真面目
頂包受罪 執梁思浩二攤演《食神》 星爺玩謝祝文君呆等 9個鐘
2012年09月19日惡運一條龍套用在星爺周星馳身上最恰當。月初被前度於文鳳入稟追討 7,000萬賣樓傭金後，上週梁思浩在 now的《娛樂審死官》中大爆當年被星爺折磨，搞到思浩發誓「就算將來做乞兒都唔會再拍周星馳嘅戲」，兩年後有製片再搵他拍《食神》，他都推掉，執他二攤的祝文君，同樣被星爺玩謝，電影出街僅有分半鐘戲分，但拍攝當日卻慘罰坐 9個鐘先埋位，非常黑仔。
出名尖酸刻薄又計較的星爺，曾先後多次與合作的導演和演員炒大鑊，更有傳他在《少林足球》片場鬧喊趙薇，搞到神憎鬼厭。日前，梁思浩亦在節目大爆 94年拍《國產淩淩漆》「喊足 17次，但 roll一次機」控訴星爺惡行。
「算唔算虐待？」
思浩直指周星馳玩佢，要佢喊足 17次，由早上 10點喊到淩晨 5點。最賤仲係導演李力持之後先同佢講，除第一 take外冇 roll過機。 96年星爺原本搵思浩在《食神》扮演主持一角，但思浩「發誓唔拍周星馳戲」狠推後，角色由當年《城市追擊》主持祝文君補上。
對於執思浩二攤，祝文君唔知情：「冇聽過（執二攤），我淨係知道嗰時佢哋（星爺）想搵《城市追擊》的主持人去演，咁咪搵我囉！星爺對我冇乜嘢嘅，對其他人就唔知啦！不過嗰日我由朝早 9點幾等到 6點先拍，拍一個 shot，拍咗差唔多 1個鐘，條片出街都係分幾鐘。我都唔知點解要叫我咁早到？如果我知係拍 last 1場就唔會 9點到啦！唔知咁算唔算虐待喎？」罰坐成日總好過喊足 17次呀！
有排受
唔少同星爺合作過的藝人導演都話佢脾氣大、難相處，益自己永冇益人，甚至在眾目睽睽的片場惡言相向，過往忍唔住的藝員導演們都曾數臭佢。
黃一飛爆 8樽
在《少林足球》中演大師兄的黃一飛，當年拍攝時曾被要求「爆樽」，為求效果好仲要爆足 8個，後導致頭頂脫髮。
吳孟達白等
吳孟達雖與星爺合作多年，但在《功夫》開拍前星爺曾叫吳留幾個月檔期，結果白等數月，令佢損失搵錢機會。
大罵李力持
李力持與星爺相識 13年，合作過《食神》，但因《少林足球》意見不合，星爺於片場開口大罵李，兩人關係決裂。
如花被屎淋
拍攝《西遊記》時，如花沒有沖走馬桶糞便惹怒星爺，佢命人將糞便包起再塞入花灑頭，等如花沖涼時屎淋全身。
.[FACE]9個鐘
http://hk8news-d.blogspot.com/2012/09/face9.html
