關詠荷歐陽震華新劇談千年愛情

出山助TVB打仗 孖Bobby談千年愛情 48歲關詠荷捱餓修身

傳聞明年中正式發出免費電視牌照給城市電訊、now和有線電視，電視大戰打到嚟，無綫不敢輕敵，開戰前夕儲足「兵力」，除出動「軍師」曾志偉拉攏影帝劉德華拍劇，兼重金禮聘王晶回巢攝製金裝豪華劇外，當然唔少得拖埋無綫福將歐陽震華（Bobby）落水，連同他的最佳拍檔關詠荷（Esther）都要再出山，拍攝明年播出的30集重頭劇。現年48歲的關詠荷披甲上陣，為急急踢走肥師奶娘爆Look，連日來要捱餓食生果、飲果汁修身。

佘詩曼及鄧萃雯等阿姐相繼離巢唔玩，無綫花旦荒升級，戲劇製作部助理總監梁家樹（Tommy）、製作資源總監樂易玲決再打做了多年「黃面婆」的關詠荷主意，力邀她回巢「救亡」。早前兩人聯同製作部經理莊偉健邀約Esther見面，用10年冇合作過的老拍檔Bobby來「引誘」她再續前緣，表示會為她度身訂造劇本，讓她由頭到尾孭飛，新劇最後落實11月開工，由宋代演到五六十年代至現代，一個橫跨一千年的愛情故事，關詠荷分別扮演古代才女、50年代大家姐及現代名嘴；跟宋代包公、50年代探長及現代警務人員的Bobby鬥戲，齋聽都夠吸引！Esther今次出山，獲老公張家輝支持，表示囡囡都長大啦，決定權全部交予老婆話事，唔怪得她無後顧之憂，勇往直前。

暴脹幸福肥師奶

03年結婚，06年生女Brittany，09年5月復出與米雪、郭晉安等拍攝無綫25集重頭戲《五味人生》，打後日子都做全職主婦。去年她陪伴夫婿出席香港電影金像獎頒獎禮時身型暴脹，出現了水桶腰。上周，穿牛仔褲、波鞋配「黑超」，師奶Look的關詠荷現身銅鑼灣景隆街，縱使身穿黑色鬆身衫，仍難掩水桶腰，牛仔褲下的脹爆象腿亦非常「養眼」；她「濕平」後手持戰利品，馬上Call車離開，登車時巨臀「無所遁形」。據知，連月來Esther已積極減肥準備「見人」，多食生果餐踢走肥臀、凸腩、肉腿、粗腰，故特地選購了美國出名品牌Cuisinart攪拌機做健康果汁，無計，鬼叫上鏡定論係：愈瘦愈好睇咩。

高層讚Keep得好

樂易玲坦承Esther被誠意打動，已落實演出：「佢只係簽一部，都係因為劇本、對手夠吸引，而且時間可以遷就到。（要唔要佢趕走師奶Look？）佢都OK喎，皮膚保持得好靚。」莊偉健說：「Esther好鍾意個故事呀，希望佢同Bobby可以再擦出火花啦！雖然要湊女，但佢冇額外要求，唯一提出想早啲出劇本。（佢要減肥？）我又唔覺佢肥，都Keep得好好。」

.關詠荷歐陽震華新劇談千年愛情
http://hk8news-d.blogspot.com/2012/09/blog-post_5597.html