張名雅、黃心穎、朱千雪、湯洛雯專訪

我主場：負評港姐張名雅急洗惡名

應屆港姐張名雅、黃心穎、朱千雪、湯洛雯經歷香港小姐選美工程的洗禮，還有突發性的普選冧server風波，都被訓練得成熟剔透，亦意外地令觀眾加深印象，參選時負面新聞不絕，令奪冠的張名雅民望插水，季軍朱千雪反成為民意冠軍，如今一切已成定局，四人都磨拳擦掌，靜候機會，準備好在自己的星途上隨時起飛。撰文：羅美倫

黃心穎、張名雅、朱千雪、湯洛雯經歷了普選港姐冧機風波，待人處事都變得份外成熟。攝影：陳順禎髮型：Derek Cheung@Hair

張名雅有人讚靚

經過冧機風波，張名雅的冠軍身份終被確認，只要偶然在街上遇到支持她的人，已令她重拾自信，她說：「有個姨姨話我好靚，點解咁似香港小姐張名雅嘅，我呆一呆答佢係，佢即刻講鼓勵說話，好開心佢有留意我哋，對港姐仲好熱情。」不得不承認冧機風波反而令更多人對今屆港姐留印象。

港姐選舉當晚冧機風波一度令張名雅、朱千雪的名次受動搖。

張名雅負面新聞多多，當選後她承諾做好本份證明自己。

張名雅雖然身形輸蝕，但她在港姐決賽夜的表現確實大方得體。

「我冇整容」

說到參選時的整容、攬仔負面新聞，張名雅誓要做好港姐本份洗惡名：「一定有呢啲新聞，嗰次嗰個係我表弟，有時覺得搞笑，惟有用正面態度去諗，同朋友出街係正常交往，冇做過唔擔心，我亦冇整容，相由心生，對自己有信心行出嚟都靚啲。」

做好港姐本份的同時，張名雅亦渴望拍劇，問她想演甚麼角色？她笑言：「都想拍《皆大歡喜》呢類家庭劇，等觀眾對我認識深啲，之後想試嚇律師、醫生，奸角都想試，哈哈！」最想跟誰合作？張名雅雀躍說：「黎耀祥、汪明荃啦，仲有林峯、陳展鵬都好。」想做他們的女友？張名雅笑嘻嘻說：「妹妹都得嘅！」

黃心穎本已過於自信，經港姐洗禮，變得比以前圓滑。

黃心穎訓練EQ

亞軍黃心穎似旁人般陪伴張名雅、朱千雪度過冧機風波，她承認參選後令自己變得成熟，尤其是看輸贏得失：「我細個好勝，家發覺只得一個會贏，但唔可以輸咗一世唔開心，家人會擔心，其實輸贏唔重要，贏有好多定義，例如學到嘅嘢第時用番。」在參選期間黃心穎已參透此真理，故比賽當晚出奇輕鬆，反而令她有意想不到的好成績。

懶理批評

在外國讀書猶如在溫室長大，受保護的黃心穎終見識到真正的世界，她坦言最大得益是EQ方面的訓練，她笑言尤其要面對記者，那是否不接受被人批評？她坦言：「初時唔開心，會驚，但之後知道一定有人唔鍾意，有啲批評可以令自己改進，家用搞笑方式接受，當冇嘢，我以前都會咁批評人，嘩，佢件衫咁核突嘅，呢啲係好平常嘅事，啲人就喺選美時望住張相同資料批評你，當晚我就係要表現畀人睇我係點，家要批評人，我都會睇耐啲先。」

朱千雪不敢想能否跟劉德華合作，但肯定自己想拍劇。

朱千雪唔會認命

一切已成定局，朱千雪雖是民意冠軍，最終只是季軍，朱千雪坦言有獎已很開心，沒想過要推倒重來得冠軍。問她是否認命？她笑笑說：「冇話係認命，開心努力令自己入到三強，呢個結果已經係個榮耀，人哋話應該係冠軍，我只係開心有人支持。」在得獎佳麗中，朱千雪從未有過負面新聞，但她不認為這樣可以得更高名次：「冇人想有太多負面新聞，或用呢啲新聞去提升任何人氣，我一直都唔介意有冇新聞。」

膽量大增

有說劉德華回巢拍的那部劇安排朱千雪演出作安撫，她笑說：「唔敢咁諗，佢真係返嚟拍都好多人爭住做，我經驗淺，有咁嘅機會自然好啦！」她直言想拍劇：「拍就一定想拍，因為未試過，想試多啲嘢，但都想履行港姐責任先。」近乎零演出經驗的朱千雪，讀書時曾試過演只有一句對白的舞台劇，她承認膽量不夠，但選完港姐見識多了，信心大增，她盼將來有機會跟林峯、鍾嘉欣、胡杏兒及徐子珊等學習。

湯洛雯自小受爸爸湯鎮宗教導，對得失看得不重，很快便振作起來。

湯洛雯重新振作

大熱倒灶只奪旅遊大使獎的湯洛雯，輸掉比賽也曾失落過，但很快又重新振作起來，她說：「比賽得就預咗有輸贏，要有心理準備，對我嚟講比賽同之後條路點走係睇得好開，咁多佳麗只有三個得三甲，有獎都開心，證明自己有努力。」事實上高海寧當年也只拿下旅遊大使獎，現在成績有目共睹，足可讓湯洛雯借鏡。

雖然曾是競爭對手，但四人私下感情不俗。

進修迎戰

有湯鎮宗這個藝人爸爸，自小訓練她做事不會太執著，她說：「屋企人嘅性格都係『是但』，唔會執著某啲嘢，我係好快就開心番嘅女仔，但爹哋都留咗啲幾感動嘅說話畀我，話名次唔緊要，讚我已經做得好好。」在湯鎮宗眼中，湯洛雯已長大，很多事包括前途、事業都放手讓她自由發揮，她說：「爹哋覺得我仲有青春，不如自己揀自己決定。」在港姐合約這一年內，湯洛雯等待任何機會。

.張名雅、黃心穎、朱千雪、湯洛雯專訪
http://hk8news-d.blogspot.com/2012/09/blog-post_264.html