滾熱辣
同居上水三層村屋 官恩娜引郎入室
2012年09月28日
官恩娜（ Ella）在新劇《雷霆掃毒》中暗戀林峯，冇膽表白，鵪鶉到暈。不過現實生活中， 33歲的她正值如狼似虎之年，對愛情一向主動出擊。為搵好歸宿， 09年她索性參加 speed dating獵男，卒之撈到細她三年的中法混血醫生 Juan。
二人拍拖三年，感情進展神速，更去到談婚論嫁階段。為朝夕相對，一向與家人租住上水三層村屋的 Ella，近日索性叫埋鬼佬男友入贅官家，實行一家親。周日（ 23日），本刊拍得二人於粉嶺選購日用品後，便齊齊返村屋繼續癡纏。
周日（ 23日）下午，官恩娜（ Ella）出席完《雷霆掃毒》宣傳活動後，先跟大隊坐無綫小巴返入電視城，再取回預先停泊在電視城的座駕，向上水方向進發。其間她十分鬼祟，多次無故將車泊埋避車處，試探有冇記者跟蹤。
補購日用品
天開始入黑， Ella終於放棄左兜右兜，將車駛進粉嶺，此時記者發現其鬼佬醫生男友 Juan已於停車場等她。 Ella一見男友，便依偎著他六呎高的身軀，雙雙行入附近商場。二人逛完幾間家庭用品店都買唔到心頭好，於是走入萬寧選購日用品。最後 Juan就買了一支電動牙刷刷頭和一盒牙線，之後便齊齊返回上水村屋。 Juan連牙刷刷頭這類私人物品，都要添置在女友香閨中，明顯二人已由拖友升級為同居關係。
押後婚期
Ella 09年由市區搬入上水雞嶺村的村屋，起初她只以五千元月租二樓連天台的單位獨居。後來 Ella的父母、哥哥和細妹提議一齊住，於是她豪氣地以兩萬多元租埋全幢。眼見屋企地方較前闊落， Ella於是招郎入屋，叫男友搬埋同住。「 Ella嘅屋企人都幾鍾意 Juan，雖然佢得 30歲，但睇得出佢對 Ella幾細心。不過 Ella爹哋對女婿要求好高，所以 Ella就趁呢次同一屋簷下嘅機會，俾爹哋同 Juan相處一下。上年 Juan曾提過結婚， Ella亦心大心細。」知情者說。
男友與她屋企人相處融洽，二人曾計劃拉埋天窗。 Ella早前接受訪問時曾說：「如果冇得結婚生仔，我寧願唔紅。」恨嫁恨到出面。可惜 Ella上月剛簽華納做一姐，在幸福和事業兩者之間，她決定選擇後者，加上新公司勒令她要低調處理感情事，婚事唔押後唔得。
冇車牌的 Juan生活樸素，除非女友 Ella有空接送，否則他平日愛搭地鐵代步。而 Juan早前租住的黃泥湧峽道的蔚豪苑，近日亦人去樓空。
Ella驚青：你哋影到呀
周二（ 25日）， Ella現身時裝活動，記者問她有關感情事時，她望一望身旁的助手，之後謹慎地說：「唔！幾好吖！不過依家要以事業為先，啱啱至簽咗唱片公司，想做好隻碟先至講其他嘢。（係咪同居呀？）冇呀，我哋冇同居呀，佢住港島區，我同屋企人住上水。」之後記者透露早前拍得她和男友的同居生活後，她立即神色緊張，並反問記者：「真係有（影到）呀！係咩，你哋影到呀！（男友嗰晚過夜喎？）我同屋企人住㗎，我哋……」此時其助手便立即 㩒著她的手，示意她收聲。男未婚女未嫁，同居只是結婚前奏，毋須咁介懷喎！
送上門
出道八年的官恩娜（ Ella）情史唔多，但根據她以往的慣例，永遠男尊女卑，經常要送上門餵飽男伴。所以她今次能夠令男友入贅官家，的確邁進一大步。
吳卓羲
毋須多講， Ella和吳卓羲的戀情通街知。 06年本刊更拍得 Ella中午時分，由吳卓羲位於清水灣半島（小圖）的寓所落樓，擺明剛餵飽男方。
陸恭和
Ella 07年極速搭上陸恭蕙胞弟陸恭和，不久 Ella便搬入男方位於會景閣（小圖）豪宅，可惜戀情唔夠一年玩完。
村屋解構
官家以兩萬多元月租的三層村屋，位於上水雞嶺村村口。村屋每層面積有七百呎，地下更有二百呎花園，作為 Ella的私家停車場，而 Ella和男友同居於二樓。
診所放蛇 調經聖手
今年 30歲的 Juan-Domingo Maurellet是中法混血兒，於香港土生土長，操得一口流利廣東話，是倫敦大學分子醫學碩士和愛爾蘭內外科醫學士。 Juan 05年開始在愛爾蘭皇家外科醫學院實習， 08年則回港登記成為註冊醫生，於公立醫院任職。
Juan年初轉投私人診所，於位中環太子大廈的「卓健醫療體檢中心」執業，主理內外全科。由於香港不少女性都有內分泌失調及經期延誤等問題，故不少女病人都搵 Juan打救，令他成調經聖手。 Juan的診金為六百蚊一次，比較昂貴。
周一（ 24日），記者到過診所放蛇直擊 Juan睇症情況。發現 Juan十分細心，以流利廣東話不停關心記者病情，睇症睇足 15分鐘，非常詳盡。最後記者問他是否 Ella男友，他隨即面色一沉說：「我唔講呢啲嘢！」
.[忽然1周]同居上水三層村屋 官恩娜引郎入室
http://hk8news-d.blogspot.com/2012/09/1_9983.html
