸嘅歌星唔會同司機傾三個鐘；阿倫喺雪梨開騷，和音話我識唱佢啲歌，佢知道咗綵排叫我上台唱。」

河國榮還讚學友唱歌冇得頂：「學友唱歌叻到痹，以為自己都唱到，但埋位先知唔得；陳百強唱歌有親切感，歌詞好有意思，我好鍾意《疾風》，呢隻碟好多波折，仍然要繼續落去，《疾風》都係呢個意思，但今次隻碟漏咗冇揀。」他花了兩年籌備唱片，當初還飛去洛杉磯錄音，怎知撞正喉嚨發炎，去年聖誕在港再錄，由於聲音初癒，把聲難聽到自己都頂唔順，他說：「呢兩年試過起碼十次失聲，最長三個月唔可以講嘢，雖然好多波折好失落，但我冇放棄，每次失聲都係好事，因為以前我唔識運聲，唱三首歌已沙聲，但每次失聲返嚟再唱歌，可以忘記少少壞習慣。」

彈新人唱歌冇感情

河國榮自言唱歌10分滿分有8分，對於網友撐他做新人王，他認真說：「冇諗過，我冇簽唱片公司應該冇份，我唔理市場反應，出咗先講。」對於現今樂壇新人，河國榮坦言全部唔識：「之前聽到新歌，覺得唱到好似機械冇感情，我接受唔到，希望自己唔係咁，呢個係商業問題，因為冇人買碟，唱片公司用最平方法出，作曲編曲變咗冇靈感，歌手可能入錄音室先第一次聽，半個鐘要錄好，不過好彩係佢唔係我，我一首歌可以錄十個鐘，我係老人家，鍾意八十年代歌手。」

.有話兒：河國榮等足25年圓出碟夢
http://hk8news-e.blogspot.com/2012/10/25.html