馬國明：我跟林峯唔同

無綫劇《衝上雲霄》、《少年四大名捕》捧出馬國明、林峯、吳卓羲及黃宗澤，路開了，是否開到荼蘼則是個人修為。林峯已Chok出個未來，自認為悶蛋的馬國明，直言情願不應酬：「我同林峯的路不同！」踏實搵錢對馬國明似乎比得獎更實際。

跟林峯、黃宗澤和吳卓羲私底下很少出來交流，在公司碰面會較多話。當年拍劇大家都只是愛貪玩的o靚仔，根本談不上有何演技。從來都不覺得大家會有競爭，我不敢說大家很老友，但起碼不會互搶。

馬國明自認悶蛋，在圈中是公認的乖乖仔。

有指林峯識Social受公司力捧，馬國明坦言自己與他的路不同。

個個都想搵人仔

現在誰不想返內地拍劇搵大錢？在公司鬥到你死我活都冇用，說白點，公司愈多演員拍戲，即是你愈有機會可以去內地搵外快，誰會想在公司錄影廠拍足365日？人人都想出去搵外快，所以冇話邊個想整死邊個。以我所知，因為我冇期，公司已經替我推了三、四部內地劇。

我從冇假想敵，不跟人家比較，要妒忌不如妒忌英超球星啦！可以邊踢波邊賺幾百萬英鎊！羨慕林峯？視乎你以哪種心態去看待。林峯喜歡唱歌，但我不愛當歌手，人家說林峯識Social所以上位快，我是不擅長Social，大家的路不同，如果要我去應酬仲慘過死！我同期藝訓班的同學都走得七七八八，剩下一、兩個還等待機會，我能說自己不幸運嗎？入行只是做了三年路人甲乙丙就可以拍《衝上雲霄》，我只會以「半杯水」心態對待，即是我還有半杯水，不夠好嗎？

獎金比獎項重要

早年取過飛躍獎，完全冇飄飄然，獎金同獎項？我寧願要獎金，獎項只是鼓勵，難道你飢寒交迫時把獎座吞落肚？最基本的生活要維持到，否則說有甚麼理想根本是談不上！

人家說得高層歡心會易攞獎，坦白說，每個人總會偏愛某一個，有句說話很有道理：「不是你能力有幾高，而是你上司認為你能力有多高。」我和上司都OK夾，但一定未係最夾的一群。林峯一定係公司比較力捧，因為公司看到他擁有一些我冇的長處，所以不可以說公司偏心。

口述：馬國明

.馬國明：我跟林峯唔同
http://hk8news-d.blogspot.com/2012/09/blog-post_8780.html