有話兒：大男人錢嘉樂 變愛妻號

平日口花花、遊戲人間的錢嘉樂，從不愛對未來錢太湯盈盈講半句甜言蜜語，原來他一直感受盈盈付出的愛，暖在心頭也記在心上，即將踏入人生另一階段，依然不會從他口中聽到承諾一生一世的肉麻情話，但嘉樂甘願為老婆及BB作改變，做個愛妻、愛家的巴不得爸爸。撰文：羅美倫

與湯盈盈拍拖四年多，原來錢嘉樂最初未有視盈盈為結婚對象，全因盈盈沒有老婆feel：「初初只覺得佢鬼妹仔玩得、健談、百厭、儍儍哋、好鬼嘈，呢個世界只有唔夠三個人敢用腳撩曾志偉個嘴，哈哈……佢係其中一個，咦，呢啲係乜嘢女仔嚟㗎？但識落就知唔係咁，後尾拍得拖，就梗係視為結婚對象啦。」

常演壞女人的盈盈其實內裏賢良淑德，這亦是盈盈吸引之處，嘉樂深深感受到：「識耐咗感受就唔同，原來佢識煮嘢，仲好識為人諗，佢會關心你，有時間佢會整嘢畀朋友食，初時仲以為只係畀我，佢好關心人，相處耐咗，更加睇到佢連普通朋友都會咁做，但對另一半會畀得更多，肉麻老套啲講，有愛嘅感覺，哈哈……好似以前阿媽咁，仔，出去要小心啲呀，我整咗啲嘢你帶返去食。」

嘉樂承認有時頗為大男人，但對盈盈付出的愛，深深感受得到。

攝影：陳俊強

場地：文鼎壹號

看透內在美

嘉樂承認初時以為盈盈是喜愛夜蒲型，絕不是好老婆型，但硬漢最終被盈盈的賢淑軟化，他說：「大家做呢行都早出晚歸，有少少時間都會偷雞休息，但盈盈會臨出門口為你準備好啲嘢，一起身已經有曬橙呀、其他嘢喺身邊，好似祭品咁，當我係佢先人咁，不過好周到，係感動嘅。」

從不會替兄姊著想的錢家孻仔，看見同樣是孻女的盈盈，如此懂照顧人，也大為欣賞，嘉樂禁不住說：「呢個世界唔好睇外表，咪懶叻話自己一睇就知人哋係乜嘢人，其實用心睇先睇到人另一面，兩個人一齊，相處耐咗就知內在，反而外在必定會有變。」

本身是大細路的嘉樂坦言會為老婆、BB作改變。

鬼馬的嘉樂不肯說出承諾，他相信盈盈會感受到他的誠意。

想到將來半夜要起床幫手餵奶，嘉樂即扮個慘樣。

嘉樂向來少談感情事，與盈盈交往也較為低調。資料圖片

愛盈盈率直

嘉樂過去談及這段情總表現含蓄，反而盈盈表現直接得多，嘉樂公開婚訊當天，盈盈接受訪問時開心得說：「終於都做到錢太喇！」盈盈可愛得令人覺得嘉樂大男人，嘉樂聞言又忍不住讚未來太太：「佘詩曼笑佢食飯先啦，話佢飯應，盈盈都笑住話係，我就係欣賞呢個人好簡單！我都係簡單嘅人，遇到佢覺得好舒服，佢俾人笑因為佢覺得no big deal，俾姊妹睇到佢有幾恨嫁，又唔隱藏，第二啲女仔唔會咁，盈盈好舒服，係就係唔係就唔係，人哋話佢流曬口水佢都唔掩飾仲話係咩，好多正能量，唔計較咪開心囉！」

盈盈與嘉樂都愛小孩，有共識要生兩個。微博圖片

情話難啟齒

即將踏入人生另一階段，做人老公、做人爸爸，嘉樂知道自己要改變，事業上，已由昔日14歲龍虎武師中最細的嘉樂仔，變成有武師跟他搵食的嘉樂哥、錢導演；家庭方面，嘉樂要有更多考慮、遷就另一半，尤其有了BB，他更加要大個仔。那對盈盈可有甚麼承諾？嘉樂笑說：「婚只結一次，希望係啦！」這樣都算是承諾？他說：「我唔會好刻意講永遠，自己都痹，唔好逼我講好肉麻嘢，例如話『放心，以後交畀我』，結婚嗰日都唔會，唔想好似做騷咁，我會講嘅，大多數唔感動，但會感性。」

戇居男vs解語花

嘉樂埋首工作時作風大男人，他慶幸獲盈盈體諒，這也是兩人能開花結果的原因，他說：「之前咁多段感情唔work，唔係鍾意咗第三個，唔係對對方唔好，係相處唔到，原來唔係大家鍾意大家就得，相處唔到就唔得。」

嘉樂曾先後與李珊珊（圖）及關秀媚發展，可惜都因相處不來未能結果。

為電影擔任動作導演，令嘉樂懂得顧及更多人感受。

搵食壓力大

嘉樂做動作導演需設計安全的動作給演員，有時突然靈感到就會入定變得戇居居，不容另一半或家人影響思緒，他說：「我要擔心拍唔曬、超支、手足受傷，好似同謝霆鋒拍《逆戰》要八樓跳落嚟，佢嘅安全喺我手上好大壓力，佢搵咁多錢，咁多人跟佢搵食，有乜事我孭唔起，只要一次有人受傷我成世人唔安樂，所以諗嘢時個人就怪怪哋，都幾難頂。盈盈好活潑鍾意講嘢，但佢明白亦識就人，我突然話係時候停一停好啲喎，佢就知我講乜，有啲女仔唔知，會鬧做乜唔理我呀，問題就出嚟。」

嘉樂知盈盈很遷就他，故盈盈懷孕期間，他識做地變小男人：「唔捨得做啲唔好嘢激佢啦，佢明白我唔係特登嘅人，唔會買花或者好似電視劇咁跪喺度，乜嘢都計劃好曬，我係好自然嘅，佢感受到其實我會為佢做嘢。」

.有話兒：大男人錢嘉樂 變愛妻號
http://hk8news-d.blogspot.com/2012/09/blog-post_23.html